বিশ্বনাথ, ০৩ এপ্ৰিল (হি.স.): বিশ্বনাথ আৰক্ষীয়ে ব্ৰাউন চুগাৰ সহ দুজনক আটক কৰিছে। যোৱা কালি বুধবাৰে সন্ধিয়া শোণিতপুৰ আৰু বিশ্বনাথ আৰক্ষীৰ যুটীয়া অভিযানত বিহালীৰ জিনজিয়া আৰক্ষী থানাৰ অন্তৰ্গত কুঁহিয়াৰবাৰীৰ ১৫ নং ৰাষ্ট্ৰীয় ঘাইপথত ব্ৰাউন চুগাৰ সহ দুজন লোকক কৰায়ত্ত কৰিবলৈ সক্ষম হয়।

আৰক্ষীৰ গোপন সূত্ৰৰ পম খেদি তেজপুৰৰ পৰা লক্ষীমপুৰ অভিমুখে গৈ থকা যাত্ৰীবাহীৰ বাছত বিশ্বনাথ জিলাৰ অপৰাধ অনুসন্ধান শাখাৰ অতিৰিক্ত আৰক্ষী অধীক্ষক অমিত কুমাৰ হোজাই নেতৃত্বত আৰক্ষীৰ দলে তালাচী চলাই ৫৪ গ্ৰাম ব্ৰাউন চুগাৰ সহ লক্ষীমপুৰ ইছলামপুৰৰ চাব্দুক আলি আৰু ছাদিকুল ইছলামক কৰায়ত্ত কৰিবলৈ সক্ষম হয়। জব্দ কৰা ব্ৰাউন চুগাৰৰ মূল্য প্ৰায় দহ লাখ আশী হাজাৰ হ'ব বুলি আৰক্ষীয়ে জানিবলৈ দিয়ে।

হিন্দুস্থান সমাচাৰ / কিশোৰ মিশ্ৰ