কামৰূপ, ০৫ আগষ্ট (হি.স.)। অসম চৰকাৰৰ খিলঞ্জীয়া আৰু জনজাতীয় বিশ্বাস আৰু সংস্কৃতি বিভাগৰ অধীনস্থ অসম প্ৰত্নতত্ব সঞ্চালকালয় বিভাগৰ উদ্যোগত,কামৰূপ জিলা প্ৰশাসন আৰু শৰাইঘাট জাৰ্ণেলিষ্ট ফ'ৰামৰ যৌথ সহযোগত আলাৱৈ ৰণস্মৃতি দিৱসৰ আয়োজন কৰা হয়। কামৰূপ জিলা আয়ুক্তৰ কাৰ্যালয়ৰ সন্মুখত থকা আলাবৈ ৰণৰ স্মৃতি সৌধত স্মৃতি তৰ্পণৰ লগতে সামৰিক অভিবাদন জনোৱা হয়।
অনুষ্ঠানত মুখ্য অতিথি হিচাপে উপস্থিত থাকে অসম চৰকাৰৰ পৰিবেশ আৰু বনমন্ত্ৰী তথা কামৰূপ জিলাৰ অভিভাৱক মন্ত্ৰী চন্দ্ৰ মোহন পাটোৱাৰী, অসম চৰকাৰৰ পৰিবহণ আৰু পাহাৰীয়া অঞ্চল উন্নয়ন মন্ত্ৰী যোগেন মহন, কমলপুৰ সমষ্টিৰ বিধায়ক দিগন্ত কলিতা উপস্থিত থাকে। স্মৃতি তৰ্পণৰ পিছতেই এখন সভাও অনুষ্ঠিত হয় জিলা আয়ুক্ত কাৰ্যালয়ৰ সভাকক্ষত। সভাত আহোম সেনাৰ পৰাক্ৰম তথা বীৰগাথাৰ ৰোমন্থন কৰা হয়।
কামৰূপ জিলাৰ আলাৱৈ পথাৰত মোগলৰ সৈতে হোৱা যুদ্ধত দেশ মাতৃৰ হকে যুদ্ধ কৰি একে দিনাই দহ হাজাৰ অসমীয়া যোদ্ধাই প্ৰাণাহুতি দিছিল। ১৬৬৯ চনৰ ৫ আগষ্টত আলাৱৈ পথাৰৰ যুদ্ধত প্ৰাণাহুতি দিছিল শ্বহীদ বীৰ যোদ্ধা সকলে । কামৰূপৰ আমিনগাঁৱত ৩৫৬ সংখ্যক ঐতিহাসিক আলাৱৈ ৰণৰ আজি স্মৃতি ৰোমন্থন কৰা হয়।
হিন্দুস্থান সমাচাৰ / কিশোৰ মিশ্ৰ