গুৱাহাটী, ২৯ ছেপ্টেম্বৰ(হি.স.)। মহানগৰীৰ মালিগাঁৱৰ কামাখ্যা ৰে’ল ষ্টেচনৰ সমীপত চোৰাংচোৱাৰ পৰা লাভ কৰা গোপন তথ্যৰ ভিত্তিত আৰক্ষীয়ে চলোৱা অভিযানত মাৰাত্মক ড্ৰাগছ হেৰ’ইন সহ এজন সন্দেহযুক্ত ড্ৰাগছ সৰবৰাহকাৰীক গ্ৰেপ্তাৰ কৰা হৈছে। ড্ৰাগছ সৰবৰাহকাৰী জনৰ জিম্মাৰ পৰা ২৫টা ড্ৰাগছ ভৰ্তি কণ্টেইনাৰ জব্দ কৰা হৈছে ।
ড্ৰাগছ সৰবৰাহকাৰী জনক বৰপেটাৰ বাসিন্দা মইনুল হক বুলি জানিব পৰা গৈছে । কামাখ্যা ৰে’ল ষ্টেচনৰ সমীপত গোচালা আৰক্ষী চকীৰ এটা তহলদাৰী দলে চলোৱা অভিযানৰ সময়তে গ্ৰেপ্তাৰ কৰা হৈছে ড্ৰাগছ সৰবৰাহকাৰী জনক। তেওঁৰ জিম্মাৰ পৰা হেৰ’ইন ভৰ্তি ২৫ টা কণ্টেইনাৰ জব্দ কৰিছে আৰক্ষীয়ে । গ্ৰেপ্তাৰৰ পিছতে হকক গোশালা আৰক্ষী চকীত আৰক্ষীৰ জিম্মাত লোৱা হয়।
গোশালা আৰক্ষী চকীৰ ভাৰপ্ৰাপ্ত বিষয়াৰ নেতৃত্বত আজি ড্ৰাগছ বিৰোধী অভিযান চলোৱা হৈছিল। আৰক্ষীয়ে অভিযুক্তক জেৰা কৰি সন্দেহযুক্ত ড্ৰাগছৰ উৎস আৰু ইয়াৰ উদ্দেশ্যপ্ৰণোদিত গন্তব্যস্থান জানিবলৈ অব্যাহত ৰাখিছে।
হিন্দুস্থান সমাচাৰ / ৰমেন বৰ্মণ
