মোহালী, ১৫ জুলাই (হি.স.)। পঞ্জাৱ এফ চিয়ে আনুষ্ঠানিকভাৱে ঘোষণা কৰিছে যে আগন্তুক ছিজনৰ বাবে যুৱ আৰু প্ৰতিভাৱান ডিফেণ্ডাৰ বিজয় ভাৰ্গেছক চুক্তিবদ্ধ কৰা হৈছে। ২৫ বছৰীয়া চেণ্টাৰ বেকগৰাকীয়ে ইণ্টাৰ কাশীৰ পৰা পঞ্জাব এফ চিত যোগদান কৰি ২০২৮ চনলৈকে ক্লাবটোৰ সৈতে দীৰ্ঘম্যাদী চুক্তি স্বাক্ষৰ কৰিছে।পঞ্জাব এফ চিৰ এই চুক্তিক যুৱ প্ৰতিভাত বিনিয়োগ আৰু ভৱিষ্যতৰ দল গঠনৰ দিশত এক গুৰুত্বপূৰ্ণ পদক্ষেপ হিচাপে বিবেচিত হৈছে। ক্লাবটোৱে আশা কৰিছে যে অনাগত বছৰবোৰত বিজয় দলৰ ৰক্ষণশীল শক্তিৰ এক মূল স্তম্ভ হৈ পৰিব।
২০২১-২২ ছিজনত কেৰালা ব্লাষ্টাৰছৰ সৈতে পেছাদাৰী কেৰিয়াৰ আৰম্ভ কৰা বিজয়ে সেই ছিজনত ৰানাৰ্ছ আপ হোৱা দলটোৰ অংশ আছিল। ২০২৩-২৪ চনত ঋণত ইণ্টাৰ কাছিত যোগদান কৰি আই লীগত ১০খন মেচ খেলিছিল। তেওঁৰ আকৰ্ষণীয় প্ৰদৰ্শনৰ বাবে ক্লাবে তেওঁক পৰৱৰ্তী ছিজনৰ বাবে স্থায়ীভাৱে চুক্তিবদ্ধ কৰে, য’ত তেওঁ ২০২৪-২৫ চনত ১২খন মেচত অংশগ্ৰহণ কৰে।
পঞ্জাব এফ চিত যোগদান কৰাৰ সন্দৰ্ভত বিজয়ে কয়, ‘পাঞ্জাব এফ চিৰ অংশ হ’বলৈ পাই মই অত্যন্ত উৎসাহিত হৈছো আৰু এই নতুন অধ্যায়ৰ বাবে আগ্ৰহী।ডিফেন্সত প্ৰচণ্ড প্ৰতিযোগিতা চলি আছে, যিটো মোৰ ব্যক্তিগত বিকাশৰ বাবে এক ডাঙৰ সুযোগ আৰু ই মোক প্ৰতিদিনে উন্নত প্ৰদৰ্শন কৰিবলৈ প্ৰেৰণা দিব।মই নিশ্চিত যে মোৰ অভিজ্ঞতা আৰু নিষ্ঠাৰ দ্বাৰা মই দলৰ লক্ষ্যত অৰিহণা যোগাব পাৰিম।”
কেৰালাৰ উপকূলীয় গাঁও পুল্লুভিলাত জন্মগ্ৰহণ কৰা বিজয়ে ফুটবল খেলৰ বাবে অনুপ্ৰাণিত হৈছিল তেওঁৰ তিনিজন জ্যেষ্ঠ ভাতৃৰ পৰা। কোভালাম এফ চিৰ সৈতে ফুটবল যাত্ৰা আৰম্ভ কৰি পৰৱৰ্তী সময়ত ভাৰতীয় ক্ৰীড়া কৰ্তৃপক্ষ (এছ এ আই)ৰ পৰা প্ৰশিক্ষণ গ্ৰহণ কৰে। বিজয়ে বিভিন্ন বয়সৰ গোটত কেৰালাক প্ৰতিনিধিত্ব কৰি ২০১৯ চনৰ খেলো ইণ্ডিয়া যুৱ গেমছত বিজয়ী দলৰ অংশ আছিল, তাৰ পিছত তেওঁক কেৰেলা ব্লাষ্টাৰছৰ বাবে স্কাউট কৰা হৈছিল।
এই উপলক্ষে ভাষণ দি পঞ্জাব এফ চিৰ কাৰিকৰী সঞ্চালক নিকোলাওছ টপালিঅ’টিছে কয়, ‘আমি বিজয়ক পঞ্জাব এফ চিলৈ উষ্ম আদৰণি জনাইছো। তেওঁ আই এছ এল আৰু আই লীগ দুয়োটাতে মূল্যৱান অভিজ্ঞতা থকা এজন আশাব্যঞ্জক ডিফেণ্ডাৰ।তেওঁৰ যোগদান আমাৰ দৃষ্টিভংগীৰ অংশ, ভাৰতীয় যুৱ খেলুৱৈৰ এক শক্তিশালী কোৰ গঢ়ি দলৰ গভীৰতা আৰু প্ৰতিযোগিতামূলক ক্ষমতা বৃদ্ধিৰ বাবে।আমি আত্মবিশ্বাসী যে তেওঁ আমাৰ শক্তিশালী কোৰ গঢ়ি তুলিব ডিফেন্স আৰু ক্লাবৰ গাঁথনিৰ ভিতৰত অগ্ৰগতি অব্যাহত ৰাখিব।”
হিন্দুস্থান সমাচাৰ / মনোজ কুমাৰ শইকীয়া
