গুৱাহাটী, ০৮ জানুৱাৰী (হি.স.)। উত্তৰ-পূব সীমান্ত ৰেলৱেই গুৱাহাটী কোচিং ডিপ’ৰ ছিক লাইন আৰু পিট লাইনত অত্যাধুনিক ফ্লুক আইআই৯০৫ একোষ্টিক প্ৰযুক্তিৰ ব্যৱহাৰ কৰি এয়াৰ ব্ৰেক আৰু নিউমেটিক চিষ্টেমৰ লিকেজৰ চিনাক্তকৰণৰ দ্বাৰা ডবাসমূহৰ সুৰক্ষা বৃদ্ধি কৰিছে।
এই একোষ্টিক ইমেজাৰ ডিভি লিকেজ, এয়াৰ বেল’ লিকেজ আৰু এয়াৰ ব্ৰেক পাইপ লিকেজৰ দ্ৰুত আৰু দৃশ্যমান চিনাক্তকৰণৰ বাবে ব্যৱহাৰ কৰা হৈছে। এই প্ৰযুক্তিয়ে দৃশ্যমান ছবিৰ ওপৰত অভাৰলে কৰা এক একোষ্টিক চাউণ্ড মেপৰ জৰিয়তে কমপ্ৰেছড এয়াৰ আৰু গেছৰ লিকেজৰ সঠিকভাৱে চিনাক্তকৰণ সম্ভৱ কৰে, যিয়ে নিৰ্ভুল, সুৰক্ষিত আৰু উপযুক্ত ডায়াগনচিচ নিশ্চিত কৰে। এই পদক্ষেপে এয়াৰ ব্ৰেক লিকেজ চিনাক্তকৰণৰ নিৰ্ভৰযোগ্যতা যথেষ্ট উন্নত কৰে, ডায়ানগচিচৰ সময় হ্ৰাস কৰে আৰু সময়মতে সংশোধনত সহায় কৰে, যাৰ ফলত পৰিচালন দক্ষতা বৃদ্ধি পায়। এই প্ৰযুক্তিৰ ফলপ্ৰসূ ব্যৱহাৰ নিশ্চিত কৰিবলৈ গুৱাহাটী কোচিং ডিপ’ত পিট লাইনৰ ষ্টাফক কম্পিউটাৰাইজড আৰটিআৰ মেচিনৰ পৰিচালন আৰু অত্যাধুনিক ডায়াগনচিচ সা-সঁজুলিৰ ব্যৱহাৰৰ প্ৰশিক্ষণ প্ৰদান কৰা হৈছে।
ইয়াৰ উপৰিও, ছিক লাইন/গুৱাহাটীয়ে “ৱানডে ৱান কোচ–ইনটেনচিভ” পদক্ষেপ গ্ৰহণ কৰিছে, যাৰ অধীনত প্ৰতিদিনে এটা ডবাক সম্পূৰ্ণ মেৰামতিৰ বাবে গ্ৰহণ কৰা হয়। এই কামসমূহৰ ভিতৰত বহিৰ্ভাগৰ পেইন্টিং, যাত্ৰী সুবিধাৰ ফিটমেণ্ট, বাৰ্থৰ ৰেক্সিন সলনি কৰা, লিনেন ষ্ট’ৰেজ মেৰামতি, শৌচাগাৰত নতুন ইপিপিএফ চিলিণ্ডাৰ স্থাপন, নতুন ডাষ্টবিন আৰু চাইড মিৰ’ৰ প্ৰদান আদি অন্তৰ্ভুক্ত আছে। এই পদক্ষেপৰ অধীনত এতিয়ালৈকে তিনিটা ডবাৰ মেৰামতি সম্পূৰ্ণ কৰা হৈছে।
এই ব্যৱস্থাসমূহে উত্তৰ-পূব সীমান্ত ৰেলৱেৰ যাত্ৰী সুৰক্ষা, গুণগত ৰক্ষণাবেক্ষণ আৰু আধুনিক প্ৰযুক্তিৰে ধাৰাবাহিক উন্নয়নৰ প্ৰতি ইয়াৰ প্ৰতিশ্ৰুতিকে পুনৰ নিশ্চিতকৰণ কৰিছে।
হিন্দুস্থান সমাচাৰ / অৰৱিন্দ
