ইছলামবাগ, ১৮ আগষ্ট (হি.স.)। পাকিস্তানত হোৱা ধাৰাসাৰ বৰষুণৰ ফলত হোৱা বানত মৃত্যু হোৱা লোকৰ সংখ্যা ৫৪০ লৈ বৃদ্ধি পাইছে।ইফালে দেওবাৰে ৰাষ্ট্ৰীয় দুৰ্যোগ ব্যৱস্থাপনা কৰ্তৃপক্ষই পঞ্জাৱ আৰু খাইবাৰ-পাখতুনখোৱাত বিপদ অব্যাহত থকাৰ সতৰ্কবাণী জাৰি কৰিছে। দুয়োখন প্ৰদেশতে ধাৰাসাৰ বৰষুণ আৰু ডাৱৰ বিস্ফোৰণৰ সম্ভাৱনা আছে।

দ্য নিউজ ইণ্টাৰনেশ্যনেল কাকতৰ খবৰ অনুসৰি নিৰুদ্দেশ হোৱা লোকসকলৰ সন্ধান এতিয়াও অব্যাহত আছে। ৰেচকিউ ১১২২ৰ মুখপাত্ৰ বিলাল আহমেদ ফাইজীয়ে জনোৱা মতে, খাইবাৰ-পাখতুনখোৱাৰ বানপীড়িত অঞ্চলৰ পৰা ৩৭৩টা মৃতদেহ উদ্ধাৰ কৰা হৈছে। ইয়াৰে অধিকাংশই বুনেৰ জিলাৰ। বুনেৰ আৰু অন্যান্য জিলাত উদ্ধাৰ আৰু অনুসন্ধান অভিযান চলি আছে। ক্লাউডবাৰ্ষ্টে বুনাৰত প্ৰচণ্ড ধ্বংসৰ সৃষ্টি কৰিছে। সূত্ৰই প্ৰকাশ কৰা অনুসৰি দেওবাৰে নিশালৈকে মৃত্যুৰ সংখ্যা ৫৪০ লৈ বৃদ্ধি পাইছে।

এনডিএমএৰ তথ্য অনুসৰি ছেপ্টেম্বৰৰ আৰম্ভণিলৈকে ধাৰাসাৰ বৰষুণৰ সম্ভাৱনা আছে। লাহোৰ, ৰাৱালপিণ্ডি, ইছলামবাগ আৰু গুজৰাণৱালা বানপানীৰ ভাবুকিৰ সন্মুখীন হোৱাৰ বিপৰীতে উত্তৰ অঞ্চলত ভূমিস্খলনৰ অতিৰিক্ত ভাবুকিৰ সন্মুখীন হৈছে। বিষয়াসকলে জনোৱা মতে, এই সময়ছোৱাত প্ৰায় ৫,২১২ জন লোকক উদ্ধাৰ কৰা হৈছে।

বুনেৰৰ পিছুনাই আৰু অন্যান্য ক্ষতিগ্ৰস্ত গাঁৱৰ কবৰস্থানত ৫০ জনতকৈ অধিক লোকক সমাধিস্থ কৰা হয়।

এনডিএমএৰ মুখপাত্ৰ ডাঃ মহম্মদ তাইব শ্বাহে পাহাৰীয়া অঞ্চলত অপ্ৰয়োজনীয় ভ্ৰমণৰ বিৰুদ্ধে সতৰ্কবাণী জাৰি কৰিছে। পাকিস্তানৰ বতৰ বিজ্ঞান বিভাগে ২২ আগষ্টলৈকে অবিৰতভাৱে ধাৰাসাৰ বৰষুণ হোৱাৰ ভৱিষ্যদ্বাণী কৰিছে।ইফালে ৰাৱালপিণ্ডিৰ নলা লাইকে ধৰি উচ্চ বিপদজনক অঞ্চলত ১৪৪ ধাৰা জাৰি কৰা হৈছে। প্ৰধানমন্ত্ৰী শ্বাহবাজ শ্বৰীফৰ নিৰ্দেশমৰ্মে দেওবাৰে এন ডি এম এয়ে পাহাৰীয়া অঞ্চলত পৰ্যটন কাৰ্যকলাপ নিষিদ্ধ কৰে।

हिन्दुस्थान समाचार / আলোক চক্ৰৱৰ্তী