ধেমাজি, ০২ এপ্ৰিল (হি.স.): ধেমাজি জিলাৰ জোনাইত আৰক্ষীৰ জালত পৰিছে এগৰাকী সূদখোৰ। কেইবাগৰাকীও ভূক্তভোগীৰ এজাহাৰৰ ভিত্তিত আটক কৰে জোনাই আৰক্ষীয়ে। উচিত শাস্তিৰ দাবীত এজেৱাইচিপিয়ে এজাহাৰ দাখিল কৰে। আটকাধীন সূদখোৰ গৰাকী ধেমাজিৰ নিবাসী তথা জোনাইৰ ৰাংকপ তিনিআলিস্থিত হ'ণ্ডা মটৰচাইকেল ডিলাৰৰ স্বত্বাধিকাৰী অমৃত মিলি বুলি জানিব পৰা গৈছে।
কেইবা বছৰ আগৰ পৰা বহু কেইগৰাকী ব্যক্তিক ৫ শতাংশ সূদৰ হাৰত চক্ৰবৃদ্ধি সূদ দি বিভিন্ন ধৰণৰ মানসিক নিৰ্যাতন সংঘটিত কৰি অহা বুলি গুৰুতৰ অভিযোগ উত্থাপিত হৈছে সূদখোৰ অমৃত মিলিৰ বিৰূদ্ধে । আনহাতে অকল ৫ শতাংশ সূদ আদায় লোৱাৰ উপৰিও সূদখোৰ অমৃত মিলিয়ে সূদ লোৱা ব্যক্তিসকলৰ পৰা জোৰ জুলুমকৈ এটিএম কাৰ্ড, বেংক চেক বুক আদি নথি পত্ৰ জব্দ কৰি ৰখাৰো গুৰুতৰ অভিযোগ উত্থাপন কৰিছে একাংশ ভোক্তভোগী তথা অসম জাতীয়তাবাদী যুৱ ছাত্ৰ পৰিষদে।
সূদখোৰ অমৃত মিলিৰ ওপৰত এনে কাৰ্যৰ প্ৰতি মানসিক চাপত পৰি সহ্য কৰিব নোৱাৰি কেইবাগৰাকী ভূক্তভোগীয়ে জোনাই থানাত এজাহাৰ দাখিল কৰাৰ পিছতে মঙ্গলবাৰে সন্ধিয়া সূদখোৰ অমৃত মিলিক আটক কৰি সোধপোচ অব্যাহত ৰাখিছে জোনাই আৰক্ষীয়ে।আনহাতে এই ঘটনাৰ পিছতে অসম জাতীয়তাবাদী যুৱ ছাত্ৰ পৰিষদে সূদখোৰৰ দৰে দুষ্কাৰ্য্য কলা ব্যৱসায়ীসকলক সমূলঞ্চে নিৰ্মূল কৰাৰ দাবীৰে সংগঠনটোৰ তৰফৰ পৰা জোনাই থানাত এক গোচৰ ৰুজু কৰি তীব্ৰ প্ৰতিক্ৰিয়া প্ৰকাশ কৰিছে সংগঠনটোৰ ধেমাজি জিলা সমিতিৰ উপদেষ্টা জ্ঞান শৰ্মাই।
হিন্দুস্থান সমাচাৰ / কিশোৰ মিশ্ৰ
