শোণিতপুৰ, ৩০ আগষ্ট (হি.স.) বিশ্ব প্ৰসিদ্ধ হকী খেলুৱৈ ধ্যান চান্দৰ জন্ম দিনৰ লগত সংগতি ৰাখি ২৯ আগষ্ট অৰ্থাৎ কালিৰে পৰা তিনিদিনীয়া কাৰ্যসূচীৰে দেশজুৰি উদযাপিত হৈ থকা ৰাষ্ট্ৰীয় ক্ৰীড়া দিৱসৰ লগত সংগতি ৰাখি এছ এছ বিৰ তেজপুৰ ফ্ৰন্টিয়াৰৰ উদ্যোগত আজি তেজপুৰৰ পল'ফিল্ডত শিক্ষাৰ্থীৰ মাজত অনুষ্ঠিত হয় দৌৰ, টাগ অফ ৱাৰ অৰ্থাৎ ৰচিটনা প্ৰতিযোগিতাৰ লগতে ভলীবল প্ৰতিযোগিতা ।

সশস্ত্ৰ সীমা বল অৰ্থাৎ এছ এছ বিৰ তেজপুৰ ফ্ৰন্টিয়াৰৰ ডি আই জি এইচ এন বিষ্টে আনুষ্ঠানিক ভাৱে উদ্বোধন কৰি শিক্ষাৰ্থী সকলৰ সন্মুখত ভাষণ প্ৰসংগত ৰাষ্ট্ৰীয় ক্ৰীড়া দিৱসৰ তাৎপৰ্য ব্যাখ্যা কৰি প্ৰসিদ্ধ হকী খেলুৱৈ ধ্যান চান্দৰ জীৱন -দৰ্শন আলোকপাত কৰে। উল্লেখ্য যে তেজপুৰৰ ৰাষ্ট্ৰভাষা বিদ্যালয়ৰ শিক্ষাৰ্থীৰ মাজত আয়োজন কৰা এই প্ৰতিযোগিতাৰ উদ্বোধনী অনুষ্ঠানত উপস্থিত থকা ৰাষ্ট্ৰভাষা বিদ্যালয়ৰ প্ৰধান শিক্ষক বিজয় কাণ্ডুলনাইও ভাষণ প্ৰদান কৰি অকল পুৰস্কাৰ লাভ কৰাটোৱেই নহয় অংশ গ্ৰহণ কৰাটো ডাঙৰ কথা বুলি কৈ এছ এছ বিৰ এনে প্ৰয়াসৰ শলাগ লয়।

উল্লেখ্য যে এগৰাকী ৰাষ্ট্ৰীয় ভলীবল খেলুৱৈ ডি আই জি গৰাকীয়ে নিজেই ক'ৰ্টত ভলীবলৰ ছট মাৰি শিক্ষাৰ্থী সকলক উদ্বুদ্ধ কৰাৰ পিছত সাংবাদিকৰ আগত মন্তব্য কৰি শিশু সকলক সুন্দৰ মনৰ লগতে সুন্দৰ স্বাস্থ্যৰ অধিকাৰী হ'বলৈ ক্ৰীড়াৰ অনুশীলন কৰোঁৱাৰ লক্ষ্যৰেই এনেদৰে উদ্বুদ্ধ কৰাৰ প্ৰয়াস কৰা হৈছে বুলি কয় ।খেলৰ অন্তত বিজয়ী প্ৰতিযোগী সকলক ট্ৰফী আৰু মেডেল প্ৰদান কৰে ।

হিন্দুস্থান সমাচাৰ / সমীৰ কাৰ