গুৱাহাটী, ০২ এপ্ৰিল (হি.স.)। সকলো জল্পনা-কল্পনাৰ ওৰ পেলাই ৰাজ্যত অনুষ্ঠিত হ’বলগীয়া পঞ্চায়ত নিৰ্বাচনৰ দিন আজি বুধবাৰে ঘোষণা কৰা হয়। সেই মৰ্মে দুটা পৰ্যায়ত ক্ৰমে ২ মে’ আৰু ৭ মে’ত অনুষ্ঠিত হ’ব পঞ্চায়তৰ নিৰ্বাচন। আনহাতে ১১ মে’ত ভোটগণনা কৰা হ’ব। আজি অসম ৰাজ্যিক নিৰ্বাচন আয়ুক্ত আলোক কুমাৰে বুধবাৰে গুৱাহাটীৰ পাঞ্জাবাৰীস্থিত অসম ৰাজ্যিক নিৰ্বাচন আয়োগৰ সন্মিলন প্ৰেক্ষাগৃহত অনুষ্ঠিত এক সংবাদমেলত পঞ্চায়ত নিৰ্বাচনৰ সময়সূচী ঘোষণা কৰে।

প্ৰথম পৰ্যায়ত উজনি অসম আৰু বৰাক উপত্যকা অনুষ্ঠিত হ’ব নিৰ্বাচন। বিপৰীতে দ্বিতীয় পৰ্যায়ৰ নিৰ্বাচন অনুষ্ঠিত হ’ব নামনি অসমত। পঞ্চায়ত নিৰ্বাচনত ইভিএম ব্যৱহাৰ নহয়। বেলট পেপাৰতে অনুষ্ঠিত হ’ব নিৰ্বাচন। অৱশ্যে বিভিন্ন দিশত থাকিব অনলাইন ব্যৱস্থা। নিৰ্বাচনৰ দিনটোত ভোটিং পাৰচেণ্ট অনলাইন যোগে জানিব পাৰিব। কোন বেলট বক্স ক’ত যাব সকলোবোৰ অনলাইন ব্যৱস্থাৰ জৰিয়তে জানিব পৰা যাব। মনোনয়ন পত্ৰ দাখিল কৰা সংখ্যা প্ৰতিদিনে অনলাইনত উপলব্ধ হ’ব।

একেদৰে মনোনয়ন দাখিলৰ সময়ত দাখিল কৰা শপতনামা সকলোৱে চাব পৰা হ’ব। কেৱল গাঁও পঞ্চায়তৰ সদস্যৰ ক্ষেত্ৰত প্ৰযোজ্য নহ’ব। পঞ্চায়ত নিৰ্বাচনৰ বাবে ৩ এপ্ৰিলৰ পৰা মনোনয়ন পত্ৰ দাখিল কৰিব পাৰিব। মনোনয় পত্ৰ দাখিলৰ অন্তিম দিন ১১ এপ্ৰিল। মনোনয়ন পত্ৰ পৰীক্ষণৰ দিন ১২ এপ্ৰিল। আনহাতে মনোনয়ন পত্ৰ প্ৰত্যাহাৰৰ দিন হৈছে ১৭ এপ্ৰিল। ইফালে পঞ্চায়ত নিৰ্বাচনৰ ভোট গ্ৰহণ পুৱা ৭:৩০ বজাৰ পৰা ৩:৩০ বজালৈ অনুষ্ঠিত হ’ব । নিৰপেক্ষ আৰু শান্তিপূৰ্ণ ভোটদান নিশ্চিত কৰাৰ বাবে নিৰাপত্তা বাহিনী নিয়োগ বৃদ্ধি কৰা হ’ব। স্পৰ্শকাতৰ আৰু অতি সংবেদনশীল ভোটকেন্দ্ৰ চিনাক্ত কৰি তাত অতিৰিক্ত নিৰাপত্তা বাহিনী মোতায়েন কৰা হ’ব।

পঞ্চায়ত নিৰ্বাচনৰ ভোটগ্ৰহণৰ বাবে মুঠ ২৫ হাজাৰ ৭ টা ভোট কেন্দ্ৰ থাকিব। ১ লাখ ২৮ হাজাৰ পোলিং এজেণ্ট নিয়োগ কৰা হ’ব। ৮৮ গৰাকী নিৰ্বাচনী পৰ্যবেক্ষক নিয়োগ কৰা হ’ব। জিলা পৰিষদৰ বাবে ১০ লাখ টকা, আঞ্চলিক পঞ্চায়ৰ সদস্যই ২ লাখ ৫০ হাজাৰ টকা, গাঁও পঞ্চায়ৰ বাবে ২৫ হাজাৰ টকা ব্যয় কৰিব পাৰিব। ৰাষ্ট্ৰীয় দলৰ ২০ গৰাকী ষ্টাৰ কেম্পেইনাৰ হ’ব পাৰিব। উল্লেখ্য় যে ৰাজ্যত আছে ২০,১৯৩ গাঁও পঞ্চায়ত। আনহাতে ১৮১খন আঞ্চলিক পঞ্চায়ত আৰু ৩৯৭ খন জিলা পৰিষদৰ বাবেও নিৰ্বাচন অনুষ্ঠিত কৰা হ’ব ।

নিৰ্বাচনৰ দিন ঘোষণা কৰাৰ লগে লগে সমগ্ৰ ৰাজ্যতে আদৰ্শ আচৰণ বিধি বলবৎ হৈছে। ইয়াৰ অধীনত চৰকাৰী আঁচনিৰ ঘোষণা, চৰকাৰী সম্পদৰ অপব্যৱহাৰৰ ওপৰত নিৰীক্ষণ আৰু ৰাজনৈতিক দলৰ অপপ্ৰচাৰৰ কঠোৰ নিৰীক্ষণ আৰম্ভ হৈছে। ৰাজ্যৰ নিৰ্বাচন আয়োগে ৰাজ্যত নিকা আৰু শান্তিপূৰ্ণ নিৰ্বাচন অনুষ্ঠিত কৰাৰ বাবে কেইবাটাও গুৰুত্বপূৰ্ণ পদক্ষেপ গ্ৰহণ কৰিছে। ৰাজ্য়ত পঞ্চায়তসমূহত ১ কোটি ৮০ লাখ ৩৬ হাজাৰ ৬৮২ গৰাকী মুঠ ভোটাৰ আছে। ইয়াৰে ৯০ লাখ পুৰুষ ভোটাৰ আৰু ৮৯ লাখ মহিলা ভোটাৰ আছে। অৱশ্যে এই সংখ্যা বৃদ্ধি হোৱাৰ সম্ভাৱনা আছে বুলি জনায় ৰাজ্যিক নিৰ্বাচনী আয়োগে। আয়োগে সকলো ৰাজনৈতিক দল আৰু প্ৰাৰ্থীক আচৰণ বিধি মানি চলিবলৈ আহ্বান জনাইছে।

হিন্দুস্থান সমাচাৰ / আলোক চক্ৰৱৰ্তী