ৱাশ্বিংটন, ০৩ জুন (হি.স.)। ক’লৰাড’ৰ বোল্ডাৰত ইজৰাইল সমৰ্থক সমাৱেশত হোৱা হিংসাত্মক আক্ৰমণক তীব্ৰ গৰিহণা দি আমেৰিকাৰ ৰাষ্ট্ৰপতি ড’নাল্ড ট্ৰাম্পে আমেৰিকাত ইয়াক “একেবাৰে অসহনীয়” বুলি অভিহিত কৰিছে। এই কাণ্ডক জো বাইডেনৰ “মুকলি সীমান্ত নীতি”ৰ ফল বুলি অভিহিত কৰি তেওঁ পুনৰবাৰ কঠোৰ অনুপ্ৰৱেশ নীতি আৰু সীমান্তৰ নিৰাপত্তাৰ দাবী পুনৰবাৰ উল্লেখ কৰে।

সোমবাৰে ট্ৰাম্পে নিজৰ ছ’চিয়েল মিডিয়া চাইট ‘ট্ৰুথ ছ’চিয়েল’ত এক বিবৃতি প্ৰকাশ কৰি কয় যে “কালি ক’লৰাড’ৰ বোল্ডাৰত হোৱা ভয়ংকৰ আক্ৰমণ আমেৰিকাত সহ্য কৰা নহ’ব।” তেওঁ কয় যে এই কাণ্ডই দেখুৱাইছে যে দেশৰ সীমা দুৰ্বল আৰু ৰাষ্ট্ৰপতি বাইডেনৰ নীতিৰ বাবে দেশত “অবৈধ আৰু আমেৰিকা বিৰোধী উপাদান” অনুপ্ৰৱেশ কৰিছে। তেওঁ কয় যে ট্ৰাম্পৰ নীতি অনুসৰি তেওঁলোকক দেশৰ পৰা বহিষ্কাৰ কৰিব লাগিব। সন্ত্ৰাসবাদৰ দৰে কাৰ্যৰ বাবে কঠোৰতম ব্যৱস্থা গ্ৰহণ কৰা উচিত।

মন কৰিবলগীয়া যে ইজৰাইল সমৰ্থক ৰেলী চলি থকা পাৰ্ল ষ্ট্ৰীট মলৰ ওচৰত এই আক্ৰমণ সংঘটিত হয়। অভিযোগ অনুসৰি অভিযুক্তই জ্বলন্ত যন্ত্ৰ আৰু ঘৰতে বনোৱা ফ্লেমথ্ৰ’ৱাৰ ব্যৱহাৰ কৰি আক্ৰমণ চলাইছিল আৰু “মুক্ত পেলেষ্টাইন” শ্লোগান দিছিল। তদন্তত প্ৰকাশ পাইছে যে অভিযুক্ত মহম্মদ ছাব্ৰি ছলিমান (৪৫ বছৰ) ইজিপ্তৰ বাসিন্দাই প্ৰায় এবছৰ ধৰি আক্ৰমণৰ পৰিকল্পনা কৰি আছিল। এই আক্ৰমণত চাৰিগৰাকী মহিলা আৰু চাৰিজন পুৰুষ আহত হয়। ভিছাৰ ম্যাদ উকলি যোৱাৰ পিছতো অভিযুক্তজনে আমেৰিকাত অবৈধভাৱে বাস কৰিছিল বুলি অভিযোগ উঠিছে।

हिन्दुस्थान समाचार / মনোজ কুমাৰ শইকীয়া