ৰায়পুৰ, ০২ এপ্ৰিল (হি.স.)। ছত্তীশগড়ৰ উপ মুখ্যমন্ত্ৰী তথা গৃহমন্ত্ৰী বিজয় শৰ্মাই নক্সালবাদীৰ কেন্দ্ৰীয় সমিতিৰ শান্তি আলোচনাৰ প্ৰস্তাৱত নক্সালবাদীয়ে যুদ্ধবিৰতিৰ দৰে শব্দ ব্যৱহাৰ কৰাৰ তীব্ৰ প্ৰতিক্ৰিয়া প্ৰকাশ কৰি চৰকাৰৰ স্থিতি স্পষ্ট কৰে। শান্তি আলোচনাৰ প্ৰস্তাৱ সন্দৰ্ভত নক্সালৰ কেন্দ্ৰীয় সমিতিৰ মুখপাত্ৰ অভয়ৰ পত্ৰ সন্দৰ্ভত ৰাজ্যখনৰ উপ-মুখ্যমন্ত্ৰী তথা গৃহমন্ত্ৰী শৰ্মাই কয় যে যদি ছত্তীশগড়ত যুদ্ধ সদৃশ পৰিস্থিতি নাই, তেন্তে যুদ্ধবিৰতিৰ প্ৰয়োজন কি? ৰাজ্য আৰু কেন্দ্ৰীয় চৰকাৰ নক্সালবাদীৰ সৈতে কথা পাতিবলৈ সাজু হৈছে । নক্সালবাদীয়ে আত্মসমৰ্পণ কৰি নিজৰ অস্ত্ৰ-শস্ত্ৰ ত্যাগ কৰিব লাগিব, তেতিয়াহে যিকোনো অৰ্থপূৰ্ণ সমাধান সম্ভৱপৰ হ’ব। আলোচনাৰ জৰিয়তে যাতে এক সুনিৰ্দিষ্ট সমাধানৰ সন্ধান পোৱা যায় তাৰ বাবে আলোচনাৰ এটা উপযুক্ত মাধ্যম নিৰ্ধাৰণ কৰিব লাগে।

বুধবাৰে মন্ত্ৰালয়ত এক সংবাদমেলযোগে উপ-মুখ্যমন্ত্ৰী তথা গৃহমন্ত্ৰী বিজয় শৰ্মাই কয় যে ৰাজ্য চৰকাৰ যিকোনো ধৰণৰ অৰ্থপূৰ্ণ আলোচনাৰ বাবে সাজু। যদিহে ইয়াৰ কোনো চৰ্ত নাথাকে। উপ-মুখ্যমন্ত্ৰী শৰ্মাই কয় যে চৰকাৰৰ স্থিতি স্পষ্ট, আলোচনাৰ দুৱাৰ মুকলি, কিন্তু হিংসা আৰু ৰক্তপাতৰ ক্ষেত্ৰত কোনো আপোচ নহ’ব। নক্সালবাদীয়ে আত্মসমৰ্পণ কৰি নিজৰ অস্ত্ৰ-শস্ত্ৰ ত্যাগ কৰিব লাগিব, তেতিয়াহে যিকোনো অৰ্থপূৰ্ণ সমাধান সম্ভৱপৰ হ’ব। যদিহে নক্সালবাদীয়ে সঁচাকৈ মূলসুঁতিলৈ ঘূৰি আহিব বিচাৰে আৰু আলোচনাৰ বাবে ইচ্ছুক হয়, তেন্তে ৰাজহুৱাভাৱে তেওঁলোকৰ প্ৰতিনিধি আৰু আলোচনাৰ চৰ্তসমূহ স্পষ্ট কৰিব লাগিব। গৃহমন্ত্ৰীগৰাকীয়ে কয় যে নক্সালসকলৰ বাবে চৰকাৰৰ এক উৎকৃষ্ট পুনৰ্বাসন নীতি আছে। যদি তেওঁলোকে আত্মসমৰ্পণ কৰে তেন্তে তেওঁলোকক উন্নত জীৱন যাপনৰ সুযোগ দিয়া হ’ব।

