নিউয়ৰ্ক, ১২ ছেপ্টেম্বৰ (হি.স.)। আমেৰিকাৰ ৱাইল্ডকাৰ্ড যুটি এছলিন ক্ৰুগাৰ আৰু ৰবিন মণ্টগোমেৰীক পৰাস্ত কৰি শীৰ্ষ বাচনিৰ কেটেৰিনা চিনিয়াকোভা আৰু টেইলৰ টাউনচেণ্ডে শুকুৰবাৰে ইউ এছ অ’পেন মহিলা ডাবলছৰ খিতাপ দখল কৰে। ছিনিয়াকোভা আৰু টাউনচেণ্ডে ফাইনেলত ৫-৭, ৬-০, ৬-২ ব্যৱধানত জয়লাভ কৰি দল হিচাপে কেৰিয়াৰ গ্ৰেণ্ড শ্লেম সম্পূৰ্ণ কৰে।

এই জয়ৰ লগে লগে চিনিয়াকোভাৰ গ্ৰেণ্ড শ্লেম মহিলা ডাবলছৰ খিতাপ ১২ টা হয়গৈ। তেওঁ দুগৰাকী ভিন্ন খেলুৱৈৰ সৈতে কেৰিয়াৰ গ্ৰেণ্ড শ্লেম সম্পূৰ্ণ কৰা প্ৰথমগৰাকী খেলুৱৈ হিচাপে পৰিগণিত হয়। ইয়াৰ পূৰ্বে তেওঁ দেশবাসী বাৰ্বৰা ক্ৰেজচিকোভাৰ সৈতে এই কৃতিত্ব অৰ্জন কৰিছিল।

ইয়াৰ উপৰিও টাউনচেণ্ডে মহিলা ডাবলছত কেৰিয়াৰ গ্ৰেণ্ড শ্লেম সম্পূৰ্ণ কৰা বৰ্তমানৰ ষষ্ঠগৰাকী খেলুৱৈ হিচাপে পৰিগণিত হয়। ২০২৪ চনত উইম্বলডনত মহিলা ডাবলছৰ খিতাপ, ২০২৫ চনত অষ্ট্ৰেলিয়ান অ’পেন আৰু এইবাৰৰ ফ্ৰেঞ্চ অ’পেনত চিনিয়াকোভা আৰু টাউনচেণ্ডেও জয়লাভ কৰে।

ফাইনেলত ছিনিয়াকোভা আৰু টাউনচেণ্ডে লেহেমীয়া আৰম্ভণি কৰে আৰু প্ৰথম ছেটত ৫-৭ ব্যৱধানত পৰাস্ত হয়। অৱশ্যে দ্বিতীয় ছেটত তেওঁলোকে উল্লেখযোগ্য প্ৰত্যাৱৰ্তন ঘটায়। উদ্বোধনী খেলখনত ৪০-৩০ ব্যৱধানত পিছ পৰি থকাৰ পাছত পৰৱৰ্তী ২৭ পইণ্টৰ ভিতৰত ২৩ পইণ্ট লাভ কৰি দ্বিতীয়টো ছেট ৬-০ ব্যৱধানত জয়ী হৈ মেচখন নিৰ্ণায়ক ছেটত সোমাবলৈ বাধ্য হয়।

নিৰ্ণায়ক ছেটটোত শীৰ্ষস্থানীয় যুটিটোৱে আগতীয়াকৈ বিৰতি লাভ কৰে আৰু ছিনিয়াকোভাই এটা পইণ্ট হেৰুৱাই চাৰ্ভ ধৰি ৰাখি ৩-১ ব্যৱধানত অগ্ৰগতি লাভ কৰে। ইয়াৰ পিছতে টাউনচেণ্ডে চাৰি পইণ্টৰ চাৰ্ভিচ গেমত জয়লাভ কৰি নিজৰ অগ্ৰগতি ৪-২ লৈ বৃদ্ধি কৰে। অৱশেষত ৬-২ ব্যৱধানত নিৰ্ণায়ক ছেটটো জয় কৰি খিতাপ দখল কৰে।

প্ৰথম ছেটত ছিনিয়াকোভা আৰু টাউনচেণ্ডে একেৰাহে ১৩ পইণ্ট লাভ কৰি ৪-৪ ব্যৱধানত সমতা স্থাপন কৰে। ইয়াৰ পিছত চিনিয়াকোভাই টাইব্ৰেক জোৰ কৰিবলৈ চেষ্টা কৰাৰ সময়ত তিনিটা ডাবল ফল্ট চাৰ্ভ আউট কৰে, য’ত ছেট পইণ্টত ডাবল ফল্টও আছিল।

ট্ৰফী অনুষ্ঠানত চিনিয়াকোভাই কয়, মই অতি নাৰ্ভাছ আছিলো, ইমানবোৰ ফাইনেল খেলিছিলো, কিন্তু শেষত আমি ইয়াক টানি আনিবলৈ সক্ষম হৈছিলো। আমাৰ যুঁজখন আৰু আমাৰ সম্পৰ্কক লৈ মই ইমানেই গৌৰৱান্বিত। মোৰ লগত থিয় দিয়াৰ বাবে ধন্যবাদ। মই আশা কৰিছো যে এইটো শেষ নহয় আৰু আমাৰ আৰু ফাইনেল আহিব।

টাউনচেণ্ডে কয়, “এজন প্ৰাপ্তবয়স্ক খেলুৱৈ হিচাপে ইয়ালৈ আহি জয়ী হোৱা, আৰ্থাৰ এশ্বে ষ্টেডিয়ামত খেলা আৰু এই ট্ৰফীটো তুলি লোৱাটো মোৰ বাবে অবিশ্বাস্যভাৱে বিশেষ, কাৰণ মই কি কষ্টৰ মাজেৰে পাৰ হৈছো পাহৰি নাযাওঁ।”

হিন্দুস্থান সমাচাৰ / মনোজ কুমাৰ শইকীয়া