কুৱালালামপুৰ, ২৮ জুলাই (হি.স.)। মালয়েছিয়াৰ প্ৰধানমন্ত্ৰী আনোৱাৰ ইব্ৰাহিমে সোমবাৰে কয় যে কম্বোডিয়া আৰু থাইলেণ্ডে স্থানীয় সময় অনুসৰি মাজনিশাৰ পৰা (সোমবাৰে পূব সময় অনুসৰি দুপৰীয়া ১২ বজা) ‘তাৎক্ষণিক আৰু নিঃচৰ্ত যুদ্ধবিৰতি’ৰ ওপৰত সহমতত উপনীত হৈছে। দুয়োখন দেশৰ দীৰ্ঘদিনীয়া বিতৰ্কিত সীমান্তত কেইবাদিনো সংঘৰ্ষৰ অন্তত এই ঘোষণা কৰা হৈছে।
মালয়েছিয়াৰ ‘দ্য ষ্টাৰ’ কাকতখনে প্ৰধানমন্ত্ৰী আনোৱাৰ ইব্ৰাহিমৰ উদ্ধৃতিৰে কম্বোডিয়া আৰু থাইলেণ্ডৰ মাজত যুদ্ধবিৰতি আলোচনাত হোৱা চুক্তিৰ কথা ঘোষণা কৰিছে। মালয়েছিয়াৰ তথ্য অনুসৰি অহা ২৯ জুলাইত দুয়োখন দেশৰ মাজত কম্বোডিয়া আৰু থাইলেণ্ড পক্ষৰ আঞ্চলিক সেনাপতিসকলৰ বৈঠক অনুষ্ঠিত হ’ব।
যুদ্ধবিৰতি আলোচনাৰ বাবে মালয়েছিয়াত উপস্থিত হোৱা কম্বোডিয়াৰ প্ৰধানমন্ত্ৰী হুন মানেট আৰু থাইলেণ্ডৰ ভাৰপ্ৰাপ্ত প্ৰধানমন্ত্ৰী ফুমথাম ভেচাচাইয়ে ৰাজধানী কুৱালালামপুৰৰ দক্ষিণে থকা পুত্ৰজায়াত প্ৰধানমন্ত্ৰী আনোৱাৰ ইব্ৰাহিমৰ চৰকাৰী বাসগৃহত বৈঠকত মিলিত হয়।
দুয়োপক্ষই শেহতীয়াকৈ সীমান্তত সংঘৰ্ষ আৰম্ভ কৰাৰ অভিযোগ উত্থাপন কৰে। থাইলেণ্ড আৰু কম্বোডিয়াৰ বিষয়াসকলৰ মতে, এই যুদ্ধত কমেও ৩৫ জন লোক নিহত হোৱাৰ লগতে ২০০ৰো অধিক লোক আহত হৈছে। দুয়োপক্ষৰ সীমা বিবাদ দশক দশক পুৰণি। আমেৰিকা আৰু চীনেও যুদ্ধবিৰতি আলোচনাত পৰ্যবেক্ষকক সহায় কৰাৰ প্ৰস্তাৱ দিছিল।
আমেৰিকাৰ ৰাষ্ট্ৰপতি ড’নাল্ড ট্ৰাম্পে থাইলেণ্ড আৰু কম্বোডিয়াৰ নেতাসকলক সকীয়াই দিছিল যে এই সীমান্ত সংঘাত অব্যাহত থাকিলে দুয়োখন দেশৰ সৈতে বাণিজ্যিক চুক্তি স্বাক্ষৰ নকৰে।
হিন্দুস্থান সমাচাৰ / মনোজ কুমাৰ শইকীয়া
