নতুন দিল্লী, ১৭ এপ্ৰিল (হি.স.)। নিউজৱিক আৰু ষ্টেটিষ্টাৰ বিশ্বৰ শ্ৰেষ্ঠ চিকিৎসালয় ২০২৪ৰ তালিকাত বিশ্বৰ ভিতৰতে ৯৭ সংখ্যক শ্ৰেষ্ঠ চিকিৎসালয় হিচাপে নিৰ্বাচিত হৈছে অল ইণ্ডিয়া ইনষ্টিটিউট অৱ মেডিকেল ছায়েন্স (এইমছ) নতুন দিল্লী।
এই সন্মানীয় স্বীকৃতি উচ্চমানৰ স্বাস্থ্যসেৱা প্ৰদান, চিকিৎসা গৱেষণাৰ উন্নতি, আৰু লাখ লাখ লোকক সুলভ মূল্যৰ চিকিৎসা প্ৰদানৰ বাবে। এই তালিকাত ভাৰতৰ আন দুখন চিকিৎসালয়কো বিশ্বব্যাপী তালিকাত স্থান দিয়া হৈছে। গুৰুগ্ৰামস্থিত মেডান্টা মেডিচিটিয়ে ১৪৬ নম্বৰ আৰু চণ্ডীগড়ৰ স্নাতকোত্তৰ চিকিৎসা শিক্ষা আৰু গৱেষণা প্ৰতিষ্ঠান (পিজিআইএমইআৰ) ২২৮ নম্বৰ স্থান লাভ কৰে।
নিউজৱিক-ষ্টেটিষ্টা ৰেংকিঙৰ ষষ্ঠ সংস্কৰণত ৰোগীৰ সন্তুষ্টি, ক্লিনিকেল ফলাফল, পৰিষ্কাৰ-পৰিচ্ছন্নতাৰ মানদণ্ড আৰু স্বাস্থ্যসেৱা পেছাদাৰীসকলৰ পৰামৰ্শৰ ভিত্তিত ৩০খন দেশৰ ২৪০০ৰো অধিক চিকিৎসালয়ৰ মূল্যায়ন কৰা হৈছিল। এইমছ দিল্লীক শীৰ্ষ ১০০ৰ ভিতৰত স্থান দিয়া হৈছে, যিয়ে ভাৰতৰ স্বাস্থ্যসেৱাৰ পৰিৱেশত আগশাৰীৰ ভূমিকাক আলোকপাত কৰিছে। এইমছ ১৯৫৬ চনত প্ৰতিষ্ঠা হোৱাৰ পৰাই অত্যাধুনিক সুবিধা আৰু উচ্চ দক্ষতাসম্পন্ন চিকিৎসা পেছাদাৰীৰ বাবে বিখ্যাত।
১৪৬ নম্বৰ স্থান, মেডান্টা - গুৰুগ্ৰামৰ মেডিচিটিয়ে কাৰ্ডিঅ'লজি, অংক'লজী আৰু অংগ প্ৰতিস্থাপনৰ দৰে বিশেষত্বৰ অত্যাধুনিক প্ৰযুক্তি আৰু বিশেষজ্ঞতাৰ বাবে স্বীকৃতি লাভ কৰিছে। ২০০৯ চনত স্থাপিত মেডান্টা ব্যক্তিগত স্বাস্থ্যসেৱাৰ ক্ষেত্ৰত এক বিশ্বাসযোগ্য নামত পৰিণত হৈছে, যিয়ে বিশ্বমানৰ সেৱা আগবঢ়াইছে। ২২৮ নম্বৰ স্থানত থকা চণ্ডীগড়ৰ স্নাতকোত্তৰ চিকিৎসা শিক্ষা আৰু গৱেষণা প্ৰতিষ্ঠান চিকিৎসা শিক্ষা, গৱেষণা আৰু বিশেষ যত্নৰ ক্ষেত্ৰত অৱদানৰ বাবে পৰিচিত। ১৯৬২ চনত স্থাপিত পিজিআইএমইআৰ উত্তৰ ভাৰতৰ এক গুৰুত্বপূৰ্ণ স্বাস্থ্যসেৱা আৰু প্ৰশিক্ষণ কেন্দ্ৰ হিচাপে পৰিচিত। এই ভাৰতীয় চিকিৎসালয়সমূহক স্বাস্থ্যসেৱাৰ ক্ষেত্ৰত বিশ্বব্যাপী প্ৰাধান্যত অন্তৰ্ভুক্ত কৰাটোৱে দেশখনৰ বিশ্বমানৰ চিকিৎসা সেৱা প্ৰদানৰ সামৰ্থ্যক উজ্জ্বল কৰি তুলিছে।
হিন্দুস্থান সমাচাৰ / মনোজ কুমাৰ শইকীয়া
