নতুন দিল্লী, ০৫ আগষ্ট (হি.স.)। ইণ্ডিয়ান ছুপাৰ লীগ (আই এছ এল)ৰ ভৱিষ্যতক লৈ চলি থকা বিভ্ৰান্তিৰ মাজতে বেংগালুৰু এফ চিয়ে প্ৰথম দলৰ খেলুৱৈ আৰু কৰ্মচাৰীৰ দৰমহা অনিৰ্দিষ্টকাললৈ বন্ধ কৰাৰ সিদ্ধান্ত লৈছে। সোমবাৰে ক্লাবটোৱে এই তথ্য দি আনুষ্ঠানিক বিবৃতি প্ৰকাশ কৰে।

বেংগালুৰু এফ চিয়ে নিজৰ বিবৃতিত কয় যে, ভাৰতত এটা ফুটবল ক্লাব চলোৱা আৰু ৰক্ষণাবেক্ষণ কৰাটো সদায় এক প্ৰত্যাহ্বানমূলক কাম হৈ আহিছে, যিটো আমি প্ৰতিটো ছিজনতে সম্পূৰ্ণ নিষ্ঠাৰে কৰি আহিছো। কিন্তু লীগৰ ভৱিষ্যতক লৈ স্পষ্টতাৰ অভাৱে আমাক এই কঠিন পদক্ষেপ ল'বলৈ বাধ্য কৰাইছে। আমাৰ খেলুৱৈ, কৰ্মচাৰী আৰু তেওঁলোকৰ পৰিয়ালৰ মংগল আমাৰ বাবে সৰ্বোচ্চ গুৰুত্বপূৰ্ণ আৰু এই সমস্যা সমাধান নোহোৱালৈকে আমি তেওঁলোকৰ সৈতে অহৰহ যোগাযোগত আছো। ক্লাবটোৱে এই সিদ্ধান্তই তেওঁলোকৰ যুৱ কাৰ্যসূচীত কোনো প্ৰভাৱ নপৰে বুলিও স্পষ্ট কৰি দিয়ে, আমি খেলখনৰ বিকাশ আৰু আমাৰ পৰিচালনাৰ প্ৰতি দায়বদ্ধ। আমাৰ যুৱ পুৰুষ আৰু মহিলা দল, লগতে বিএফচি ছকাৰ স্কুলসমূহো এই সিদ্ধান্তৰ দ্বাৰা প্ৰভাৱিত নহ'ব কাৰো স্বাৰ্থত নহয় আৰু ভাৰতীয় ফুটবলৰ ভৱিষ্যতৰ বাবে ক্ষন্তেকীয়া সমাধানৰ প্ৰয়োজন।'

১১ জুলাইত আই এছ এলৰ আয়োজক এফ এছ ডি এলে চুক্তিবদ্ধ সমস্যাৰ উদ্ধৃতি দি ২০২৫–২৬ ছিজনৰ “অস্থায়ী নিলম্বন” ঘোষণা কৰে।

পিছদিনা এ আই এফ এফে কয় যে লীগৰ ধাৰাবাহিকতা নিশ্চিত কৰিবলৈ প্ৰয়োজনীয় সকলো পদক্ষেপ গ্ৰহণ কৰিব।

তথ্য অনুসৰি এফ এছ ডি এল আৰু এ আই এফ এফৰ মাজত বৰ্তমানৰ মাষ্টাৰ ৰাইটছ এগ্ৰিমেণ্ট (এম আৰ এ)ৰ ম্যাদ ৮ ডিচেম্বৰত শেষ হ’ব।এই চুক্তিখনেই লীগৰ গাঁথনি, পৰিচালনা আৰু ব্যৱসায়িক কাঠামোৰ ভেটি।

সাধাৰণতে ছেপ্টেম্বৰৰ পৰা এপ্ৰিললৈকে খেলা আই এছ এলৰ পৰিচালনা আৰু সম্প্ৰচাৰ পৰিকল্পনাৰ ওপৰত সকলো অংশীদাৰক দীৰ্ঘম্যাদী স্পষ্টতাৰ প্ৰয়োজন।

ইফালে, বৃহস্পতিবাৰে নতুন দিল্লীত অনুষ্ঠিত হোৱা আই এছ এলৰ আঠটা ক্লাবৰ চিইঅ’ৰ সৈতে বৈঠকত মিলিত হৈ ভাৰতীয় ফুটবলৰ সৈতে জড়িত গুৰুত্বপূৰ্ণ বিষয়সমূহৰ ওপৰত আলোচনা কৰে।

হিন্দুস্থান সমাচাৰ / মনোজ কুমাৰ শইকীয়া