নতুন দিল্লী, ০২ এপ্ৰিল (হি.স.)। ৰাষ্ট্ৰপতি দ্ৰৌপদী মুৰ্মুৱে ৭-১০ এপ্ৰিললৈ পৰ্তুগাল আৰু শ্লোভাকিয়ালৈ চৰকাৰী ভ্ৰমণলৈ যাব । এই সময়ছোৱাত ৰাষ্ট্ৰপতিগৰাকীয়ে তেওঁৰ সমকক্ষসকলৰ সৈতে আলোচনাত মিলিত হ’ব আৰু লগতে ভাৰতীয় সমাজৰ লোকসকলকো সাক্ষাৎ কৰিব।

বৈদেশিক পৰিক্ৰমা মন্ত্ৰালয়ৰ তথ্য অনুসৰি ৭-৮ এপ্ৰিলৰ পৰা পৰ্তুগাল ভ্ৰমণলৈ যাব ৰাষ্ট্ৰপতি মুৰ্মু। ৰাষ্ট্ৰপতি মুৰ্মুৱে তেওঁৰ পৰ্তুগীজ সমকক্ষ মাৰ্চেলো ৰেবেলো ডি ছৌছাক সাক্ষাৎ কৰি প্ৰতিনিধি পৰ্যায়ৰ আলোচনাত মিলিত হ’ব। ইয়াৰ উপৰিও পৰ্তুগীজৰ প্ৰধানমন্ত্ৰী লুইছ মণ্টেনেগ্ৰো আৰু নেচনেল এচেম্বলীৰ অধ্যক্ষ জোচে পেড্ৰ’ আগুয়াৰ-ব্ৰাংকোক সাক্ষাৎ কৰিব।

উল্লেখযোগ্য যে ২৭ বছৰৰ পাছত ভাৰতৰ ৰাষ্ট্ৰপতিয়ে পৰ্তুগাল ভ্ৰমণ কৰিব । ভাৰত আৰু পৰ্তুগালে কূটনৈতিক সম্পৰ্ক পুনৰ প্ৰতিষ্ঠাৰ ৫০ বছৰ উদযাপন কৰিছে। শেষৰবাৰ চৰকাৰী ভ্ৰমণ হৈছিল ১৯৯৮ চনত।সেই সময়ত ৰাষ্ট্ৰপতি কে আৰ নাৰায়ণন পৰ্তুগাললৈ আহিছিল।

আনহাতে ৯-১০ এপ্ৰিলৰ পৰা শ্লোভাকিয়াও ভ্ৰমণ কৰিব মুৰ্মুয়ে। ৰাষ্ট্ৰপতি মুৰ্মুৱে ৰাষ্ট্ৰপতি পিটাৰ পেলেগ্ৰিনি আৰু প্ৰধানমন্ত্ৰী ৰবাৰ্ট ফিকোৰ সৈতে দ্বিপাক্ষিক বৈঠকত মিলিত হ’ব। ৰাষ্ট্ৰপতি মুৰ্মুৱে শ্লোভাক ৰাষ্ট্ৰীয় পৰিষদৰ অধ্যক্ষ ৰিচাৰ্ড ৰাছিকো সাক্ষাৎ কৰিব। এয়া হ’ব ভাৰতৰ ৰাষ্ট্ৰপতিৰ ২৯ বছৰৰ পাছত শ্লোভাকিয়া ভ্ৰমণ।

हिन्दुस्थान समाचार / মনোজ কুমাৰ শইকীয়া