তেহৰাণ, ২৮ মাৰ্চ (হি.স.)। পশ্চিম এছিয়াত ২৯ দিন ধৰি চলি থকা যুদ্ধৰ মাজতে ইৰাণে দাবী কৰিছে যে তেওঁলোকৰ পাৰমাণৱিক ঘাটিসমূহ আক্ৰমণ কৰা হৈছে। এই কাণ্ড এনে সময়ত সংঘটিত হৈছে যেতিয়া ইজৰাইলে তেহৰাণৰ বিৰুদ্ধে সামৰিক অভিযান “অধিক তীব্ৰতৰ আৰু সম্প্ৰসাৰণ”ৰ সতৰ্কবাণী দিছিল।

ইৰাণৰ চৰকাৰী সংবাদ সংস্থা ইৰনাৰ উদ্ধৃতি দি আমেৰিকাৰ ৰাজহুৱা সম্প্ৰচাৰক পিবিএছে প্ৰকাশ কৰা অনুসৰি শুকুৰবাৰে গধুৰ পানীৰ উদ্যোগ আৰু হালধীয়া কেক উৎপাদন কেন্দ্ৰক লক্ষ্য কৰি লোৱা হৈছে। হালধীয়া কেক হৈছে ইউৰেনিয়ামৰ এক পৰিশোধিত ৰূপ যিটো পাৰমাণৱিক ইন্ধন হিচাপে ব্যৱহাৰ কৰা হয়, আনহাতে গধুৰ পানীক পাৰমাণৱিক ৰিয়েক্টৰত মডাৰেটৰ হিচাপে ব্যৱহাৰ কৰা হয়।

এই আক্ৰমণৰ খবৰ এনে সময়ত প্ৰকাশ পাইছে যেতিয়া আমেৰিকাৰ ৰাষ্ট্ৰপতি ড’নাল্ড ট্ৰাম্পে যুদ্ধৰ অন্ত পেলাবলৈ আলোচনা ভালদৰে আগবাঢ়িছে বুলি দাবী কৰিছিল। ইৰাণক হৰমুজ জলদ্বীপ মুকলি কৰিবলৈও সময় দিছিল।

আনহাতে, ইৰাণে আমেৰিকাৰ ১৫ দফীয়া যুদ্ধবিৰতিৰ প্ৰস্তাৱ নাকচ কৰিছে, য’ত হৰমুজ জলদ্বীপৰ নিয়ন্ত্ৰণ এৰি দিয়াৰ চৰ্ত সন্নিবিষ্ট কৰা হৈছিল। ইৰানে কোনো ধৰণৰ আলোচনাত অংশগ্ৰহণ নকৰাৰ কথা স্পষ্ট কৰি দিছে আৰু অঞ্চলটোত সামৰিক বাহিনী বৃদ্ধিৰ নিৰ্দেশ দিছে। বিশ্বৰ শক্তি যোগানৰ বাবে হৰমুজ জলদ্বীপ অতি গুৰুত্বপূৰ্ণ, ই বিশ্বৰ প্ৰায় ২০% তেল পৰিবহণ কৰে। ইয়াৰ বন্ধ বা বিঘিনি ঘটিলে বিশ্ব অৰ্থনীতিত গভীৰ প্ৰভাৱ পৰিব পাৰে।

ইয়াৰ পিছতে ড’নাল্ড ট্ৰাম্পে পুনৰ সকীয়াই দিয়ে যে যদিহে ইৰাণে ৬ এপ্ৰিলৰ ভিতৰত সকলো জাহাজৰ বাবে জলদ্বীপ মুকলি নকৰে তেন্তে আমেৰিকাই ইৰাণৰ বিদ্যুৎ কেন্দ্ৰক লক্ষ্য কৰি ল’ব পাৰে।

এই বৃদ্ধি পোৱা উত্তেজনাই বিশ্বৰ বজাৰতো প্ৰভাৱ পেলাবলৈ আৰম্ভ কৰিছে। ষ্টক মাৰ্কেট হ্ৰাস পাইছে, শক্তি যোগানৰ ক্ষেত্ৰত অনিশ্চয়তা বৃদ্ধি পাইছে। ইৰাণৰ পাৰমাণৱিক সুবিধাসমূহৰ ওপৰত আক্ৰমণ আৰু ইজৰাইলৰ আগ্ৰাসী সতৰ্কবাণীয়ে পশ্চিম এছিয়াৰ সংকট আৰু অধিক ভয়াৱহ কৰি তুলিছে। কূটনৈতিক প্ৰচেষ্টাৰ পিছতো পৰিস্থিতি দ্ৰুতগতিত অৱনতি ঘটা যেন লাগে, যাৰ ফলত বিশ্বজুৰি অৰ্থনৈতিক আৰু নিৰাপত্তাজনিত উদ্বেগ বৃদ্ধি পাইছে।

हिन्दुस्थान समाचार / মনোজ কুমাৰ শইকীয়া