নগাও,১৩ ডিচেম্বৰ (হি.স.)। মুকলিৰ পূৰ্বেই পৰিত্যক্ত ৰূপ ধাৰণ কৰিছে কলিয়াবৰৰ শিলঘাটত নিৰ্মিত জলসম্পদ বিভাগৰ এটা কোটি টকীয়া ভৱন। বিভাগীয় অমনোযোগিতাত হাবি-জংঘলৰে ভৰি পৰিত্যক্ত ৰূপ লৈছে জলসম্পদ বিভাগৰ এই অত্যাধুনিক ভৱনটো। প্ৰায় ৬ বছৰ পূৰ্বেই মন্ত্ৰী কেশৱ মহন্ত জলসম্পদ বিভাগৰ দায়িত্বত থকাৰ সময়তে প্ৰায় ডেৰ কোটি টকাৰ ব্যয় সাপেক্ষে নিৰ্মাণ কৰা হৈছিল জলসম্পদ বিভাগৰ এই পৰিদৰ্শন ভৱন তথা অতিথিশালাটো।

৩ বছৰ পূৰ্বেই ভৱনটোৰ নিৰ্মাণ কাৰ্য সম্পূৰ্ণ হৈছিল যদিও আজিলৈকে ভৱনটো মুকলি নোহোৱাত এতিয়া হাবি-জংঘলৰে ভৰি পৰি মুকলিৰ পূৰ্বেই পৰিত্যক্ত হৈ পৰিছে। এনদৰে গে'টত তলা লগাই দায়িত্ব সামৰিছে বিভাগীয় কৰ্মচাৰীয়ে। ফলত এতিয়া সাপ-বেঙৰ আৱাসস্থলীত পৰিণত হৈছে জলসম্পদ বিভাগৰ এই ডেৰ কোটিটকীয়া ভৱনটো।

হিন্দুস্থান সমাচাৰ / প্ৰকাশ ডেকা