-উদ্ধাৰ কাৰ্য্যৰ বাবে গুৱাহাটীৰ পৰা ৰাওনা হৈছে এন ডি আৰ এফৰ দল
ডিমা হাচাও, ০৬ জানুৱাৰী (হি.স.)। ৰাজ্যৰ পাহাৰীয়া জিলা ডিমা হাছাওৰ উমৰাংছুত অৱস্থিত এটা কয়লা খনিত সংঘটিত হৈছে এক ভয়ংকৰ দুৰ্ঘটনা। তথ্য পোহৰলৈ আহিছে যে প্ৰায় ৩০০ ফুট দ এই কয়লা খনিত ১০ ৰ পৰা ১৫ জন শ্ৰমিক আবদ্ধ হৈ আছে। গুৱাহাটীস্থিত ১ম বেটেলিয়ন এন ডি আৰ এফৰ সূত্ৰই জনোৱা মতে, তথ্য পোৱাৰ লগে লগে এন ডি আৰ এফৰ এটা দল ঘটনাস্থলীলৈ ৰাওনা হৈছে।
ৰাজ্যখনৰ অন্যতম পাহাৰীয়া জিলা উমৰাংছু অসম-মেঘালয় সীমান্তত অৱস্থিত উদ্যোগ নগৰ নামেৰে জনাজাত। অসমৰ উমৰাংছুৰ পৰা ২৫ কিলোমিটাৰ দূৰত্বত অৱস্থিত কয়লা খনিটো। তথ্য পোহৰলৈ আহিছে যে কয়লা খনিৰ ভিতৰত পানী দ্ৰুতগতিত প্ৰৱেশ কৰাৰ বাবেই এই দুৰ্ঘটনা সংঘটিত হৈছে। জিলা প্ৰশাসনৰ লগতে অন্যান্য সাহায্য আৰু উদ্ধাৰকাৰী দল উপস্থিত হৈ সাহায্যৰ কাম আৰম্ভ কৰিছে। শেষৰ খবৰ পোৱালৈকে কয়লা খনিটোত আবদ্ধ হৈ থকা শ্ৰমিকসকলক উদ্ধাৰ কৰা সম্ভৱ হোৱা নাই। আজি পুৱা ৯ বজাত এই ঘটনা সংঘটিত হোৱা বুলি জানিব পৰা গৈছে। কয়লা খনিত আবদ্ধ শ্ৰমিকৰ উদ্ধাৰ অভিযান এতিয়াও আৰম্ভ হোৱা নাই। এনে পৰিস্থিতিত কয়লা খনিৰ ভিতৰত শ্ৰমিকৰ অৱস্থাক লৈ প্ৰশ্ন উত্থাপন হৈছে।
৩০০ ফুট দ কয়লা খনিটো দ্ৰুতগতিত পানীৰে ভৰি পৰিছে। খনিটোত প্ৰায় ১০০ ফুট পানী জমা হোৱা বুলি জানিব পৰা গৈছে, যাৰ ফলত কয়লা খনিৰ ভিতৰত কাম কৰা শ্ৰমিকসকল এতিয়াও জীয়াই আছে নে নাই সেই প্ৰশ্নৰ উত্থাপন হৈছে। শেহতীয়া তথ্য অনুসৰি অসম কয়লা খনিটোত আবদ্ধ হৈ থকা শ্ৰমিকসকলক উদ্ধাৰ কৰাটো সম্ভৱ হোৱা নাই যদিও কয়লা খনিৰ স্থবিৰ হৈ পৰা পানী মটৰ পাম্পৰ জৰিয়তে আঁতৰোৱাৰ প্ৰচেষ্টা অব্যাহত আছে।
উল্লেখযোগ্য যে মেঘালয়ৰ কয়লা খনিতো একেধৰণৰ ঘটনা সংঘটিত হৈছিল। য’ত প্ৰায় এবছৰ ধৰি সাহায্য আৰু উদ্ধাৰৰ কাম চলিছিল। য’ত নৌসেনা, এনডিআৰএফ, এছডিআৰএফ, অগ্নিনিৰ্বাপক বাহিনী, ওড়িশা অগ্নিনিৰ্বাপক বাহিনী আৰু অন্যান্য সংস্থাই অভিযান চলাইছিল। এই দুৰ্ঘটনাত ২০১৮ চনৰ ১৩ ডিচেম্বৰত মেঘালয়ৰ কাছানত ১৫ জন খনিকৰ আবদ্ধ হৈ পৰিছিল । পাঁচজন শ্ৰমিকে ওলাই আহিবলৈ সক্ষম হোৱাৰ বিপৰীতে বাকী ১০ জনৰ উদ্ধাৰৰ প্ৰচেষ্টা ২০১৯ চনৰ ২ মাৰ্চলৈকে অব্যাহত আছিল।
হিন্দুস্থান সমাচাৰ / আলোক চক্ৰৱৰ্তী
