কুইটো, ২৬ জুলাই (হি.স.)। কোপা আমেৰিকা মহিলা ফুটবল প্ৰতিযোগিতাৰ গ্ৰুপ বিৰ অন্তিমখন খেলত শুকুৰবাৰে ব্ৰাজিলে এজন খেলুৱৈৰ কম হোৱাৰ পিছতো শক্তিশালী ৰক্ষণাবেক্ষণ প্ৰদৰ্শন কৰি কলম্বিয়াক ০-০ গ’লত ড্ৰ’ কৰি ৰাখে। খেলখনত গ’লবিহীন ড্ৰ’ হোৱাৰ বিপৰীতে কলম্বিয়াই ৭০ মিনিটৰ বাবে অতিৰিক্ত খেলুৱৈৰ সৈতে খেলাৰ সুবিধা লাভ কৰিব নোৱাৰিলে।
খেলখনৰ টাৰ্নিং পইণ্টত ২১ মিনিটত ব্ৰাজিলৰ গ’লৰক্ষক লৰেনাক ৰঙা কাৰ্ড দেখুৱাইছিল। কলম্বিয়াৰ লিণ্ডা কাইচেডোৰ দ্ৰুত পাল্টা আক্ৰমণৰ সময়ত লৰেনাই বক্সৰ পৰা ওলাই আহি হেণ্ডবল সংঘটিত কৰে, তাৰ পিছত ৰেফাৰী মিলাগ্ৰ’ছ আৰৰুয়েলাই সহকাৰী ৰেফাৰী মিৰিয়ানা একিনোৰ পৰামৰ্শ লৈ খেলপথাৰৰ বাহিৰলৈ পঠিয়াই দিয়ে। ইয়াৰ পিছতে ব্ৰাজিলে বিকল্প গ’লৰক্ষক ক্লাউডিয়াক খেলপথাৰত আনিছিল।
কলম্বিয়াৰ বহু সুযোগ আছিল যদিও ভেলেৰিন লোব’য়া আৰু মায়ৰা ৰামিৰেজৰ প্ৰচেষ্টাক গ’ললৈ ৰূপান্তৰিত কৰিব পৰা নগ’ল। মেচৰ পিছত লোব’য়াই কয় যে, এইখন অতি কঠিন আৰু ক্লান্তিকৰ মেচ আছিল। আমি জয়ী হ'ব বিচাৰিছিলো, কিন্তু এতিয়া আমি ছেমি ফাইনেলৰ বাবে প্ৰস্তুতি চলোৱাত মনোনিৱেশ কৰিব লাগিব।
আনহাতে ব্ৰাজিলে ৰক্ষণাত্মক কৌশল গ্ৰহণ কৰি দ্বিতীয়াৰ্ধত কিছু পাল্টা আক্ৰমণ কৰে। ইয়াছমিন, গাবি পৰ্টিলহো আৰু ডুডিনহাই গ’ল দিবলৈ চেষ্টা কৰিছিল যদিও সফল নহ’ল। আঘাতৰ সময়ত ইয়াছমিনৰ ফ্ৰী কিক ক্ৰছবাৰত খুন্দা মাৰি গ’ললৈ ৰূপান্তৰিত কৰিব পৰা নগ’ল।
গ’লবিহীন ড্ৰ’ হোৱাৰ পাছতো ব্ৰাজিলৰ খেলুৱৈ পৰ্টিলহ’ই দলটোৰ প্ৰদৰ্শনক লৈ গৌৰৱ প্ৰকাশ কৰে। তেওঁ কয়, আমি জানিছিলোঁ যে এই মেচখন অতি কঠিন হ'ব, কিন্তু এজন খেলুৱৈৰ চুটি হোৱাৰ পিছতো আমি এই ফলাফলত সুখী।এতিয়া আমি ছেমি ফাইনেলৰ বাবে প্ৰস্তুতি চলাব লাগিব।
অৱশ্যে এই মেচখনে নকআউটত কোনো প্ৰভাৱ নপৰে কিয়নো ইতিমধ্যে দুয়োটা দলে ছেমি ফাইনেলৰ বাবে যোগ্যতা অৰ্জন কৰিছিল। গ্ৰুপ বিৰ শীৰ্ষস্থান দখল কৰা ব্ৰাজিলে এতিয়া মঙলবাৰে উৰুগুৱেৰ বিৰুদ্ধে খেলিব, আনহাতে গ্ৰুপ বিত ৮ পইণ্টেৰে দ্বিতীয় স্থান দখল কৰা কলম্বিয়াই সোমবাৰে গ্ৰুপ এ বিজয়ী আৰ্জেণ্টিনাৰ বিৰুদ্ধে ছেমি ফাইনেল খেলিব।
हिन्दुस्थान समाचार / মনোজ কুমাৰ শইকীয়া
