কাছাৰ, ০৪ আগষ্ট (হি.স.): শিলচৰৰ স্বাস্থ্য খণ্ডত এক বিস্ময়কাৰী ঘটনা সংঘটিত হৈছে। চহৰৰ খ্যাতনামা শিৱসুন্দৰী নাৰীশিক্ষা সেৱাশ্ৰম হাস্পতালৰ পৰা যোৱাকালি দেওবাৰে বিয়লি আটক কৰা হৈছে এজন ভুৱা চিকিৎসকক, যি বহু দিন ধৰি কোনোধৰণৰ বৈধ চিকিৎসাগত স্বীকৃতি নাথাকিলেও অস্ত্ৰোপচাৰ আৰু চিকিৎসা চলাই আহিছিল। আটক কৰা লোকজনৰ নাম পুলক মালাকাৰ বুলি কোৱা হৈছে ।
আৰক্ষীৰ মতে, তেওঁ কোনো চিকিৎসা ডিগ্ৰী নথকাৰ সত্ত্বেও গর্ভবতী মহিলাৰ ওপৰত অস্ত্ৰোপচাৰ চলাই আছিল। ঠিক সেই সময়তে আৰক্ষীয়ে অভিযান চলাই তেওঁক হাতেনাতে ধৰে। এই ঘটনাৰ পাছতেই শিলচৰ জুৰি তীব্ৰ চাঞ্চল্য সৃষ্টি হৈছে। সাধাৰণ ৰাইজৰ মাজত প্ৰশ্ন উঠিছে—এই ধৰণৰ ঘটনা কিমান দিন ধৰি চলি আহিছিল? আৰু ইয়াৰ পিচত আচলতে কোনে আছে? কাছাৰ আৰক্ষীয়ে ইতিমধ্যেই তদন্ত আৰম্ভ কৰিছে আৰু হাস্পতাল কৰ্তৃপক্ষকো জেৰা চলাই আছে। স্বাস্থ্য বিভাগৰ ওপৰত ৰাইজৰ বিশ্বাসত আঘাত পৰিছে বুলি স্পষ্ট প্ৰতিবাদ আৰু উদ্বেগ প্ৰকাশ কৰিছে স্থানীয় ৰাইজে।
হিন্দুস্থান সমাচাৰ / কিশোৰ মিশ্ৰ