গুৱাহাটী, ২৭ নৱেম্বৰ (হি.স.)। মুখ্যমন্ত্ৰী ড০ হিমন্ত বিশ্ব শৰ্মাক বদনাম কৰাৰ অভিযোগত অসম প্ৰদেশ কংগ্ৰেছ কমিটীৰ চাৰিজন নেতাক চিআইডিয়ে গ্ৰেপ্তাৰ কৰিছে। গ্ৰেপ্তাৰ হোৱা নেতাসকলৰ ভিতৰত আছে চাবুৱাৰ প্ৰাক্তন বিধায়ক ৰাজু সাহু, ৰাজ্যিক কংগ্ৰেছৰ মুখপাত্ৰ উপেন ৰাজ নাথ, মাজুলী জিলা কংগ্ৰেছৰ নেতা জীৱেশ্বৰ গাম, ৰূপহীহাট কংগ্ৰেছ নেতা বাহাৰুল ইছলাম।

চি আই ডিৰ বিষয়াসকলে আজি কয় যে মুখ্যমন্ত্ৰী শৰ্মাক দুৰ্নীতিৰ সৈতে জড়িত কৰি অভিনেতা অমিতাভ বচ্চনৰ জনপ্ৰিয় অনুষ্ঠান কৌন বনেগা কোটিপতিৰ এটা দৃশ্য ব্যৱহাৰ কৰি ছ'চিয়েল মিডিয়াত এআইৰ দ্বাৰা নিৰ্মিত এটা বিভ্ৰান্তিকৰ ভিডিঅ' প্ৰচাৰ কৰা হৈছে। ভিডিঅ’টোত এটা প্ৰশ্নৰ উত্তৰ হিচাপে মুখ্যমন্ত্ৰীৰ নাম প্ৰদৰ্শিত হোৱাৰ ফলত কন্টেন্ট দ্ৰুতগতিত ভাইৰেল হৈ পৰে।

বিগত কিছুদিন ধৰি এই ভিডিঅ’টো ছ’চিয়েল মিডিয়াত ব্যাপকভাৱে শ্বেয়াৰ কৰা হৈছিল। এক তদন্তত প্ৰকাশ পাইছে যে কংগ্ৰেছৰ চাৰিজন নেতাই এই এআইৰ দ্বাৰা নিৰ্মিত ভিডিঅ’টো প্ৰচাৰ কৰাত জড়িত আছিল, তাৰ পিছত চিআইডিয়ে তেওঁলোকক গ্ৰেপ্তাৰ কৰে। বিষয়াসকলে কয় যে বিষয়টোৰ তদন্ত অব্যাহত আছে।

हिन्दुस्थान समाचार / অৰৱিন্দ