নতুন দিল্লী, ১০ মে’ (হি.স.)। কেন্দ্ৰীয় চৰকাৰে সকলো নিউজ চেনেলকে নিজৰ অনুষ্ঠানত ‘চিভিল ডিফেন্স এয়াৰ ৰেইড চাইৰেন’ৰ শব্দ ব্যৱহাৰ নকৰিবলৈ পৰামৰ্শ জাৰি কৰিছে। আচলতে এই চাইৰেনটো কেৱল সম্প্ৰদায় সজাগতা অভিযানৰ বাবেহে ব্যৱহাৰ কৰা হয়।

অগ্নিনিৰ্বাপক বাহিনীৰ সঞ্চালকালয়, অসামৰিক প্ৰতিৰক্ষা আৰু গৃহৰক্ষীয়ে এক পৰামৰ্শত কয় যে, “অসামৰিক প্ৰতিৰক্ষা আইন, ১৯৬৮ৰ ধাৰা ৩(১)(ডব্লিউ)(i)ৰ অধীনত প্ৰদান কৰা ক্ষমতা প্ৰয়োগ কৰি সকলো মিডিয়া চেনেলক অনুৰোধ কৰা হৈছে যে তেওঁলোকে নিজৰ কাৰ্যসূচীত সমাজক শিক্ষা দিয়াৰ বাহিৰে অসামৰিক প্ৰতিৰক্ষা বিমান আক্ৰমণৰ চাইৰেনৰ শব্দ ব্যৱহাৰ নকৰিব।”

ইয়াত কোৱা হৈছে যে চাইৰেনৰ নিয়মীয়া ব্যৱহাৰে নাগৰিকসকলক বিমান আক্ৰমণৰ চাইৰেনৰ প্ৰতি অসংবেদনশীল কৰি তুলিব পাৰে আৰু প্ৰকৃত বিমান আক্ৰমণৰ সময়ত সংবাদ মাধ্যমৰ চেনেলসমূহে ব্যৱহাৰ কৰা নিয়মীয়া শব্দ বুলি ভুল ব্যাখ্যা কৰিব পাৰে।

ইয়াৰ উপৰিও কয় যে অসামৰিক প্ৰতিৰক্ষা আইন, ১৯৬৮ অনুসৰি অসামৰিক প্ৰতিৰক্ষাৰ প্ৰস্তুতি বৃদ্ধিত সহায় কৰিবলৈ বিষয়াসকল সাজু।

উল্লেখযোগ্য যে ভাৰত আৰু পাকিস্তানৰ মাজত থকা উত্তেজনাৰ প্ৰতি লক্ষ্য ৰাখি এই পৰামৰ্শ জাৰি কৰা হৈছে।

हिन्दुस्थान समाचार / মনোজ কুমাৰ শইকীয়া