কলকাতা, ১৯ জুলাই (হি.স.)। পশ্চিম বংগৰ কলকাতাত থকা ৰাষ্ট্ৰীয় পুথিভঁৰাল পৰিসৰত দেওবাৰে কেন্দ্ৰীয় গৃহ আৰু সমবায় মন্ত্ৰী অমিত শ্বাহে ভাৰতৰ প্ৰথমটো ‘শব্দ সংগ্ৰহালয়’ উদ্বোধন কৰে। কেন্দ্ৰীয় সাংস্কৃতিক মন্ত্ৰালয়ৰ অধীনস্থ ৰাষ্ট্ৰীয় পুথিভঁৰালৰ দ্বাৰা বিকশিত এই সংগ্ৰহালয়ে আধুনিক প্ৰযুক্তিৰ জৰিয়তে দেশৰ ভাষিক ঐতিহ্য, লিপি, সাহিত্য পৰম্পৰাক জীৱন্ত কৰি তুলিছে।

উদ্বোধনী অনুষ্ঠানত ভাষণ দি অমিত শ্বাহে কয় যে এখন দেশৰ ভাষা হৈছে ইয়াৰ সংস্কৃতি, ইতিহাস, ঐতিহ্যৰ পৰিচয়। তেওঁ কয় যে ভাষাৰ সহায়ত এটা জাতিৰ সভ্যতা আৰু তাৰ জীৱন মূল্যবোধ বুজিব পাৰি। তেওঁ ছাত্ৰ-ছাত্ৰীসকলক মাতৃভাষাৰ উপৰিও অন্ততঃ আন এটা ভাৰতীয় ভাষা শিকিবলৈ আহ্বান জনাই কয় যে ইয়াৰ দ্বাৰা ভাৰতৰ সাংস্কৃতিক বৈচিত্ৰ্যক ভালদৰে বুজিবলৈ সুযোগ পোৱা যাব।

পুথিভঁৰালৰ গুৰুত্বৰ ওপৰত গুৰুত্ব আৰোপ কৰি তেওঁ কয় যে কেৱল কলেজ আৰু বিশ্ববিদ্যালয়ত অধ্যয়ন কৰা ছাত্ৰ-ছাত্ৰীৰ সংখ্যাই নহয়, জ্ঞান আহৰণৰ বাবে কিমান লোকে পুথিভঁৰাল ব্যৱহাৰ কৰে তাৰ ওপৰতো এটা জাতিৰ ভৱিষ্যত নিৰ্ধাৰিত হয়। পঢ়াৰ সংস্কৃতিয়ে সমাজখনক মতাদৰ্শগতভাৱে সমৃদ্ধ কৰে।

বংগৰ বৌদ্ধিক আৰু সাংস্কৃতিক ঐতিহ্যৰ কথা উল্লেখ কৰি অমিত শ্বাহে কয় যে এই ভূমি দেশখনক বহু মহান সাহিত্যিক, বিজ্ঞানী, বিপ্লৱী, পণ্ডিতক প্ৰদান কৰিছে। তেওঁ আস্থা প্ৰকাশ কৰে যে পশ্চিম বংগে পুনৰবাৰ দেশৰ উন্নয়নত অগ্ৰণী ভূমিকা গ্ৰহণ কৰিব। বিগত ৯ মাহ ধৰি পশ্চিম বংগৰ অগ্ৰগতিৰ ওপৰত নজৰ ৰাখি ৰাজ্যখন দেশৰ বাবে আলোকস্তম্ভত পৰিণত হৈছে বুলি কয়। শ্বাহে ৰাজ্যৰ বিজেপি চৰকাৰক প্ৰশংসা কৰি কয় যে মুখ্যমন্ত্ৰী সুবেন্দু অধিকাৰীৰ নেতৃত্বত সোনাৰ বাংলা নিৰ্মাণৰ সংকল্প নিশ্চিতভাৱে পূৰণ হ'ব।

এই সংগ্ৰহালয়ৰ প্ৰথম পৰ্যায়ত ভাৰতীয় ভাষা, লিপি, সাহিত্যৰ বৈচিত্ৰ্য প্ৰদৰ্শন কৰা হয়। সংগ্ৰহালয়টোক পৰম্পৰাগত প্ৰদৰ্শনী স্থানৰ পৰিৱৰ্তে আধুনিক অভিজ্ঞতা কেন্দ্ৰ হিচাপে গঢ়ি তোলা হৈছে, য’ত দৰ্শকে ডিজিটেল প্ৰদৰ্শন, হ’ল’গ্ৰাম, গতি চেন্সৰ, আৰু অন্যান্য অত্যাধুনিক প্ৰযুক্তিৰ জৰিয়তে ভাৰতীয় ভাষাৰ বিৱৰ্তনৰ যাত্ৰাক নিবিড়ভাৱে নিৰীক্ষণ আৰু অনুভৱ কৰিব পাৰে।

শব্দ সংগ্ৰহালয়ত ৯ খন গেলেৰী আছে, য’ত ভাৰতীয় ভাষাৰ ইতিহাস, ইয়াৰ বিভিন্ন লিপি, সাহিত্য, ভাৰতীয় সভ্যতাত ইয়াৰ প্ৰভাৱ প্ৰদৰ্শন কৰা হৈছে। মৌখিক পৰম্পৰা, প্ৰাচীন পাণ্ডুলিপি, ছপা সাহিত্য, আৰু আধুনিক ডিজিটেল মাধ্যমক সামৰি লোৱা ভাৰতৰ ২২টা অনুসূচিত ভাষাৰ চহকী ঐতিহ্য এই সংগ্ৰহালয়ত উপস্থাপন কৰা হৈছে। ইয়াৰ লক্ষ্য হৈছে ভাৰতীয় ভাষাসমূহক নতুন প্ৰজন্মৰ মাজত এক জীৱন্ত সাংস্কৃতিক ঐতিহ্য হিচাপে পৰিচয় কৰাই দিয়া আৰু দেশৰ ভাষিক বৈচিত্ৰ্যক সংৰক্ষণ আৰু জনপ্ৰিয় কৰা।

হিন্দুস্থান সমাচাৰ / অৰৱিন্দ