গাজা চহৰ/ৰমাল্লাহ, ৩১ জুলাই (হি.স.): সন্ত্ৰাসবাদী সংগঠন হামাছে নিজৰ অস্ত্ৰ আত্মসমৰ্পণ কৰিবলৈ সন্মত হোৱাৰ পিছতো গাজা পট্টীত আৰু ৱেষ্ট বেংকৰ পৰিস্থিতি উত্তেজিত হৈ আছে। শেহতীয়াকৈ গাজা পট্টীত ইজৰাইলৰ প্ৰতিৰক্ষা বাহিনীৰ আক্ৰমণত তিনিজন পেলেষ্টাইনী নিহত হৈছে। নিহতসকলৰ ভিতৰত আছে দুটা শিশু। সমগ্ৰ ৱেষ্ট বেংকত আতংকই বিৰাজ কৰিছে। ইজৰাইলী দখল কৰা ভূখণ্ডত ইজৰাইলৰ সামৰিক সুৰক্ষাৰ অধীনত থকা গাঁওসমূহত লোকসকলে অভিযান চলাই আছে। ইজৰাইলৰ সেনাই প্ৰতিবাদ কৰা নিৰীহ লোকৰ ওপৰত কন্দুৱা গেছ নিক্ষেপ কৰা বুলি দাবী কৰিছে পেলেষ্টাইনৰ ৰেড ক্ৰীচেণ্টে।

দ্য পেলেষ্টাইন ক্ৰনিকল আৰু কুডছ নিউজ নেটৱৰ্কে এক্সত প্ৰকাশ কৰা এক সচিত্ৰ প্ৰতিবেদন অনুসৰি গাজা পট্টীত ইজৰাইলী আক্ৰমণ নিশাটোৰ ভিতৰতে অব্যাহত আছিল। ক্ষেপণাস্ত্ৰ আৰু ড্ৰোন আক্ৰমণত দক্ষিণ গাজাত তিনিজন পেলেষ্টাইনী সাধাৰণ নাগৰিক নিহত হোৱাৰ লগতে কেইবাজনো আহত হয়। নিহতসকলৰ ভিতৰত আছে দুটা শিশু। এই আক্ৰমণত ৰাজধানী গাজা চহৰৰ লগতে খান ইউনিছৰ সাধাৰণ নাগৰিক আহত হয়। গাজাৰ বিষয়াসকলে জনোৱা মতে, ২০২৫ চনৰ ১১ অক্টোবৰৰ পৰা ইজৰাইলৰ আক্ৰমণত ১২০৯ জন পেলেষ্টাইনী নিহত হৈছে।

বিষয়াসকলৰ মতে, মধ্য গাজা চহৰৰ আল-বুৰেইজ পৌৰসভাৰ বিপৰীতে থকা এটা আৱাসিক এপাৰ্টমেণ্ট বিল্ডিঙত ইজৰাইলৰ আক্ৰমণত নিহত হয় জাইদ মহম্মদ নৌফাল। ইজৰাইলৰ বোমা বিস্ফোৰণত পশ্চিম খান ইউনিছৰ কলেজ এলেকাৰ সমীপৰ এটা তম্বুত ২০ বছৰীয়া আব্দুল্লা নাছেৰ আল বালাৱী আৰু আঠ বছৰীয়া ৰাটেল মাহমুদ আব্দুল্লাও নিহত হয়। ইজৰাইলৰ যুদ্ধ বিমানেও গাজা চহৰৰ পশ্চিমে থকা আলশাটি শৰণাৰ্থী শিবিৰতো আঘাত হানে। বিষয়াসকলে জনোৱা মতে, আল-আহলী বেপ্টিষ্ট হাস্পতালৰ বিপৰীতে থকা আল-আলামী বাণিজ্যিক ভৱনৰ এটা এপাৰ্টমেণ্টক লক্ষ্য কৰি ইজৰাইলৰ বিমানে ব্যাপক অগ্নিকাণ্ড সংঘটিত কৰে।