সাংবাদিকৰ সৈতে হোৱা কথা-বতৰাত উপ-মুখ্যমন্ত্ৰী শৰ্মাই কয় যে আলোচনাৰ ফৰ্মেট আইছিছৰ দৰে কোনো উগ্ৰ মতাদৰ্শৰ লাইনত হ’ব নোৱাৰে। যদি কোনোবাই আলোচনা কৰিব বিচাৰে তেতিয়া তেওঁ ভাৰতীয় সংবিধানৰ বৈধতা মানি ল’ব লাগিব। যদি তেওঁলোকে সংবিধান নাকচ কৰি সমান্তৰাল ব্যৱস্থা জাপি দিবলৈ চেষ্টা কৰে, তেন্তে আলোচনা কৰি লাভ নাই। শৰ্মাই কয় যে যদি নক্সালবাদীয়ে আলোচনাৰ প্ৰতি গুৰুত্ব আৰোপ কৰে তেন্তে আলোচনাৰ বাবে নিজাববীয়াকৈ এখন কমিটী গঠন কৰিব লাগে। এতিয়া যদি তেওঁলোকে আলোচনা কৰিব বিচাৰে তেন্তে তেওঁলোকে এটা স্পষ্ট প্ৰস্তাৱ লৈ আগবাঢ়ি আহিব লাগিব।

উপ-মুখ্যমন্ত্ৰীয়ে পুনৰ কয় যে ছত্তীশগড় চৰকাৰে এতিয়ালৈকে সৰ্বোত্তম পুনসংস্থাপন নীতি ৰূপায়ণ কৰিছে। যিকোনো নক্সালবাদীয়ে আত্মসমৰ্পণ কৰি মূলসুঁতিলৈ ঘূৰি আহিব বিচাৰিলে এই নীতিৰ অধীনত নিৰাপত্তা, পুনসংস্থাপন আৰু কৰ্মসংস্থাপনৰ সুযোগ দিয়া হ’ব। বিপথে পৰিচালিত হোৱা সকলে পুনৰ সমাজলৈ আহি প্ৰণালীবদ্ধ জীৱন যাপন কৰাটো চৰকাৰে বিচাৰে। উপ-মুখ্যমন্ত্ৰীগৰাকীয়ে কয় যে বিগত ডেৰ বছৰত পূৰ্বৰ নক্সালসকলে আইন জাপি দিবলৈ চেষ্টা কৰা ৪০খন গাঁৱত প্ৰথমবাৰৰ বাবে ত্ৰিৰংগ উত্তোলন কৰা হৈছে। তেওঁ কয় যে এতিয়া ৰাজ্যৰ সকলো গাঁৱতে ত্ৰিৰংগ উত্তোলন কৰি ভাৰতীয় সংবিধান মানি চলাটো বাধ্যতামূলক।

উল্লেখযোগ্য যে নক্সালবাদীৰ কেন্দ্ৰীয় সমিতিৰ মুখপাত্ৰ অভয়ে তেলেগু ভাষাত এখন পমফ্লেট প্ৰকাশ কৰি নক্সালবাদীৰ বিৰুদ্ধে অভিযান বন্ধ কৰাৰ ক্ষেত্ৰত শান্তি আলোচনাৰ প্ৰস্তাৱ আগবঢ়াইছে। মুখপাত্ৰ অভয়ে কয় যে আমি প্ৰস্তাৱ দিছো যে কেন্দ্ৰ আৰু ৰাজ্য চৰকাৰে ছত্তীশগড়, মহাৰাষ্ট্ৰ (গড়চিৰ’লি), ওড়িশা, ঝাৰখণ্ড, মধ্যপ্ৰদেশ আৰু তেলেংগানাৰ অভিযানৰ নামত হত্যাকাণ্ড বন্ধ কৰক আৰু নতুন সশস্ত্ৰ বাহিনীৰ শিবিৰ স্থাপন বন্ধ কৰক। এই প্ৰস্তাৱসমূহৰ প্ৰতি যদি কেন্দ্ৰ আৰু ৰাজ্য চৰকাৰে ইতিবাচক সঁহাৰি দিয়ে তেন্তে আমি তৎক্ষণাত যুদ্ধবিৰতি ঘোষণা কৰিম।

हिन्दुस्थान समाचार / মনোজ কুমাৰ শইকীয়া