গুৱাহাটী, ৩০ আগষ্ট (হি.স.)। অতিৰিক্ত যাত্ৰীৰ ভিৰ নিয়ন্ত্ৰণ কৰাৰ অৰ্থে উত্তৰ-পূব সীমান্ত ৰেলৱেই অনাগত উৎসৱৰ বতৰত নিউ তিনিচুকীয়া আৰু এছএমভিটি বেংগালুৰুৰ মাজত এযোৰ উৎসৱ বিশেষ ৰে’ল চলাবৰ বাবে সিদ্ধান্ত গ্ৰহণ কৰিছে। ৰে’ল নং ০৫৯৫২/০৫৯৫১ (নিউ তিনিচুকীয়া – এছএমভিটি বেংগালুৰু – নিউ তিনিচুকীয়া) উৎসৱ বিশেষ ৰে’ল অহা ১৮ ছেপ্টেম্বৰৰ পৰা ২ নৱেম্বৰ, ২০২৫ তাৰিখ পৰ্যন্ত প্ৰত্যেক দিশত ০৭ টা ট্ৰিপৰ বাবে চলাচল কৰিব।
সেই অনুসাৰে, ৰে’ল নং ০৫৯৫২ (নিউ তিনিচুকীয়া – এছএমভিটি বেংগালুৰু) বিশেষ ৰে’লখন নিউ তিনিচুকীয়াৰ পৰা প্ৰতি বৃহস্পতিবাৰে ১৮ ছেপ্টেম্বৰৰ পৰা ৩০ অক্টোবৰ, ২০২৫ পৰ্যন্ত ১৮:৪৫ বজাত প্ৰস্থান কৰি দেওবাৰে ০৯:৩০ বজাত এছএমভিটি বেংগালুৰুত গৈ উপস্থিত হ’ব। উভতনি যাত্ৰাৰ দিশত, ৰে’ল নং ০৫৯৫১ (এছএমভিটি বেংগালুৰু – নিউ তিনিচুকীয়া) বিশেষ ৰে’লখন এছএমভিটি বেংগালুৰুৰ পৰা প্ৰত্যেক দেওবাৰে ২১ ছেপ্টেম্বৰৰ পৰা ২ নৱেম্বৰ, ২০২৫ পৰ্যন্ত ২৩:৫০ বজাত প্ৰস্থান কৰি বুধবাৰে ১৬:২৫ বজাত নিউ তিনিচুকীয়াত গৈ উপস্থিত হ’ব।
যাত্ৰা পথৰ উভয় দিশত এই ৰে’লখনৰ ডিব্ৰুগড়, ধেমাজি, উত্তৰ লখিমপুৰ, হাৰমতী, ৰঙাপাৰা নৰ্থ, ৰঙিয়া, নিউ বঙাইগাঁও, নিউ কোচবিহাৰ, নিউ জলপাইগুড়ী, কিষাণগঞ্জ, মালদা টাউন, বৰ্দ্ধমান, খড়গপুৰ, কটক, ভুৱনেশ্বৰ, বিজয়নগৰম, বিজয়ৱাড়া, কাটপাড়ি ষ্টেচনত ষ্টপেজ থাকিব।
এই উৎসৱ বিশেষ ৰে’লখনত ২০ টা ডবা থাকিব। যাত্ৰীৰ সুবিধা আৰু আৰাম নিশ্চিত কৰাৰ বাবে ৰে’লখনত এচি ৩-টায়াৰ আৰু শ্লীপাৰ শ্ৰেণীৰ ডবা থাকিব।
এই ৰে’লখনৰ ষ্টপেজ আৰু সময়সূচীৰ বিস্তৃত বিৱৰণ আইআৰচিটিচিৰ ৱেবছাইটত উপলব্ধ থকাৰ লগতে উত্তৰ-পূব সীমান্ত ৰেলৱেৰ চ’চিয়েল মিডিয়া প্লেটফৰ্ম আৰু বিভিন্ন বাতৰি কাককত জাননী প্ৰকাশ কৰা হৈ আছে। যাত্ৰীসকলক যাত্ৰা আৰম্ভ কৰাৰ পূৰ্বে বিশদ তথ্য অৱলোকন কৰাৰ বাবে অনুৰোধ জনোৱা হৈছে।
হিন্দুস্থান সমাচাৰ / আলোক চক্ৰৱৰ্তী
