পাটনা, ০২ এপ্ৰিল (হি.স.)। ৰাষ্ট্ৰীয় জনতা দলৰ সৰ্বোচ্চ লালু প্ৰসাদ যাদৱৰ স্বাস্থ্যৰ হঠাৎ অৱনতি ঘটিছে। ৰক্ত শৰ্কৰা বৃদ্ধিৰ বাবে তেওঁৰ অৱস্থা অধিক অৱনতি ঘটে, যাৰ বাবে চিকিৎসকে তেওঁক উন্নত চিকিৎসাৰ বাবে দিল্লীলৈ যাবলৈ পৰামৰ্শ দিয়ে।

যোৱা দুদিন ধৰি ব্লাড চুগাৰ বৃদ্ধিৰ সমস্যাত ভুগি আছিল লালু যাদৱ। বুধবাৰে পুৱা তেওঁৰ স্বাস্থ্য আৰু অধিক অৱনতি ঘটে, তাৰ পিছত চিকিৎসকৰ এটা দলে পাটনাৰ ৰাবৰি বাসগৃহত তেওঁক নিৰীক্ষণ কৰি আছে। চিকিৎসকৰ মতে, তেওঁৰ অৱস্থাৰ ওপৰত অহৰহ নিৰীক্ষণ চলি আছে আৰু শীঘ্ৰে তেওঁক দিল্লীলৈ প্ৰেৰণ কৰিব পাৰে। পাটনাৰ ১০ চাৰ্কুলাৰ ৰোডৰ ৰাবৰি বাসগৃহত চিকিৎসকৰ এটা দলে চিকিৎসা কৰি আছে। সূত্ৰৰ পৰা পোৱা তথ্য অনুসৰি এয়াৰ এম্বুলেন্সৰ ব্যৱস্থা কৰা হৈছে। অতি সোনকালে লালু প্ৰসাদ যাদৱক এয়াৰ এম্বুলেন্সেৰে দিল্লীলৈ লৈ যাব পাৰিব চিকিৎসাৰ বাবে। বৰ্তমান চিকিৎসকৰ দলটোৱে কৈছে যে লালু যাদৱৰ অৱস্থা সুস্থিৰ।

ৰাজনৈতিকভাৱে লালু প্ৰসাদ যাদৱক শেহতীয়া সময়ত যথেষ্ট সক্ৰিয় দেখা গৈছিল। তেজশ্বৱীৰ বাবে এক পৰিবেশ সৃষ্টিৰ বাবেও তেওঁ জিলা পৰিভ্ৰমণ কৰি আছিল। কেৱল এয়াই নহয়, পাটনাৰ মুছলিম পাৰ্চনেল ল ব’ৰ্ডৰ প্ৰতিবাদস্থলীতো তেওঁক দেখা গ’ল। তেওঁ সংখ্যালঘুসকলৰ সৈতেও বহি তেওঁলোকৰ মনোবল বৃদ্ধি কৰিছিল। এনে পৰিস্থিতিত হঠাৎ আজি লালু প্ৰসাদ যাদৱৰ স্বাস্থ্যৰ অৱনতি ঘটাৰ খবৰ আহিছে, যিটো তেওঁৰ সমৰ্থকসকলৰ বাবে চিন্তাৰ বিষয়। উল্লেখযোগ্য যে লালু যাদৱ এজন ডায়েবেটিছ ৰোগী। তেওঁৰ কিডনী ট্ৰান্সপ্লাণ্টো কৰা হৈছে। কন্যা ৰোহিনী আচাৰ্যই তেওঁৰ এটা বৃক্ক দান কৰিছে। ছিংগাপুৰত লালু যাদৱৰ কিডনী ট্ৰান্সপ্লাণ্ট কৰা হৈছিল।

हिन्दुस्थान समाचार / মনোজ কুমাৰ শইকীয়া