গুৱাহাটী, ২৬ ডিচেম্বৰ (হি.স.)। ভাৰতীয় ৰে'লৱেত পোন প্ৰথমবাৰৰ বাবে উত্তৰ-পূব সীমান্ত ৰে'লৱেই এক বুজাবুজি চুক্তিৰ জৰিয়তে আইআৰচিঅ’এন আন্তঃৰাষ্ট্ৰীয় লিমিটেডৰ সৈতে কৰা এক চুক্তিৰে অভাৰহেড ইকুইপমেণ্ট (ওএইচই) আৰু পাৱাৰ চাপ্লাই ইনষ্টলেচন (পিএছআই) সহ বৈদ্যুতিকৰণ আন্তঃগাঁথনি ৰক্ষণাবেক্ষণৰ বাবে এক নতুন পদক্ষেপ আৰম্ভ কৰিছে। আজি ২৬ ডিচেম্বৰ, ২০২৪ তাৰিখে উত্তৰ-পূব সীমান্ত ৰে'লৱেৰ মহাপ্ৰৱন্ধক শ্ৰী চেতন কুমাৰ শ্ৰীবাস্তৱ আৰু আইআৰচিঅ’এনৰ মুখ্য পৰিচালন সঞ্চালকৰ শ্ৰী এইচ এম গুপ্তাৰ মাজত এই বুজাবুজি চুক্তি স্বাক্ষৰিত হয়।
আইআৰচিঅ’এন হৈছে এক প্ৰতিষ্ঠিত সংস্থা যি প্ৰত্যাহ্বানমূলক আন্তঃগাঁথনি প্ৰকল্প গ্ৰহণ কৰাৰ বাবে সুপৰিচিত, বিশেষকৈ ১৯৭৬ চনৰ পৰা ভাৰত আৰু বিদেশৰ দুৰ্গম অঞ্চলত। এই বুজাবুজি চুক্তিয়ে লামডিং আৰু তিনিচুকীয়া মণ্ডলত অভাৰহেড ইকুইপমেণ্টৰ (ওএইচই) আৰু পাৱাৰ চাপ্লাই ইনষ্টলেচনৰ (পিএছআই) ৰক্ষণাবেক্ষণ প্ৰদান কৰিব। লামডিং আৰু তিনিচুকীয়া মণ্ডলৰ বৈদ্যুতিকৰণৰ কাম দ্ৰুত গতিত আগবাঢ়িছে আৰু বেছিভাগ খণ্ডই ইতিমধ্যে বৈদ্যুতিকৰণ কৰা হৈছে আৰু বাকী থকা ৪২৫ আৰকেএম অহা বছৰৰ ২৫ জুনৰ ভিতৰত আৰম্ভ হ'ব। খণ্ডসমূহ দ্ৰুতগতিত আৰম্ভ কৰাৰ পৰিণামস্বৰূপে, বৈদ্যুতিকৰণৰ কাৰ্যসমূহৰ ৰক্ষণাবেক্ষণ বহুগুণে বৃদ্ধি পাইছে যাৰ বাবে নিৰ্ধাৰিত ৰক্ষণাবেক্ষণ আৰু ব্ৰেক ডাউন এটেনশ্বনৰ বাবে প্ৰশিক্ষিত আৰু অভিজ্ঞ ৰে'লকৰ্মীৰ প্ৰয়োজন কিয়নো বৈদ্যুতিক ট্ৰেক্সন ৰে’ল পৰিচালনৰ সৈতে পোনপটীয়াকৈ সম্পৰ্কিত হৈ আছে। উত্তৰ পূব সীমান্ত ৰেলৱেত বৈদ্যুতিকৰণৰ কাম এক নতুন পৰ্যায়ত আছে আৰু ৰে'ল কৰ্তৃপক্ষই চুক্তিৰ এক সংযোজন হিচাপে ০২ বছৰৰ বাবে খণ্ডসমূহৰ ৰক্ষণাবেক্ষণ আৰু ব্ৰেক ডাউন এটেনশ্বনৰ বাবে আইআৰচিঅ’এনক অন্তৰ্ভুক্ত কৰাৰ সিদ্ধান্ত লৈছে যি প্ৰণালীবদ্ধ ৰক্ষণাবেক্ষণৰ দিশত এক দৃষ্টান্তমূলক পদক্ষেপ হিচাপে পৰিগণিত হৈছে।
বৈদ্যুতিকৰণৰ আন্তঃগাঁথনি ব্যৱস্থাপনাত শেহতীয়া প্ৰযুক্তি আৰু দক্ষতা প্ৰাপ্ত কৰাৰ বাবে এই বুজাবুজি চুক্তিখনে উত্তৰ পূব সীমান্ত ৰেলৱেৰ বাবে জ্ঞান বিনিময় আৰু উৎকৃষ্ট প্ৰযুক্তিবিদ্যাৰ সৈতে জড়িত হ'বলৈ এক মঞ্চ হিচাপে কাম কৰিব।
হিন্দুস্থান সমাচাৰ / অৰৱিন্দ
