ধুবুৰী, ২৫ জুলাই (হি.স.)। সাপটগ্ৰামৰ শালটাৰীত কালি নিশা সংঘটিত হৈছে এক ভয়ংকৰ ঘটনা । এহাল দম্পতীৰ কাজিয়া ৰোধ কৰিবলৈ যোৱা বৃদ্ধ এজনক চুৰিকাঘাত । চোকা ছুৰিৰে পেটত আক্ৰমণ কৰা বুল্লু শ্বেখ নামৰ বৃদ্ধ জনক মুমূৰ্ষু অৱস্থাত সাপটগ্ৰামৰ সহযোগী স্বাস্থ্য কেন্দ্ৰত ভৰ্তি ।এই ঘটনাই ব্যাপক চাঞ্চল্যৰ সৃষ্টি কৰিছে অঞ্চলটোত ।
উল্লেখ্য যে কোকৰাঝাৰ জিলাৰ নওদা গাঁৱৰ কাছেম আলীয়ে ৯ বছৰ পূৰ্বে সাপটগ্ৰামৰ শালটাৰী গাঁৱৰ বেল্লাল আলীৰ জীয়ৰী চুলতানা পাৰভীনক বিয়া পাতিছিল । বৃহস্পতিবাৰে নিশা কাছেম আলীয়ে নিজ পত্নীক লৈ শালটাৰীস্থিত শহুৰেকৰ ঘৰত উপস্থিত হয় ।
তাতে দম্পতী হালৰ মাজত ঘৰুৱা কথাক কেন্দ্ৰ কাজিয়াৰ সূত্ৰপাত হয় । দম্পতী হালৰ মাজত কাজিয়া ভাঙিবলৈ চুবুৰীয়া বুল্লু শ্বেখ উপস্থিত হয় | তাৰ পিছতে কাছেম আলীয়ে নিজৰ হাতৰ চোকা ছুৰি এখনৰে বৃদ্ধ জনৰ পেটত সুমুৱাই দিয়ে | এই আক্ৰমনৰ ঘটনাত তেজেৰে তুমুৰালি বৃদ্ধ জনক মুমূৰ্ষু অৱস্থাত চিকিৎসালয়ত ভৰ্তি কৰে ।ইফালে উদণ্ড কাছেম আলীক ৰাইজে আটক কৰি উত্তম মাধ্যম সোধাই সাপটগ্ৰাম আৰক্ষীক গতাই দিয়ে । সম্প্ৰতি মৃত্যুৰ ক্ষণ গনি থকা বৃদ্ধ জন সংকটজনক অৱস্থাত চিকিৎসাধীন হৈ আছে ।উদণ্ড কাছেম আলীক ৰাইজে কঠোৰ শাস্তি প্ৰদানৰ দাবী তুলিছে প্ৰশাসন ওচৰত ।
হিন্দুস্থান সমাচাৰ / কিশোৰ মিশ্ৰ