নতুন দিল্লী, ৩১ আগষ্ট (হি.স.)। হাৰাৰেত জিম্বাবুৱেৰ বিৰুদ্ধে প্ৰথমখন এদিনীয়া খেলত স্লো অভাৰ ৰেটৰ বাবে শ্ৰীলংকা ক্ৰিকেট দলটোক মেচ মাচুলৰ পাঁচ শতাংশ জৰিমনা বিহা হৈছে। আইচিচিৰ এলিট পেনেল মেচৰ ৰেফাৰী জেফ ক্ৰ’ৱে এই জৰিমনা বিহে।

আইচিচিৰ খেলুৱৈ আৰু খেলুৱৈ সহায়ক কৰ্মীৰ আচৰণ বিধিৰ ২.২২ অনুচ্ছেদ অনুসৰি নূন্যতম অভাৰ ৰেট অপৰাধৰ সৈতে জড়িত খেলুৱৈসকলক নিৰ্দিষ্ট সময়ত বল নকৰা প্ৰতিটো অভাৰৰ বাবে তেওঁলোকৰ মেচ মাচুলৰ পাঁচ শতাংশ জৰিমনা বিহা হয়।

আন্তঃৰাষ্ট্ৰীয় ক্ৰিকেট পৰিষদে দেওবাৰে কয় যে শ্ৰীলংকাৰ অধিনায়ক চৰিথ আছালংকাই অপৰাধ আৰু প্ৰস্তাৱিত শাস্তি মানি লৈছে, গতিকে আনুষ্ঠানিক শুনানিৰ প্ৰয়োজন নাই।

দৰাচলতে হাৰাৰেত খেলা প্ৰথমখন এদিনীয়াত শ্ৰীলংকাই আয়োজক জিম্বাবুৱেক ৭ ৰানত পৰাস্ত কৰিছিল। খেলখনত শ্ৰীলংকাই প্ৰথমে বেটিং কৰি ৫০ অভাৰত ৬টা উইকেট হেৰুৱাই ২৯৮ ৰান সংগ্ৰহ কৰে। ইয়াৰ প্ৰতিক্ৰিয়া স্বৰূপে জিম্বাবুৱেৰ দলটোৱে ৫০ অভাৰত ৮টা উইকেট হেৰুৱাই মাত্ৰ ২৯১ ৰানহে কৰিবলৈ সক্ষম হয়। এই জয়ৰ জৰিয়তে শ্ৰীলংকাই দুখন মেচৰ এদিনীয়া শৃংখলাত ১-০ ব্য়ৱধানত আগবাঢ়ি আছে।

हिन्दुस्थान समाचार / মনোজ কুমাৰ শইকীয়া