কাঠমাণ্ডু, ৩০ জুন (হি.স.)। সক্ৰিয় ৰাজনীতিলৈ ঘূৰি অহাৰ আনুষ্ঠানিক ঘোষণাৰ মাত্ৰ দুদিন পিছতে প্ৰাক্তন ৰাষ্ট্ৰপতি বিদ্যা ভাণ্ডাৰীয়ে চৰকাৰী সকলো সা-সুবিধা ঘূৰাই দিলে। গৃহ মন্ত্ৰালয়লৈ প্ৰেৰণ কৰা এখন পত্ৰত ভাণ্ডাৰীয়ে নৈতিক ভিত্তিত স্বেচ্ছাই এই সিদ্ধান্ত লোৱা বুলি অৱগত কৰিছে। গৃহ মন্ত্ৰালয়ৰ নিৰাপত্তা সমিতিৰ বৈঠকত সিদ্ধান্ত নোলোৱালৈকে গৃহ মন্ত্ৰালয়ে পি এছ অ’ক আপাততঃ ভাণ্ডাৰীৰ নিৰাপত্তাত থাকিবলৈ কয়।

প্ৰাক্তন ৰাষ্ট্ৰপতি হিচাপে তেওঁ নেপাল সেনাৰ সৰ্বোচ্চ নিৰাপত্তা লাভ কৰিছিল, য’ত তেওঁ আৰু তেওঁৰ পৰিয়ালৰ নিৰাপত্তাৰ বাবে অতি আধুনিক অস্ত্ৰৰে সজ্জিত নেপাল সেনাৰ ৩২ জন কমাণ্ডো নিয়োগ কৰা হৈছিল। ইয়াৰ উপৰিও নেপাল আৰক্ষী আৰু সেনাৰ এজনকৈ ডি এছ পি ৰেংক বিষয়া আছিল তেওঁৰ ব্যক্তিগত নিৰাপত্তা বিষয়া। প্ৰাক্তন ৰাষ্ট্ৰপতি ভাণ্ডাৰীয়ে চৰকাৰী ঘৰ, গাড়ী, ইন্ধন, ব্যক্তিগত সচিব হিচাপে কৰ্মৰত এজন উপ-সচিব পৰ্যায়ৰ বিষয়া, দৈনিক ভাট্টা, ভ্ৰমণ ভাট্টা আদি ঘূৰাই দি ১ জুলাইৰ পৰা এই সকলোবোৰ সুবিধা গ্ৰহণ নকৰে বুলি জনাইছে। ইয়াৰ উপৰিও বাৰ্ষিক বিদ্যুৎ আৰু পানীৰ মাচুল নিদিয়াৰ বাবেও অনুৰোধ জনাইছে।

গৃহ মন্ত্ৰালয়লৈ প্ৰেৰণ কৰা এখন পত্ৰত ভাণ্ডাৰীয়ে শ্ৰাৱণ মাহৰ পৰা মাহিলী দৰমহা আৰু ভাট্টা বন্ধ কৰিবলৈও অনুৰোধ জনাইছে। ভাণ্ডাৰীয়ে কয় যে যিহেতু তেওঁ কোনো বিশেষ দলত যোগদান কৰি পুনৰ দেশৰ ৰাজনীতিত সক্ৰিয় হ’ব বুলি ঘোষণা কৰিছে, গতিকে এগৰাকী প্ৰাক্তন ৰাষ্ট্ৰপতি হিচাপে তেওঁৰ হাতত থকা চৰকাৰী সা-সুবিধাসমূহৰ সুবিধা লোৱাটো তেওঁৰ বাবে উপযুক্ত নহ’ব।

হিন্দুস্থান সমাচাৰ / মনোজ কুমাৰ শইকীয়া