পাটনা, ০৩ এপ্ৰিল (হি.স.)। লোকসভাত বুধবাৰে ৱাকফ সংশোধনী বিধেয়ক গৃহীত হয়। বৃহস্পতিবাৰে ৰাজ্যসভাত দাখিল কৰাৰ পিছত বিহাৰত হাই এলাৰ্ট জাৰি কৰা হৈছে। বিহাৰ আৰক্ষী মুখ্য কাৰ্যালয়ে সকলো জিলাৰ এছ এছ পি-এছ পিক সতৰ্ক কৰি দিছে। আৰক্ষী মুখ্য কাৰ্যালয়ৰ এডিজি ল’ এণ্ড অৰ্ডাৰ পংকজ দাৰাদে সকলো জিলাকে সতৰ্কতা জাৰি কৰি সজাগ হ’বলৈ কয়।
দৰাচলতে সমগ্ৰ দেশতে ৱাকফ সংশোধনী বিধেয়ক সন্দৰ্ভত বিতৰ্ক গভীৰ হৈ পৰিছে। বিহাৰতো মুছলমান সম্প্ৰদায়ৰ লোকে এই বিধেয়কখনৰ বিৰুদ্ধে প্ৰতিবাদ সাব্যস্ত কৰি ইয়াক মুছলমান বিৰোধী বুলি অভিহিত কৰিছে। লোকসভাত বিধেয়কখন গৃহীত হোৱাৰ পিছতে কেন্দ্ৰীয় চৰকাৰে আজি ৰাজ্যসভাত বিধেয়কখন উত্থাপন কৰি সদনত চৰ্চা চলি আছে। ইফালে বিহাৰৰ আৰক্ষী মুখ্য কাৰ্যালয়ে এই বিধেয়ক সন্দৰ্ভত হাই এলাৰ্ট জাৰি কৰিছে।
বিহাৰত শান্তি বজাই ৰাখিবলৈ আৰক্ষী মুখ্য কাৰ্যালয়ৰ এডিজি ল’ এণ্ড অৰ্ডাৰ পংকজ দাৰাদে সকলো জ’ন আইজি, ডিআইজি, এছএছপি, এছপি আৰু ৰে’লৱে এছপিলৈ সতৰ্কবাণী প্ৰেৰণ কৰিছে। ৰাজ্যৰ শান্তি-শৃংখলা যাতে কোনো কাৰণতে বিঘ্নিত নহয় তাৰ সম্পূৰ্ণ যত্ন ল’বলৈ কোৱা হৈছে। এডিজি ল’ এণ্ড অৰ্ডাৰ পংকজ দাৰাদে কয় যে যদি কোনোবাই আইন উলংঘা কৰে তেন্তে তেওঁৰ বিৰুদ্ধে তৎকালীনভাৱে উপযুক্ত আইনী ব্যৱস্থা গ্ৰহণ কৰিব লাগে।
বিহাৰত মুছলমান জনসংখ্যা ১৭.৭০ শতাংশ
বিহাৰ চৰকাৰে জাতি জৰীপৰ তথ্য প্ৰকাশ কৰিছিল অক্টোবৰ-২০২৩ চনত। সমীক্ষা অনুসৰি বিহাৰৰ মুঠ জনসংখ্যা ১৩ কোটি। ইয়াৰে ৮১.৯৯ শতাংশ হিন্দু আৰু ১৭.৭০ শতাংশ মুছলমান। কাটিহাৰ, পূৰ্ণিয়া, আৰৰিয়া, কিষানগঞ্জ আৰু দৰভংগা এই পাঁচখন জিলাত সৰ্বাধিক মুছলমান সংখ্যাগৰিষ্ঠতা আছে। এনে পৰিস্থিতিত এই জিলাসমূহৰ লগতে সমগ্ৰ ৰাজ্যৰ যিকোনো ঠাইত যাতে আইন-শৃংখলাৰ সমস্যা নহয় তাৰ প্ৰতি বিশেষ গুৰুত্ব দিবলৈ কোৱা হৈছে।
हिन्दुस्थान समाचार / মনোজ কুমাৰ শইকীয়া
