-সেনা আৰু বায়ুসেনাকউদ্ধাৰ অভিযানৰ বাবে প্ৰস্তুতিৰ আহ্বান জনায়
গুৱাহাটী, ২০ জুলাই (হি.স.)। অসমৰ বান পৰিস্থিতি যোৱা দেওবাৰৰ পৰা অধিক ভয়াৱহ হৈ পৰাত ৰাজ্যৰ ৭খন জিলাৰ ৫৭ হাজাৰৰো অধিক লোকৰ ক্ষতিগ্ৰস্ত হৈছে আৰু এজন লোকৰ মৃত্যু হৈছে । ইয়াৰ পিছতে ৰাজ্য চৰকাৰে ভাৰতীয় সেনা আৰু ভাৰতীয় বায়ুসেনাক স্থানান্তৰ আৰু উদ্ধাৰ অভিযানৰ বাবে সাজু হৈ থাকিবলৈ কৈছে।
অসম ৰাজ্যিক দুৰ্যোগ ব্যৱস্থাপনা প্ৰাধিকৰণৰ তথ্য অনুসৰি শিৱসাগৰত বানপানীৰ ফলত এজন লোকৰ মৃত্যু হোৱাৰ লগে লগে এইবাৰ বানপানীৰ ফলত মৃত্যু হোৱা লোকৰ সংখ্যা ৫জনলৈ বৃদ্ধি পাইছে। এ এছ ডি এম এৰ শেহতীয়া বান বুলেটিন অনুসৰি চৰাইদেউ, ধেমাজি, ডিব্ৰুগড়, যোৰহাট, শিৱসাগৰ, তিনিচুকীয়া, আৰু উদালগুৰি জিলাত ৫৭,১০০ৰো অধিক লোক ক্ষতিগ্ৰস্ত হৈছে। শনিবাৰে চাৰিখন জিলাত প্ৰায় ২৪ হাজাৰ লোক আক্ৰান্ত হৈছিল আৰু এতিয়া এই সংখ্যা দুগুণতকৈও অধিক বৃদ্ধি পাইছে।
চৰাইদেও আটাইতকৈ বেছি ক্ষতিগ্ৰস্ত জিলা, প্ৰায় ২৪ হাজাৰ লোক আক্ৰান্ত হৈছে । ইয়াৰ পিছতে ধেমাজিত ২২ হাজাৰৰো অধিক লোক আৰু ডিব্ৰুগড়ত ৪ হাজাৰৰো অধিক লোক বানপানীৰ ফলত ক্ষতিগ্ৰস্ত হৈছে।
মুখ্যমন্ত্রী ড০ হিমন্ত বিশ্ব শর্মাই কয় যে শিৱসাগৰ, চৰাইদেউ, যোৰহাটৰ বান পৰিস্থিতি অব্যাহত থকাৰ বাবে ৰাজ্য চৰকাৰে সেনা আৰু বায়ুসেনাক সাজু হৈ থাকিবলৈ কয় ৷ মুখ্যমন্ত্ৰী ড০ শৰ্মাই ছ’চিয়েল মিডিয়া প্লেটফৰ্ম ‘এক্স’ত এক পোষ্টযোগে কয় যে শিৱসাগৰ, চৰাইদেউ আৰু যোৰহাটৰ বান পৰিস্থিতি অধিক ভয়াৱহ হোৱাৰ লগে লগে অসম চৰকাৰে ভাৰতীয় সেনা আৰু ভাৰতীয় বায়ুসেনাক প্ৰয়োজন হ’লে খালী আৰু উদ্ধাৰ অভিযানত সহায় কৰিবলৈ ষ্টেণ্ডবাইত থাকিবলৈ অনুৰোধ জনাইছে ।
ইয়াৰ উপৰি মুখ্যমন্ত্রীয়ে চাৰিগৰাকী কেবিনেট মন্ত্রী- অজন্তা নেওগ, বিমল বৰা, কেশৱ মহন্ত, আৰু সুশান্ত বুঢ়াগোহাঁইক ততাতৈয়াকৈ ক্ষতিগ্রস্ত জিলাসমূহ পৰিদর্শন কৰি উদ্ধাৰ আৰু সাহায্য অভিযান নিৰীক্ষণ কৰাৰ লগতে ক্ষতিগ্রস্ত প্রতিটো পৰিয়ালে যাতে সময়মতে সাহায্য লাভ কৰে তাৰ বাবে নির্দেশ দিয়ে ৷
ড° শৰ্মাই কয়, আমাৰ জনসাধাৰণৰ সুৰক্ষা আৰু মংগল আমাৰ শীৰ্ষ অগ্ৰাধিকাৰ। মই ২৪ ঘণ্টাই পৰিস্থিতি নিৰীক্ষণ কৰি আছো, আৰু আমি জীৱন ৰক্ষাৰ বাবে সকলো প্ৰয়োজনীয় পদক্ষেপ গ্ৰহণ কৰিম আৰু সকলো ধৰণৰ সকাহ প্ৰদান কৰিম । এ এছ ডি এম এৰ বাতৰি অনুসৰি প্ৰশাসনে চাৰিখন জিলাত ১৪টা সাহায্য শিবিৰ আৰু সাহায্য বিতৰণ কেন্দ্ৰ পৰিচালনা কৰি আছে, য’ত বৰ্তমান ৪৪০ জন স্থানচ্যুত লোকে আশ্ৰয় লৈ আছে।
ৰাজ্যিক দুৰ্যোগ সঁহাৰি বাহিনীৰ জোৱানে দেওবাৰে দিনটোৰ ভিতৰত চৰাইদেউৰ বিভিন্ন অঞ্চলৰ পৰা ১০ জন লোকক উদ্ধাৰ কৰে। যোৱা ২৪ ঘন্টাত বিতৰণ কৰা সাহায্য সামগ্ৰীৰ ভিতৰত আছে ৫৮.১৭ কুইণ্টল চাউল, ১০.৮৯ কুইণ্টল দালি, ৩.২৬ কুইণ্টল নিমখ, আৰু ৩২৬.৮৮ লিটাৰ সৰিয়হ তেল।
ৰাজ্যৰ ২৯৮খন গাঁও ডুব যোৱাৰ লগতে ৩,৮৭৪.৮৪ হেক্টৰ কৃষিভূমিৰ ক্ষতিসাধন হৈছে। বানপানীৰ ফলত কেইবাখনো জিলাৰ মথাউৰি, পথ, দলং, অন্যান্য আন্তঃগাঁথনিও ক্ষতিগ্ৰস্ত হৈছে।
ডিব্ৰুগড় জিলাৰ খোৱাং অঞ্চলৰ চেনিমাৰীৰ সমীপত বুঢ়ীদিহিং নদী বিপদৰ চিহ্নৰ ওপৰেৰে বৈ যোৱাৰ বিপৰীতে ৩৭,৫০০ৰো অধিক ঘৰচীয়া জীৱ-জন্তু আৰু হাঁহ-কুকুৰাও বানত ক্ষতিগ্ৰস্ত হৈছে ।
হিন্দুস্থান সমাচাৰ / অৰৱিন্দ
