গুৱাহাটী, ২১ এপ্ৰিল(হি.স.)। চোৰাংচোৱাৰ পৰা লাভ কৰা তথ্যৰ ভিত্তিত সোমবাৰে মহানগৰ আৰক্ষীয়ে অভিযান চলাই গুৱাহাটী মহানগৰীৰ হাতীগাঁৱৰ বালিজান পথ অঞ্চলৰ এটা ভাড়াঘৰৰ পৰা দুজন ড্ৰাগছ সৰবৰাহকাৰীক ১১ কে.জি. গাঞ্জা সহ আটক কৰিব সক্ষম হয়।

এক গোপন সূত্ৰৰ ভিত্তিত অভিযান চলাই হাতীগাঁও আৰক্ষী থানাৰ এটা দলে ভাড়াঘৰৰ চৌহদত তালাচী আৰম্ভ কৰে। অভিযানত যথেষ্ট পৰিমাণৰ ভাং উদ্ধাৰ কৰাৰ লগতে বৰপেটা জিলাৰ কাহিকুছি গাঁৱৰ বাসিন্দা দুজন সৰবৰাহকাৰীক আটক কৰিব সক্ষম হয়। আটকাধীন ব্যক্তি দুজনক মহিবুল হক(২৯) আৰু শ্বাহ জামাল(২৮) বুলি চিনাক্ত কৰা হৈছে। দুয়োজনেই অসমৰ বৰপেটাৰ আৰু নিচাজাতীয় দ্ৰব্য সৰবৰাহৰ সৈতে জড়িত বহল নেটৱৰ্কৰ অংশ বুলি ধাৰণা কৰা হৈছে।

অভিযানৰ সময়ত আৰক্ষীয়ে গাঞ্জা থকা তিনিটা বেগ উদ্ধাৰ কৰে। এয়া ৪.৯৪৪ কেজি ওজনৰ পি-১ চিহ্নিত বগা পলিথিন বেগ, ৪.৩৮৬ কেজি ওজনৰ পি-২ চিহ্নিত আন এটা বগা পলিথিন বেগ আৰু ২.৩২২ কেজি ওজনৰ পি-৩ চিহ্নিত ক’লা পলিথিন বেগ। ঘটনাস্থলীৰ পৰা নিচাজাতীয় সামগ্ৰীৰ উপৰিও এটা মোবাইল ফোনো জব্দ কৰা হৈছে।

এই অভিযানত উদ্ধাৰ হোৱা মুঠ গাঞ্জাৰ পৰিমাণ হৈছে ১১.৬৫২ কিলোগ্ৰাম। নাৰ্কটিক ড্ৰাগছ এণ্ড চাইকোট্ৰপিক ছাবষ্টেন্স (এনডিপিএছ) আইনৰ অধীনত এটা গোচৰ ৰুজু কৰা হৈছে। এই সন্দৰ্ভত চক্ৰটোৰ সৈতে জড়িত আন ব্যক্তিক চিনাক্ত কৰাৰ বাবে অধিক তদন্ত অব্যাহত আছে।

হিন্দুস্থান সমাচাৰ / ৰমেন বৰ্মণ