তামুলপুৰ, ০৫ আগষ্ট (হি.স.)। লোকপ্ৰিয় গোপীনাথ বৰদলৈৰ পূণ্য স্মৃতিত অসম চৰকাৰে লোক কল্যাণ দিৱস পালন কৰি আহিছে। এই দিৱসতেই বিভিন্ন ক্ষেত্ৰত পাৰদৰ্শিতা আগবঢ়োৱা ৰাজ্য চৰকাৰৰ বিষয়া-কৰ্মচাৰীলৈ মুখ্যমন্ত্ৰীৰ কৰ্মশ্ৰী আৰু লোকসেৱা বঁটা আগবঢ়োৱা হয়। এই বঁটাৰ মূল উদ্দেশ্য হৈছে― জনসেৱাৰ প্ৰতি উৎসাহ প্ৰদান, চৰকাৰী সেৱাৰ গুণগত মানৰ উন্নয়ন, দায়িত্বৱান, নিষ্ঠাৱান আৰু উদ্যমী কৰ্মচাৰী চিনাক্তকৰণ, আদৰ্শ স্থাপন কৰি আনক উৎসাহিত কৰা ইত্যাদি। তামুলপুৰ জিলাই চলিত বৰ্ষৰ আৰম্ভণিতে আকাংক্ষামূলক খণ্ডৰ কাৰ্যসূচী (এ বি পি)-ৰে দেশৰ ৫০০ উন্নয়ন খণ্ডৰ ভিতৰত প্ৰথম হোৱা বাবে জিলা আয়ুক্ত পংকজ চক্ৰৱৰ্তী, সহকাৰী আয়ুক্ত অৰুণিমা কাকতি, অনুপম ডেকা আৰু খণ্ড প্ৰাথমিক স্বাস্থ্য কেন্দ্ৰৰ বিষয়া ডাঃ গৌতম মেধিক দলীয়ভাৱে ৰাজ্য চৰকাৰে কৰ্মশ্ৰী সন্মান প্ৰদান কৰিছে।
তামুলপুৰৰ এই চাৰিওগৰাকী বিষয়াই অসম চৰকাৰৰ মাননীয় মন্ত্ৰী ৰণজিত কুমাৰ দাসৰ হাতৰ পৰা এই বঁটা গ্ৰহণ কৰে। উল্লেখ্য যে নিটি আয়োগৰ এক সমীক্ষাত দেশৰ ভিতৰতে ৫০০ উন্নয়ন খণ্ডৰ ভিতৰত তামুলপুৰ উন্নয়ন খণ্ডই প্ৰথম স্থান লাভ কৰি তিনি কোটি টকা পুৰস্কাৰ হিচাপে লাভ কৰিবলৈ সক্ষম হৈছিল। আজিৰ বঁটা প্ৰদান অনুষ্ঠানত অসম চৰকাৰৰ মাননীয় মন্ত্ৰী জয়ন্ত মল্লবৰুৱা, নন্দিতা গাৰ্লোছা, মুখ্য সচিব ডঃ ৰবি কোটা, প্ৰধান সচিব দিবাকৰ দাস মিশ্ৰ, অসম আৰক্ষীৰ সঞ্চালক প্ৰধান হৰমিত সিং, সাধাৰণ প্ৰশাসন বিভাগৰ আয়ুক্ত সচিব বৰ্ণালী ডেকা, লোকপ্ৰিয় গোপীনাথ বৰদলৈৰ পুত্ৰ বলীন বৰদলৈকে ধৰি বিভিন্ন বিভাগৰ বিষয়া-কৰ্মচাৰী আদি উপস্থিত থাকে। কৰ্মশ্ৰী সন্মান তামুলপুৰ জিলাখনলৈ কঢ়িয়াই অনা বাবে জিলা আয়ুক্ত পংকজ চক্ৰৱৰ্তীসহ তেওঁৰ দলটিক জিলাখনৰ বিভিন্ন বিভাগৰ বিষয়া-কৰ্মচাৰী, সচেতন ব্যক্তি তথা সৰ্বসাধাৰণে ভূয়সী প্ৰশংসা কৰিছে। উল্লেখ্য যে তামুলপুৰৰ উপৰি কোকৰাঝাৰ জিলা আয়ুক্ত কাৰ্যালয়ৰ জ্যেষ্ঠ জিলা প্ৰশাসনিক সহায়ক মতিলাল দাস, গোসাঁইগাঁও মহকুমাধিপতি কাৰ্যালয়ৰ গাড়ীচালক মাণিক চন্দ্ৰ ৰয়, ওদালগুৰি জিলা আয়ুক্ত কাৰ্যালয়ৰ প্ৰশাসনিক সহায়ক পদ্মিনী হাফলংফাৰ আৰু মাল্টি টাস্কিং ষ্টাফ মৃদুল বৰ্মনসহ ৮গৰাকী বিষয়া-কৰ্মচাৰীয়ে সমগ্ৰ বিটিআৰলৈ আজিৰ এই লোক কল্যাণ দিৱসত গৌৰৱ কঢ়িয়াই আনিছে।
হিন্দুস্থান সমাচাৰ / কিশোৰ মিশ্ৰ
