নতুন দিল্লী, ০২ ছেপ্টেম্বৰ (হি.স.)। কেন্দ্ৰীয় বাণিজ্য আৰু উদ্যোগ মন্ত্ৰী পীয়ুষ গোৱেলে মঙলবাৰে কয় যে ভাৰতে আমেৰিকাৰ সৈতে দ্বিপাক্ষিক বাণিজ্য চুক্তি (বিটিএ)ৰ আলোচনাত মিলিত হৈছে। ভাৰত-চীনৰ সম্পৰ্ক ক্ৰমান্বয়ে স্বাভাৱিকতাৰ দিশে আগবাঢ়িছে বুলিও তেওঁ কয়। সীমান্তৰ সমস্যা সমাধান হোৱাৰ লগে লগে উত্তেজনাও কমি যাব।

নতুন দিল্লীত ভাৰতীয় উদ্যোগ সংঘৰ ২০ সংখ্যক গ্ল’বেল ছাষ্টেনেবিলিটি ছামিটত ভাষণ দি এই মন্তব্য কৰে কেন্দ্ৰীয় মন্ত্ৰী গোৱেলে। নতুন দিল্লীয়ে ৰাছিয়াৰ তেল ক্ৰয় অব্যাহত ৰখাৰ প্ৰতি সঁহাৰি জনাই ট্ৰাম্প প্ৰশাসনে ভাৰতীয় সামগ্ৰীৰ ওপৰত শুল্ক দুগুণ কৰাৰ মাত্ৰ কেইদিনমানৰ পিছতে তেওঁ এই মন্তব্য আগবঢ়ায় । গোৱেলে কয়, আমি বিটিএৰ বাবে আমেৰিকাৰ সৈতে আলোচনা কৰি আছো। মাৰ্চ মাহৰ পৰা ভাৰত আৰু আমেৰিকাই এই চুক্তিৰ আলোচনাত মিলিত হৈছে। এই পৰ্যন্ত পাঁচটা ৰাউণ্ডৰ আলোচনা সম্পূর্ণ হৈছে৷ ২৭ আগষ্টৰ পৰা ৫০ শতাংশ শুল্ক আৰোপ কৰাৰ পিছত আমেৰিকাৰ প্ৰতিনিধি দলটোৱে ২৫ আগষ্টৰ পৰা আৰম্ভ হ’বলগীয়া পৰৱৰ্তী পৰ্যায়ৰ আলোচনাৰ বাবে ভাৰত ভ্ৰমণ পিছুৱাই দিছে।এতিয়ালৈকে ষষ্ঠ ৰাউণ্ডৰ আলোচনাৰ কোনো তাৰিখ নিৰ্ধাৰণ কৰা হোৱা নাই।

গোৱেলে কয় যে ভাৰতে ইতিমধ্যে ইউৰোপৰ চাৰিখন দেশৰ গোট অষ্ট্ৰেলিয়া, ইউ এ ই, মৰিচাছ, ব্ৰিটেইন আৰু ই এফ টি এৰ সৈতে মুক্ত বাণিজ্য চুক্তি স্বাক্ষৰ কৰিছে। ভাৰত-ইউৰোপীয় ইউনিয়নৰ মুক্ত বাণিজ্য চুক্তি সন্দৰ্ভত গোৱেলে কয় যে আলোচনা এক উন্নত পৰ্যায়ত আছে। এই চুক্তি সন্দৰ্ভত ইউৰোপীয় ইউনিয়নৰ বিষয়াসকলৰ সৈতে আলোচনা কৰিবলৈ বাণিজ্য সচিব সুনীল বাৰ্থৱাল ব্ৰাছেলছত আছে বুলিও তেওঁ অৱগত কৰে।

ভাষণত বাণিজ্য মন্ত্ৰীগৰাকীয়ে ভাৰতৰ প্ৰকৃতিক সন্মান আৰু প্ৰাকৃতিক সম্পদ সংৰক্ষণৰ চিৰন্তন পৰম্পৰাৰ উদ্ধৃতি দি বিগত ১১ বছৰত বহনক্ষমতাৰ ক্ষেত্ৰত দেশৰ উল্লেখযোগ্য অগ্ৰগতিৰ ওপৰত আলোকপাত কৰে। তেওঁ লগতে উদ্যোগ আৰু ষ্টাৰ্টআপে দেশৰ সংৰক্ষণ প্ৰচেষ্টাক কেনেকৈ শক্তিশালী কৰিব পাৰে আৰু শক্তি দক্ষতাৰ লক্ষ্য আগুৱাই নিব পাৰে, যাৰ ফলত উন্নত ভাৰত ২০৪৭ৰ দৃষ্টিভংগীত অৰিহণা যোগাব পাৰে তাৰ ওপৰতো গুৰুত্ব আৰোপ কৰে।

ইয়াৰ উপৰিও গোৱেলে কয় যে চাংহাই সহযোগিতা সংস্থাৰ সন্মিলনৰ আঁৰত অনুষ্ঠিত হোৱা বৈঠকত মোডী আৰু ছি জিনপিঙে ভাৰত-চীন সীমান্ত সমস্যাৰ “ন্যায্য, যুক্তিসংগত আৰু পাৰস্পৰিকভাৱে গ্ৰহণযোগ্য” সমাধানৰ দিশত কাম কৰিবলৈ সন্মত হয় আৰু বিশ্ব বাণিজ্য সুস্থিৰ কৰাৰ ক্ষেত্ৰত দুয়োখন অৰ্থনীতিৰ ভূমিকাক স্বীকৃতি দি বাণিজ্য আৰু বিনিয়োগৰ সম্পৰ্ক সম্প্ৰসাৰণৰ সংকল্প গ্ৰহণ কৰে।

हिन्दुस्थान समाचार / মনোজ কুমাৰ শইকীয়া