শোণিতপুৰ, ৩০ আগষ্ট (হি.স.) । সৈনিক শিল্পী তথা কলাগুৰু বিঞ্চুপ্ৰসাদ ৰাভাৰ যুগজয়ী সৃষ্টিক বিকৃত কৰি গোৱাক লৈ বিতৰ্কিত নাগাৰা নামৰ গায়িকা কৰিশ্মা নাথৰ বিৰুদ্ধে তীব্ৰ প্ৰতিক্ৰিয়াৰ সৃষ্টি হোৱাৰ লগতে এইগৰাকী তথাকথিত গায়িকাৰ নামৰ দলটো নিষিদ্ধ কৰাৰ দাবী তুলিলে কলাগুৰু পুত্ৰ তথা বিশিষ্ট সাংস্কৃতিক কৰ্মী হেমৰাজ ৰাভাই৷ কৰিশ্মা নাথৰ শেহতীয়া কাণ্ডকলৈ সামাজিক মাধ্যমত ক্ষোভ ব্যক্ত কৰি কলাগুৰু পুত্ৰই কয় “সমগ্ৰ অসমবাসীৰ অতি প্ৰিয় কলাগুৰুৰ সেই গীতটি কৰিশ্মা নাথে নিজৰ প্ৰচাৰৰ বাবে সম্পূৰ্ণ বিকৃত কৰি পৰিবেশন কৰি কলাগুৰুক অপমান কৰিলে। অসমৰ সংস্কৃতিৰ জগতখনক যেন কলুষিত কৰিবলৈ তেওঁৰ নামৰ দলটি এক বিশেষ ভূমিকা গ্ৰহণ কৰিছে। চৰকাৰে অনতিপলমে তেওঁৰ দলটিক নিষিদ্ধ কৰিব লাগে বুলি দাবী জনালোঁ। অসমৰ ক'তো যেন তেওঁৰ দলটিয়ে কোনো ধৰণৰ নাম পৰিবেশন কৰিব নোৱাৰে চৰকাৰে তাৰ ব্যৱস্থা ল'ব লাগে।”
উল্লেখযোগ্য যে, নাগাৰা নাম পৰিৱেশনৰ নামত আৰম্ভণিৰ পৰাই বিকৃতিৰ অভিযোগ উত্থাপন হৈ অহা কৰিশ্মা নাথে পৰৱৰ্তী সময়ত অসমীয়া বিভিন্ন জনপ্ৰিয় আধুনিক গীতো বিকৃতৰূপত পৰিৱেশন কৰি আহিছে ৷ এইদৰে নাগাৰানামৰ ঐতিহ্য পৰম্পৰাকে ধূলিসাৎ কৰি বিকৃতিৰে ব্যৱসায় কৰি যোৱা এই যুৱতীৰ কাৰ্যৰ বিৰুদ্ধে ৰাজ্যৰ অসংখ্য জনে অসন্তুষ্টি প্ৰকাশ কৰিলেও কৰিশ্মাই ইয়ালৈ ভ্ৰুক্ষেপ কৰা নাই ৷ এইদৰেই বৰ্তমান বিঞ্চুৰাভা গীতো বিকৃত কৰাৰ দুঃসাহস কৰা কৰিশ্মা নাথ আৰু তেওঁৰ দলৰ কাৰ্যত বহুসংখ্যক ৰাইজৰ লগতে স্বয়ং কলাগুৰু পুত্ৰই ক্ষোভ প্ৰকাশ কৰাৰ পিছত চৰকাৰে এইক্ষেত্ৰত কি ভূমিকা পালন কৰে সেয়া লক্ষ্যণীয় হ’ব বুলিও ৰাইজে আলোচনা কৰিছে ৷
হিন্দুস্থান সমাচাৰ / সমীৰ কাৰ
