প'ৰ্ট ম'ৰেছবি, এপ্ৰিল ০৫ (হি.স.)। পাপুয়া নিউগিনিৰ উপকূলত আজি এক প্ৰবল ভূমিকম্পই আতংকৰ সৃষ্টি কৰিছে। লগে লগে ছুনামীৰ সতৰ্কবাণী জাৰি কৰা হয় যদিও পিছত বাতিল কৰা হয়। ইউনাইটেড ষ্টেটছ জিঅ’লজিকেল চাৰ্ভে (USGS)ৰ তথ্য অনুসৰি ৰিখটাৰ স্কেলত এই ভূমিকম্পৰ প্ৰাৱল্য ৬.৯ আছিল। এই তথ্য অষ্ট্ৰেলিয়ান ব্ৰডকাষ্টিং কৰ্পৰেশ্যন (এবিচি)ৰ বাতৰিত দিয়া হৈছে।

এবিচিৰ তথ্য অনুসৰি ইউএছজিএছৰ বিষয়াসকলে জনোৱা মতে, শনিবাৰে স্থানীয় সময় অনুসৰি পুৱা ৬:০৪ বজাত (এইডিটি ৭:০৪ বজাত) নিউ ব্ৰিটেইন দ্বীপৰ দক্ষিণ উপকূলৰ ওচৰত ১০ কিলোমিটাৰ গভীৰতাত এই ভূমিকম্পৰ উৎপত্তি হয়। এই স্থান নিকটতম চহৰ কিম্বেৰ পৰা প্ৰায় ১৯৪ কিলোমিটাৰ দক্ষিণ-পূবে। আমেৰিকাৰ চুনামী সতৰ্কবাণী কেন্দ্ৰই ভূমিকম্পৰ লগে লগে জাৰি কৰা চুনামী সতৰ্কবাণী প্ৰত্যাহাৰ কৰে।

খবৰ অনুসৰি ভূমিকম্পৰ জোকাৰণি কেন্দ্ৰৰ পৰা প্ৰায় ৬২০ কিলোমিটাৰ দূৰত্বত থকা ৰাজধানী প’ৰ্ট ম’ৰছবিলৈকে অনুভৱ কৰা হৈছে। ইষ্ট নিউ ব্ৰিটেইন প্ৰদেশৰ ৰাজধানী কোকোপোতো ভূমিকম্পৰ কম্পন অনুভৱ কৰা হয়।

ইউ এছ জি এছৰ মতে, ইয়াৰ কিছু সময়ৰ পিছতে ক্ষতিগ্ৰস্ত উপকূলৰ ওচৰত ৪.৯ৰ পৰা ৫.৩ৰ ভিতৰৰ কেইবাটাও সৰু সৰু ভূমিকম্প অনূভূত হয়। নিউ ব্ৰিটেইন দ্বীপত ডেৰ লাখতকৈ অধিক লোক বাস কৰে। বতৰ বিজ্ঞান ব্যুৰোৱে কয় যে অষ্ট্ৰেলিয়ালৈ চুনামীৰ কোনো ভাবুকি নাই।

উল্লেখযোগ্য যে ইণ্ডোনেছিয়াৰ ওচৰৰ প্ৰশান্ত মহাসাগৰৰ এটা দ্বীপ হৈছে পাপুয়া নিউগিনি।

---------------

হিন্দুস্থান সমাচাৰ / মনোজ কুমাৰ শইকীয়া