কোকৰাঝাৰ, ০২ অক্টোবৰ (হি.স.)। মহাপুৰুষ শ্ৰীমন্ত শঙ্কৰদেৱৰ ৫৭৬তম জন্মোৎসৱ গোসাঁইগাঁও শাখা সত্ৰত উদযাপন কৰা হয়। অনুষ্ঠানটো ১ অক্টোবৰ, ২০২৫ তাৰিখে সত্ৰ পৰিসৰৰ পৰিষ্কাৰ অভিযানৰ সৈতে আৰম্ভ হয়। পিছত প্ৰাতঃ প্ৰাৰ্থনা, নাম প্ৰসংগ আৰু থিয় নাম অনুষ্ঠিত হয়, মিলনজ্যোতি নাগৰা নামদল, শিমলাবাৰীৰ ভকতৰ নেতৃত্বত আয়োজিত হয়।
কাৰ্যসূচীত প্ৰভাত ফেৰি, পুৱাৰ গান আৰু প্ৰাতঃ প্ৰসংগ অনুষ্ঠিত হয়, য’ত গোসাঁইগাঁও শাখা সত্ৰৰ নামতী সকল অংশ লয়। মহিলা ভক্তা সকলৰ দল—প্ৰভা দাস, মোক্ষ্যদা ডেকা আৰু বালিকা দাসৰ নেতৃত্বত অংশগ্ৰহণ কৰে। পুৱা ৯ বজাত ধৰ্মধ্বজা উত্তোলন কৰে গোসাঁইগাঁও শ্ৰীমন্ত শঙ্কৰদেৱ শাখা সত্ৰৰ সভাপতি শ্ৰী পদ্মধৰ দাসে। পুৱা ১০.৪৫ বজাত গোসাঁইগাঁও থানাৰ ভাৰপ্ৰাপ্ত বিষয়া শ্ৰী চন্দন গোস্বামীয়ে সত্ৰ পৰিসৰত গছৰ পুলি ৰোপন কৰে।
তেওঁৰ ভাষণত গছ-পুলি ৰোপণৰ গুৰুত্ব বুজাই দিয়ে আৰু কয় যে পৰিবেশীয় ক্ষয় ক্ষতিৰ পৰা মুক্ত হোৱাৰ বাবে ৫৫০ বছৰৰ পূৰ্বেই মহাপুৰুষ শ্ৰীমন্ত শঙ্কৰদেৱে ধাৰণাটো প্ৰতিপন্ন কৰিছিল। লগতে তেওঁ সত্ৰৰ সমিতি সদস্য সকলক ধন্যবাদ জ্ঞাপন কৰে।
পুৱা ১১ বজাৰ পৰা ভাগৱত যাত্ৰা আয়োজিত হয়। গোসাঁইগাঁও শাখা সত্ৰৰ সম্পাদক ধৰণীধৰ পাঠকে মূৰত ভগৱত লৈ যাত্ৰা আৰম্ভ কৰে। যাত্ৰাটো গোসাঁইগাঁও চহৰ পৰিক্ৰমা কৰে আৰু প্ৰায় তিনিশ জন লোকে অংশগ্ৰহণ কৰে। ফকিৰাগ্রামৰ ওচৰৰ বালিয়া বাথানৰ মহিলা নামতী দলে থিয় নাম প্ৰদৰ্শন কৰে। মিলনজ্যোতি নাগৰা নামদল, শিমলাবাৰী ভকতৰ নেতৃত্বত নাগৰা নাম প্ৰদৰ্শন কৰা হয়। আইকন জুবীন গাৰ্গৰ আকস্মিক মৃত্যুজনিত কাৰণে এইবাৰ কোনো সাংস্কৃতিক অনুষ্ঠান বা মুক্ত ধৰ্মীয় সভা অনুষ্ঠিত কৰা নহ’ল।
হিন্দুস্থান সমাচাৰ / কিশোৰ মিশ্ৰ
