নতুন দিল্লী, ১৫ জুলাই (হি.স.)। ৰাষ্ট্ৰসংঘৰ সচিব প্ৰধানে কয় যে বিশ্ব উন্নয়নৰ সৈতে জড়িত বহনক্ষম উন্নয়নৰ লক্ষ্যসমূহৰ মাত্ৰ ৩৫ শতাংশই নিৰ্দিষ্ট সময়লৈকে লাভ কৰাৰ পথত আছে, আনহাতে বাকী লক্ষ্যসমূহ হয় লাহে লাহে আগবাঢ়িছে নহয় পিছুৱাই গৈছে। তেওঁ ইয়াক বিশ্ব উন্নয়নৰ জৰুৰীকালীন অৱস্থা বুলি অভিহিত কৰে।
নিউয়ৰ্কত ‘বহনক্ষম উন্নয়ন লক্ষ্য প্ৰতিবেদন ২০২৫’ প্ৰকাশ কৰাৰ সময়ত সংবাদমেলত সচিব প্ৰধান এণ্টনিঅ’ গুটেৰেছে এই কথা কয়। তেওঁ কয় যে যোৱা দহ বছৰত শিক্ষা, স্বচ্ছ শক্তি, ডিজিটেল প্ৰৱেশ আৰু সামাজিক সুৰক্ষাৰ ক্ষেত্ৰত যথেষ্ট অগ্ৰগতি হৈছে। বাল্যবিবাহ কমিছে আৰু মহিলাৰ অংশগ্ৰহণ বৃদ্ধি পাইছে।
তেওঁ লগতে স্পষ্ট কৰি দিয়ে যে ৮০ কোটিৰো অধিক লোক এতিয়াও চৰম দৰিদ্ৰতাত জীৱন কটাবলগীয়া হৈছে। প্ৰায় ১৮ শতাংশ গ’ল পিছলৈ গৈ আছে। জলবায়ু পৰিৱৰ্তন, ঋণ সংকট আৰু সংঘাতৰ প্ৰভাৱে উন্নয়নৰ গতিত বাধাৰ সৃষ্টি কৰিছে। গাজা, ইউক্ৰেইন, চুডান আৰু পশ্চিম এছিয়াত শান্তিৰ জৰুৰী প্ৰয়োজনীয়তাৰ ওপৰত গুৰুত্ব আৰোপ কৰে সচিব প্ৰধানগৰাকীয়ে।
প্ৰতিবেদনৰ তথ্য দাখিল কৰি অৰ্থনীতি আৰু সামাজিক পৰিক্ৰমা বিভাগৰ উপ-সচিব প্ৰধান লি জুনহুয়াই কয় যে ২০১০ চনৰ তুলনাত নতুন এইচ আই ভি সংক্ৰমণ ৪০ শতাংশ হ্ৰাস পাইছে আৰু ২০০০ চনৰ পৰা মেলেৰিয়া প্ৰতিৰোধৰ দ্বাৰা ১ কোটি ২০ লাখ লোকৰ জীৱন ৰক্ষা কৰা হৈছে। ২০১৫ চনৰ পৰা ১১ কোটিতকৈ অধিক শিশুৱে বিদ্যালয়ত নামভৰ্তি কৰিছে।
তেওঁ কয় যে বিশ্বৰ ৯২ শতাংশ জনসংখ্যাই এতিয়া বিদ্যুতৰ সুবিধা লাভ কৰিছে আৰু ইণ্টাৰনেটৰ ব্যৱহাৰ ৭০ শতাংশ বৃদ্ধি পাইছে। কিন্তু পানী, অনাময়, স্বাস্থ্য সেৱা আৰু মহিলাৰ সম অংশগ্ৰহণৰ দৰে ক্ষেত্ৰত এতিয়াও ডাঙৰ প্ৰত্যাহ্বান আছে। প্ৰতিবেদনত ছটা পৰিৱৰ্তনক অগ্ৰাধিকাৰ দিয়াৰ আহ্বান জনোৱা হৈছে - খাদ্য, শক্তি, ডিজিটেল প্ৰৱেশ, শিক্ষা, কৰ্মসংস্থাপন আৰু জলবায়ু।
উল্লেখযোগ্য যে ২০১৫ চনত বহনক্ষম উন্নয়নৰ লক্ষ্য নিৰ্ধাৰণ কৰা হৈছিল, যিবোৰ ২০৩০ চনৰ ভিতৰত পূৰণ হ’ব।এই লক্ষ্যসমূহ দৰিদ্ৰতা নিৰ্মূলকৰণ, গুণগত শিক্ষা, লিংগ সমতা, স্বচ্ছ শক্তি আৰু জলবায়ু কাৰ্য্যকে ধৰি ১৭টা মূল ক্ষেত্ৰত বিশ্ব উন্নয়নৰ পথ প্ৰদৰ্শনৰ বাবে সৃষ্টি কৰা হৈছে।
हिन्दुस्थान समाचार / মনোজ কুমাৰ শইকীয়া
