বেইৰুট/গাজাপট্টী, ০৪ এপ্ৰিল (হি.স.)। দক্ষিণ লেবাননৰ ছিডন অঞ্চলত ইজৰাইলৰ সেনাই সন্ত্ৰাসবাদী সংগঠন হামাছৰ অধিনায়ক হাছান ফাৰহাটক ড্ৰ’ন আক্ৰমণত হত্যা কৰা বুলি দাবী কৰিছে। আজি পুৱতি নিশা মহানগৰীৰ দালাআ অঞ্চলত সংঘটিত হোৱা এই আক্ৰমণত ফাৰহাটৰ পুত্ৰ-কন্যাৰো মৃত্যু হয়।

আল জাজিৰা নিউজ চেনেলে কুডছ নিউজ নেটৱৰ্কৰ উদ্ধৃতি দি কয় যে হাছান ফাৰহাট আছিল লেবাননৰ হামাছৰ পশ্চিম অঞ্চলৰ কমাণ্ডাৰ। দীৰ্ঘদিন ধৰি তেওঁ ইজৰাইলৰ বিৰুদ্ধে ষড়যন্ত্ৰ কৰি আহিছে। যোৱা বছৰৰ ফেব্ৰুৱাৰী মাহত উত্তৰ ইজৰাইললৈ বৃহৎ ধাৰাবাহিক ৰকেট নিক্ষেপ কৰাৰ বাবে ইয়াৰ দায়িত্ব আছিল। এই আক্ৰমণত নিহত হয় চোৰাংচোৱা চকীত থকা ইজৰাইলী জোৱান।

আল জাজিৰাৰ বাতৰি অনুসৰি গাজাত ১৫ জন সাহায্য কৰ্মীৰ মৃত্যুক লৈ ৰাষ্ট্ৰসংঘৰ নিৰাপত্তা পৰিষদে জৰুৰী বৈঠক আহ্বান কৰিছে। এই বৈঠক তিনি ঘণ্টা ধৰি চলিছিল। এই সময়ছোৱাত বহু ৰাষ্ট্ৰদূতে ইজৰাইলক তীব্ৰ নিন্দা কৰিছিল। ইফালে, শেহতীয়াকৈ গাজাত ইজৰাইলৰ আক্ৰমণত কমেও ১১২ জন পেলেষ্টাইনী নিহত হোৱা বুলি কোৱা হৈছে। ইয়াৰে অধিকাংশই মহিলা আৰু শিশু। ইয়াৰে গাজা চহৰত স্থানচ্যুত পেলেষ্টাইনীসকলক আশ্ৰয় দিয়া বিদ্যালয়সমূহত তিনিটা পৃথক আক্ৰমণত ৩৩জন লোক নিহত হয়।

ইজৰাইল প্ৰতিৰক্ষা বাহিনীয়ে নিজৰ ছ’চিয়েল মিডিয়া হেণ্ডেল ‘এক্স’ত জনাইছে যে কেইঘণ্টামানৰ পূৰ্বে উত্তৰ গাজাৰ শ্বেজায়া অঞ্চলত সৈন্যই স্থলপথত আক্ৰমণ চলাইছিল। এই সময়ছোৱাত জোৱানসকলে হামাছৰ বহু সন্ত্ৰাসবাদীক হত্যা কৰাৰ লগতে ইয়াৰ আন্তঃগাঁথনি ধ্বংস কৰে। হামাছৰ এটা কমাণ্ড চেণ্টাৰ আৰু এটা কণ্ট্ৰল চেণ্টাৰো ভাঙি পেলোৱা হয়।

हिन्दुस्थान समाचार / মনোজ কুমাৰ শইকীয়া