নতুন দিল্লী, ০৫ আগষ্ট (হি.স.)। ২৪ বাৰৰ গ্ৰেণ্ড শ্লেম চেম্পিয়ন ন’ভাক জ’কভিচে আগন্তুক ইউ এছ অ’পেনৰ পূৰ্বে আন এক বিপৰ্যয়ৰ সৃষ্টি কৰিছে। চিনচিনাটি অ’পেনৰ পৰা নিজৰ নাম প্ৰত্যাহাৰ কৰি এতিয়া হাৰ্ড ক’ৰ্ট টুৰ্ণামেণ্টৰ কোনো প্ৰস্তুতি নোহোৱাকৈ পোনপটীয়াকৈ ইউ এছ অ’পেনত প্ৰৱেশ কৰিব।

জ’কভিচে শেষবাৰৰ বাবে ১১ জুলাইত উইম্বলডনৰ ছেমি ফাইনেলত অংশগ্ৰহণ কৰিছিল, য’ত তেওঁ য়ানিক চিনাৰৰ হাতত পোনপটীয়া ছেটত পৰাস্ত হৈছিল। এই মেচৰ দুদিন পূৰ্বে কোৱাৰ্টাৰ ফাইনেলৰ অন্তিমখন খেলত জ’কভিচক “ভয়ংকৰ” আৰু “অদ্ভুত ধৰণে” পৰি যোৱা দেখা গৈছিল, যাৰ ফলত তেওঁৰ বাওঁ উৰুত প্ৰভাৱ পৰিছিল। ছেমি ফাইনেলত তেওঁক সম্পূৰ্ণ ফিট দেখা নগ’ল আৰু ক’ৰ্টত তেওঁৰ গতিবিধিৰ ক্ষেত্ৰত অসুবিধা হৈছিল। খেলৰ সময়ত তেওঁৰ ওপৰৰ বাওঁ ভৰিৰ চিকিৎসাও কৰা হৈছিল।

চিনচিনাটিৰ পূৰ্বে জ’কভিচে এই সপ্তাহত সমাপ্ত হোৱা টৰন্টো মাষ্টাৰছত অংশগ্ৰহণ কৰা নাছিল, যাৰ কাৰণ তেওঁ গ্ৰ’ইনৰ আঘাতৰ কথা উল্লেখ কৰিছিল।

উইম্বলডনৰ পূৰ্বে তেওঁ ফ্ৰেন্স অ’পেনত অংশগ্ৰহণ কৰিছিল, য’ত তেওঁ পুনৰ ছেমি ফাইনেলত ইয়ানিক ছিনাৰৰ হাতত পৰাস্ত হৈছিল।

এতিয়া ইউ এছ অ’পেনৰ পূৰ্বে জ’কভিচৰ কোনো হাৰ্ড ক’ৰ্ট প্ৰেকটিছ নাথাকিব। ২৪ আগষ্টৰ পৰা আৰম্ভ হ’ব ইউ এছ অ’পেন। জ’কভিচে এতিয়ালৈকে চাৰিবাৰকৈ এই প্ৰতিযোগিতাখনৰ চেম্পিয়ন হৈছে, ইয়াৰে শেষবাৰৰ বাবে ২০২৩ চনত জয়ী হৈছে। সেয়াও তেওঁৰ এতিয়ালৈকে শেহতীয়া গ্ৰেণ্ড শ্লেম খিতাপ।

হিন্দুস্থান সমাচাৰ / মনোজ কুমাৰ শইকীয়া