ৱাশ্বিংটন, ০২ জুলাই (হি.স.)। আমেৰিকাৰ ৰাষ্ট্ৰপতি ড’নাল্ড ট্ৰাম্পে মঙলবাৰে কয় যে ইজৰাইলে গাজাৰ যুদ্ধবিৰতিৰ চৰ্তত সন্মতি প্ৰকাশ কৰিছে। হামাছৰ সৈতে হোৱা যুদ্ধত দুমাহৰ বাবে যুদ্ধবিৰতিৰ প্ৰস্তাৱত সন্মতি প্ৰকাশ কৰিছে।
আমেৰিকাৰ চিবিএছ নিউজ চেনেলৰ বাতৰি অনুসৰি ট্ৰাম্পে ট্ৰুথ ছ’চিয়েলত লিখিছে, ইজৰাইলে ৬০ দিনীয়া যুদ্ধবিৰতি চূড়ান্ত কৰিবলৈ প্ৰয়োজনীয় চৰ্তসমূহৰ ওপৰত সন্মতি প্ৰকাশ কৰিছে। এই সময়ছোৱাত আমি সকলোৱে যুদ্ধৰ অন্ত পেলাবলৈ সকলো পক্ষৰ সৈতে কাম কৰিম। তেওঁ আশা প্ৰকাশ কৰে যে হামাছেও মধ্যপ্ৰাচ্যৰ মংগলৰ বাবে এই প্ৰস্তাৱ গ্ৰহণ কৰিব। চেনেলটোৰ মতে, ট্ৰাম্পে এই প্ৰস্তাৱিত প্ৰস্তাৱৰ কোনো সবিশেষ প্ৰকাশ কৰা নাই। লগতে, এতিয়ালৈকে ইজৰাইল বা হামাছে এই সন্দৰ্ভত কোনো ৰাজহুৱা মন্তব্য কৰা নাই।
ৰাষ্ট্ৰপতি ট্ৰাম্পে কয় যে হামাছৰ সৈতে পূৰ্বৰ আলোচনাৰ মধ্যস্থতা কৰা কাটাৰ আৰু ইজিপ্তই এই চূড়ান্ত প্ৰস্তাৱ দাখিল কৰিব। অহা সোমবাৰে ৱাশ্বিংটনত ইজৰাইলৰ প্ৰধানমন্ত্ৰী বেঞ্জামিন নেতানিয়াহুক সাক্ষাৎ কৰাৰ কথা আছে ট্ৰাম্পে। ইয়াৰ সময়ত গাজা আৰু ইৰাণৰ বিষয়টো আলোচনা হোৱাৰ সম্ভাৱনা আছে। ট্ৰাম্পে লগতে কয় যে অহা সপ্তাহত যিকোনো সময়তে গাজাত যুদ্ধবিৰতি আৰম্ভ হ’ব পাৰে।
গাজাত যুদ্ধবিৰতিৰ প্ৰচেষ্টা আগতে কৰা হোৱা নাছিল এনে নহয়। মে’ মাহৰ শেষৰ ফালে ট্ৰাম্পৰ মধ্যপ্ৰাচ্যৰ দূত ষ্টিভ উইটকফে ৬০ দিনীয়া যুদ্ধবিৰতিৰ প্ৰস্তাৱ আগবঢ়াইছিল। ইজৰাইলে ইয়াক সমৰ্থন কৰিছিল যদিও হামাছে চৰ্ত নিৰ্ধাৰণ কৰিছিল। সেয়ে এই প্ৰচেষ্টা বিফল হ'ল।
যুদ্ধৰ পটভূমি
২০২৩ চনৰ অক্টোবৰ মাহত হামাছে দক্ষিণ ইজৰাইলত সন্ত্ৰাসবাদী আক্ৰমণ চলাইছিল।এই আক্ৰমণত প্ৰায় ১২০০ লোক নিহত হৈছিল আৰু ২৫০ জন পণবন্দীক গাজা ষ্ট্ৰিপলৈ লৈ যোৱা হৈছিল। ইজৰাইলে ইয়াৰ প্ৰতিক্ৰিয়া প্ৰকাশ কৰি পেলেষ্টাইনৰ ভূখণ্ডত তীব্ৰ আকাশ আৰু স্থলপথ আক্ৰমণ কৰে। অনুমান কৰা হৈছে যে এই যুদ্ধত ৫৬ হাজাৰতকৈ অধিক লোকৰ মৃত্যু হৈছিল। ২১ মাহৰ সংঘাত আৰম্ভ হোৱাৰ পিছৰে পৰা পূৰ্বৰ দুটা যুদ্ধবিৰতি আৰু পণবন্দী মুক্তিৰ চুক্তিতো দুয়োপক্ষই সন্মতি প্ৰকাশ কৰিছে।
হিন্দুস্থান সমাচাৰ / মনোজ কুমাৰ শইকীয়া