চৰকাৰী তথ্য অনুসৰি ইজৰাইলৰ ধাৰাবাহিক আক্ৰমণৰ ফলত গাজাত মৃত্যু হোৱা লোকৰ সংখ্যা ৭৩,৩৩৫ লৈ বৃদ্ধি পাইছে। আন ১ লাখ ৭৪ হাজাৰ ৫২ জন লোক আহত হৈছে। স্বাস্থ্য মন্ত্ৰালয়ে প্ৰকাশ কৰা অনুসৰি ২০২৫ চনৰ ১১ অক্টোবৰৰ পৰা যুদ্ধবিৰতি চুক্তি কাৰ্যকৰী হোৱাৰ পিছৰে পৰা ইজৰাইল সেনাই গাজা ষ্ট্ৰিপত ১২০৯ জন পেলেষ্টাইনীক হত্যা কৰাৰ লগতে ৩৯৪৩ জন লোক আহত কৰিছে। পূৰ্বতে যুদ্ধৰ বাবে দুৰ্গম অঞ্চলৰ পৰা উদ্ধাৰ কৰিছে উদ্ধাৰকাৰী দলে ৮০৩জন পেলেষ্টাইনী লোকৰ মৃতদেহ। স্বাস্থ্য বিষয়া আৰু মানৱীয় সংস্থাসমূহে দাবী কৰিছে যে গাজা ষ্ট্ৰিপৰ প্ৰায় ৯০ শতাংশ আন্তঃগাঁথনি ধ্বংস হৈছে। এই আক্ৰমণৰ ফলত প্ৰায় ২০ লাখ পেলেষ্টাইনী লোকক স্থানচ্যুত কৰা হৈছে।

ইফালে ৱেষ্ট বেংকৰ পৰিস্থিতি অধিক অৱনতি ঘটিছে। ইজৰাইলৰ দখলদাৰী গোটে তাত থকা গাঁওসমূহত অভিযান চলাইছে, ইজৰাইলী সেনাই সুৰক্ষিত কৰিছে। এই লোকসকলে উত্তৰ ৱেষ্ট বেংকৰত অৱস্থিত নাবলুছৰ পশ্চিম উপকণ্ঠ অঞ্চলত পেলেষ্টাইনীসকলৰ ঘৰত আক্ৰমণ চলাইছে। ইজৰাইলৰ বাহিনীয়ে নাবলুছৰ পশ্চিমে থকা আল-জুনেইদ গাঁৱত কন্দুৱা গেছৰ গুলী নিক্ষেপ কৰে। চাৰিটা শিশুকো এই গোলাবোৰে আঘাত কৰে। ইজৰাইলৰ সৈন্যই টেল গাঁৱত অভিযান চলায়। ইজৰাইলৰ সশস্ত্ৰ সংগঠনে নাবলুছৰ দক্ষিণে থকা বুৰিন গাঁৱত জলপান গছত জুই লগাই দিয়ে।

মন কৰিবলগীয়া যে গাজা পট্টী আৰু ৱেষ্ট বেংক দুয়োটা পেলেষ্টাইনৰ ভূখণ্ড যদিও ইয়াৰ মাজত পাৰ্থক্য আছে। গাজা পট্টীৰ ভূমধ্য সাগৰৰ ওচৰৰ সৰু, উপকূলীয় আৰু ঘন জনবসতিপূৰ্ণ অঞ্চল। ৱেষ্ট বেংকৰ অঞ্চলটো বৃহৎ। গাজা পট্টী প্ৰায় ৪১ কিলোমিটাৰ দীঘল উপকূলীয় অঞ্চল। ইয়াৰ পশ্চিমে ভূমধ্য সাগৰ, দক্ষিণ-পশ্চিমে মিচৰ আৰু উত্তৰ আৰু পূবে ইস্ৰায়েলৰ সীমা আছে। ৱেষ্ট বেংক জৰ্ডান নদীৰ পশ্চিম পাৰত অৱস্থিত এক বৃহৎ ভূ-পথ আৱদ্ধ অঞ্চল। ইয়াৰ পূবে জৰ্দান আৰু মৃত সাগৰ আৰু বাকী ফালে ইজৰাইলৰ সীমা আছে। ২০০৭ চনৰ পৰা গাজা পট্টীৰ ওপৰত হামাছৰ ৰাজনৈতিক আৰু প্ৰশাসনিক নিয়ন্ত্ৰণ আছে। ৱেষ্ট বেংক পেলেষ্টাইন কৰ্তৃপক্ষৰ দ্বাৰা পৰিচালিত হয় আৰু ইয়াত ইজৰাইলী বসতিও আছে।

হিন্দুস্থান সমাচাৰ / মনোজ কুমাৰ শইকীয়া