নতুন দিল্লী, ০৪ ছেপ্টেম্বৰ (হি.স.)। শিক্ষক দিৱসৰ প্ৰাকক্ষণত দেশৰ সকলো শিক্ষক-শিক্ষয়িত্ৰীলৈ ৰাষ্ট্ৰপতি দ্ৰৌপদী মুৰ্মুৱে শুভেচ্ছা জ্ঞাপন কৰে।

তেওঁৰ বাৰ্তাত ৰাষ্ট্ৰপতিগৰাকীয়ে কয়, শিক্ষক দিৱসৰ দিনা সমগ্ৰ দেশৰ সকলো শিক্ষক-শিক্ষয়িত্ৰীলৈ আন্তৰিক শুভেচ্ছা জ্ঞাপন কৰিছো। প্ৰাক্তন ৰাষ্ট্ৰপতি ড° সৰ্বেপল্লী ৰাধাকৃষ্ণনৰ জন্ম জয়ন্তী উপলক্ষে শিক্ষক দিৱস পালন কৰা হয় । ড° সৰ্বেপল্লী ৰাধাকৃষ্ণন আছিল এগৰাকী মহান সাহিত্যিক আৰু দাৰ্শনিক। তেওঁ আছিল এজন অতুল্য শিক্ষকো। এই উপলক্ষে তেখেতৰ প্ৰতি মোৰ বিনম্ৰ শ্ৰদ্ধাঞ্জলি। সকলো নিষ্ঠাবান শিক্ষক-শিক্ষয়িত্ৰীক তেওঁলোকৰ অৱদানৰ বাবে কৃতজ্ঞতা জ্ঞাপন কৰিলোঁ। সকলো শিক্ষকে আমাৰ দেশক নতুন উচ্চতালৈ লৈ যোৱা আলোকিত প্ৰজন্মক উত্থাপন কৰি যাবলৈ প্ৰাৰ্থনা জনাইছো।

তেখেতে কয় যে তেওঁলোকৰ পথ প্ৰদৰ্শন আৰু সহায়ৰ জৰিয়তে শিক্ষকসকলে ছাত্ৰ-ছাত্ৰীৰ প্ৰতিভাক লালন-পালন কৰে আৰু তেওঁলোকৰ চৰিত্ৰ গঢ় দিয়ে। ছাত্ৰ-ছাত্ৰীক ভাল ব্যক্তিলৈ ৰূপান্তৰিত কৰাটো এজন শিক্ষকৰ দায়িত্ব। এজন নিষ্ঠাবান আৰু সংবেদনশীল শিক্ষকে ছাত্ৰ-ছাত্ৰীৰ অনন্য ক্ষমতা চিনাক্ত কৰে, প্ৰেৰণাৰ উৎস হিচাপে কাম কৰে আৰু তেওঁলোকৰ কামত পাৰদৰ্শিতা দেখুৱাবলৈ শক্তিশালী কৰে। শিক্ষকসকলে প্ৰযুক্তিক আকোৱালি লৈ আৰু উদ্ভাৱনীমূলক পাঠদান পদ্ধতি গ্ৰহণ কৰি অহৰহ জ্ঞান আহৰণ কৰিব লাগে। স্বতন্ত্ৰ চিন্তাধাৰাকো উৎসাহিত কৰিব লাগে আৰু ছাত্ৰ-ছাত্ৰীৰ মাজত কৌতুহলৰ ভাৱ গঢ়ি তুলিব লাগে।

উল্লেখযোগ্য যে ১৯৬২ চনত ১৮৮৮ চনৰ ৫ ছেপ্টেম্বৰত জন্মগ্ৰহণ কৰা ড০ ৰাধাকৃষ্ণনৰ জন্মদিন উদযাপন কৰিব বিচৰা একাংশ ছাত্ৰ-ছাত্ৰী আৰু বন্ধু-বান্ধৱীয়ে তেওঁৰ কাষ চাপিছিল। জন্মদিনটো পৃথকে পৃথকে পালন নকৰি ৫ ছেপ্টেম্বৰক শিক্ষক দিৱস হিচাপে পালন কৰাৰ ইচ্ছা প্ৰকাশ কৰে। ইয়াৰ পিছত ১৯৬২ চনৰ ৫ ছেপ্টেম্বৰৰ পৰা দেশজুৰি শিক্ষক দিৱস পালন কৰিবলৈ আৰম্ভ কৰে। ১৯৬২ চনৰ পৰা ১৯৬৭ চনলৈকে ড° ৰাধাকৃষ্ণনে ৰাষ্ট্ৰপতি হিচাপে কাৰ্যনিৰ্বাহ কৰিছিল। ইয়াৰ পূৰ্বে ১৯৫২ চনৰ পৰা ১৯৬২ চনলৈকে উপ-ৰাষ্ট্ৰপতি হিচাপে কাৰ্যনিৰ্বাহ কৰিছিল।-

হিন্দুস্থান সমাচাৰ / মনোজ কুমাৰ শইকীয়া