ইটানগৰ, ১৬ জুলাই (হি.স.)। ৰাজ্যৰ ২০২৬-২৭ বিত্তীয় বর্ষৰ বাজেটত ঘোষণা কৰা মূল প্রস্তাৱ সমূহৰ সময়োপযোগী আৰু ফলপ্ৰসূ ৰূপায়ণক অগ্ৰাধিকাৰ দিবলৈ অৰুণাচল প্ৰদেশৰ উপ-মুখ্যমন্ত্ৰী চৌনা মেইনে সকলো চৰকাৰী বিভাগকে নিৰ্দেশ দিছে।
বৃহস্পতিবাৰে এখন পৰ্যালোচনা বৈঠকৰ অধ্যক্ষতা কৰি বিত্ত বিভাগৰো দায়িত্ব পালন কৰা মেইনে বিভিন্ন বাজেট ঘোষণা আৰু বিভাগ সমূহত চলি থকা প্ৰকল্প সমূহৰ অগ্ৰগতিৰ পৰ্যালোচনা কৰে। মুখ্যমন্ত্ৰীৰ গ্ৰামোন্নয়ন কাৰ্যসূচী আৰু মুখ্যমন্ত্ৰীৰ সৰ্বাংগীন শক্তি উন্নয়ন কাৰ্যসূচী আদি মূল পদক্ষেপ সমূহৰ ৰূপায়ণ ত্বৰান্বিত কৰাৰ প্ৰয়োজনীয়তাৰ ওপৰত তেওঁ গুৰুত্ব আৰোপ কৰে।
এটা ছ’চিয়েল মিডিয়া পোষ্টত উপ-মুখ্যমন্ত্ৰীয়ে কয় যে সমগ্ৰ ৰাজ্যতে সুষম আৰু সৰ্বাংগীন উন্নয়ন সুনিশ্চিত কৰিবলৈ শিক্ষা, স্বাস্থ্যসেৱা, খোৱাপানী যোগান, শাৰীৰিক সংযোগ, দক্ষতা বিকাশ আদি গুৰুত্বপূৰ্ণ খণ্ডসমূহে সমান মনোযোগ লাভ কৰিব লাগে।
মেইনে বিভাগীয় মুৰব্বীসকলক প্ৰকল্পসমূহ সুচাৰুৰূপে ৰূপায়ণৰ বাবে য’তেই প্ৰয়োজন হয়, সংশোধিত নিৰ্দেশনা দাখিল কৰিবলৈ আৰু অতিৰিক্ত ধনৰ যিকোনো প্ৰয়োজনীয়তাৰ বিষয়ে অতি সোনকালে অৱগত কৰিবলৈও নিৰ্দেশ দিয়ে।
ইয়াৰ পূৰ্বে অৰুণাচল প্ৰদেশ চৰকাৰে আন্তঃগাঁথনি শক্তিশালী কৰা, শাসন ব্যৱস্থাৰ উন্নতি আৰু জনকেন্দ্ৰিক উন্নয়নৰ ওপৰত গুৰুত্ব আৰোপ কৰি ২০২৬-২৭ বৰ্ষৰ বাবে ৩৬,৬০৭ কোটি টকাৰ বাজেট দাখিল কৰিছিল।
হিন্দুস্থান সমাচাৰ / অৰৱিন্দ
