নতুন দিল্লী, ০২ ছেপ্টেম্বৰ (হি.স.)। আই টি সমাধান প্ৰদানকাৰী কোম্পানী গ্ল’বটিয়াৰ ইনফ’টেকৰ শ্বেয়াৰে আজি বৃহৎ হ্ৰাসৰ সৈতে শ্বেয়াৰ বজাৰত প্ৰৱেশ কৰি আই পি অ’ বিনিয়োগকাৰীক হতাশ কৰে। আই পি অ’ৰ অধীনত কোম্পানীটোৰ শ্বেয়াৰ ৭২ টকাত জাৰি কৰা হৈছিল। আজি বি এছ ইৰ এছ এম ই প্লেটফৰ্মত ২০ শতাংশ ৰেহাইত ৫৭.৬০ টকাত তালিকাভুক্ত কৰা হৈছে। দুৰ্বল তালিকাৰ পিছত বিক্ৰী আৰম্ভ হোৱাৰ বাবে কোম্পানীটোৰ শ্বেয়াৰ কম সময়ৰ ভিতৰতে ৫৪.৭২ টকাৰ নিম্ন চাৰ্কিট লেভেললৈ পিছলি পৰে। এনেদৰে কোম্পানীটোৰ আই পি অ’ বিনিয়োগকাৰীসকলে প্ৰতি শ্বেয়াৰত ১৭.২৮ টকা অৰ্থাৎ ব্যৱসায়ৰ প্ৰথম দিনটোত ২৪ শতাংশ লোকচানৰ সন্মুখীন হ’বলগীয়া হয়।
গ্ল’বটিয়াৰ ইনফ’টেকৰ ৩১.০৫ কোটি টকাৰ আইপিঅ’ ২৫ৰ পৰা ২৮ আগষ্টৰ ভিতৰত চাবস্ক্ৰিপচনৰ বাবে মুকলি আছিল।এই আইপিঅ’ই বিনিয়োগকাৰীৰ পৰা মিশ্ৰিত সঁহাৰি লাভ কৰিছিল, যাৰ বাবে ইয়াক সামগ্ৰিকভাৱে ২.০৪ গুণ চাবস্ক্ৰাইব কৰা হৈছিল। এইবোৰত অপ্ৰতিষ্ঠানিক বিনিয়োগকাৰীৰ বাবে (এন আই আই) সংৰক্ষিত অংশত মাত্ৰ ০.৬৩ শতাংশ চাবস্ক্ৰিপচন আহিছিল। ইয়াৰ উপৰিও খুচুৰা বিনিয়োগকাৰীৰ বাবে সংৰক্ষিত অংশ ২.০৩ বাৰ চাবস্ক্ৰাইব কৰা হৈছিল। এই আই পি অ’ৰ অধীনত ২৭.৪৪ কোটি টকাৰ নতুন শ্বেয়াৰ জাৰি কৰা হৈছে। ইয়াৰ উপৰিও অফাৰ ফৰ চেল উইণ্ডোৰ জৰিয়তে ১০ টকাৰ ফেচ ভেলুৰ ৫,০০,৮০০ টা শ্বেয়াৰ বিক্ৰী হৈছে। আই পি অ’ৰ জৰিয়তে সংগ্ৰহ কৰা ধন কোম্পানীটোৱে নিজৰ পুৰণি ঋণৰ বোজা হ্ৰাস, কাৰ্য্যকৰী মূলধনৰ প্ৰয়োজনীয়তা পূৰণ আৰু সাধাৰণ কৰ্পৰেট উদ্দেশ্যত ব্যৱহাৰ কৰিব।
কোম্পানীটোৰ আৰ্থিক অৱস্থাৰ কথা ক’বলৈ গ’লে প্ৰস্পেক্টচত কৰা দাবী অনুসৰি ইয়াৰ আৰ্থিক স্বাস্থ্য অহৰহ শক্তিশালী হৈ আহিছে। ২০২২-২৩ বিত্তীয় বৰ্ষত কোম্পানীটোৰ নিকা লাভ ৩.৩৫ কোটি টকা, যিটো পৰৱৰ্তী বিত্তীয় বৰ্ষ ২০২৩-২৪ত ৩.৭৪ কোটি টকালৈ বৃদ্ধি পাই ২০২৪-২৫ চনত ৫.৫০ কোটি টকালৈ জপিয়াই পৰে। এই সময়ছোৱাত কোম্পানীটোৰ ৰাজহ বছৰি ৪ শতাংশতকৈ অধিক চক্রবৃদ্ধিৰ হাৰত বৃদ্ধি পাই ৯৪.৮১ কোটি টকা হৈছে৷ এই সময়ছোৱাত কোম্পানীটোৰ ঋণো ক্ৰমাগতভাৱে বৃদ্ধি পাইছিল। ২০২২-২৩ বিত্তীয় বৰ্ষৰ শেষত কোম্পানীটোৰ ঋণ আছিল ৮.০৬ কোটি টকা, যিটো ২০২৩-২৪ বিত্তীয় বৰ্ষৰ শেষত ১২.৬০ কোটি টকালৈ বৃদ্ধি পাইছিল। কিন্তু ২০২৪-২৫ বিত্তীয় বৰ্ষৰ শেষত কোম্পানীটোৰ ঋণ সামান্য হ্ৰাস পাই ১২.২১ কোটি টকালৈ নামি আহিছিল।
हिन्दुस्थान समाचार / মনোজ কুমাৰ শইকীয়া
