কাঠমাণ্ডু, ০৯ জানুৱাৰী (হি.স.)। নেপালত চৰকাৰৰ নিৰ্দেশত নিৰ্বাচন আয়োগে এনে আইন প্ৰস্তাৱ কৰিছে, যাৰ বাবে দেশৰ পৰৱৰ্তী নিৰ্বাচনৰ পৰা সংসদীয় নিৰ্বাচন প্ৰক্ৰিয়াত কেৱল কংগ্ৰেছ আৰু ইউএমএলহে অন্তৰ্ভুক্ত হোৱাৰ সকলো সম্ভাৱনা আছে। গৃহ মন্ত্ৰালয়ে নিৰ্বাচন আয়োগৰ প্ৰস্তাৱক সেউজ সংকেত দি আইন মন্ত্ৰালয়লৈ প্ৰেৰণ কৰিছে।

বৰ্তমান নেপাল চৰকাৰৰ বৃহৎ দল দুটা হ’ল নেপালী কংগ্ৰেছ আৰু চিপিএন ইউএমএল। বিপৰীত মেৰুৰ পৰা দুটা দলৰ চৰকাৰ গঠন হোৱাৰ পাছত দেশৰ ৰাজনৈতিক স্থিতিশীলতাৰ নামত বহুদলীয় ব্যৱস্থাৰ অন্ত পেলোৱাৰ পৰিকল্পনাৰ কাম চলি আছে। আইন মন্ত্ৰী অজয় ​​চৌৰাছিয়াই বৃহস্পতিবাৰে কয় যে তেওঁ গৃহ মন্ত্ৰালয়ৰ পৰা নিৰ্বাচন সম্পৰ্কীয় আইন সংশোধনৰ প্ৰস্তাৱ লাভ কৰিছে, যাৰ ওপৰত আজি বিশেষজ্ঞৰ বৈঠক আহ্বান কৰা হৈছে। আইন মন্ত্ৰী চৌৰসিয়াৰ মতে, প্ৰস্তাৱিত আইনখনত ৰাজনৈতিক দলৰ স্বীকৃতিৰ বাবে ভোটৰ শতকৰা হাৰ বৃদ্ধি কৰা হৈছে। চৰকাৰৰ এই প্ৰস্তাৱক দেশৰ বহুদলীয় ব্যৱস্থাৰ অন্ত পেলাই দুদলীয় ব্যৱস্থা ৰূপায়ণৰ পদক্ষেপ হিচাপে দেখা গৈছে।

দৰাচলতে এতিয়ালৈকে সাংবিধানিক বিধান অনুসৰি যিবোৰ দলে ফেডাৰেল সংসদীয় নিৰ্বাচনত মুঠ ভোটৰ নূন্যতম তিনি শতাংশ আৰু ৰাজ্যিক নিৰ্বাচনত মুঠ ভোটৰ ডেৰ শতাংশ লাভ কৰে, সেইবোৰহে ৰাজনৈতিক দল হিচাপে স্বীকৃতি দিয়া হয়। সমানুপাতিক ভোটৰ ভিত্তিত কেৱল এনে দলকহে আসন আবণ্টন দিয়া হয়। এতিয়া নিৰ্বাচন আয়োগৰ প্ৰস্তাৱত ফেডাৰেল নিৰ্বাচনত তিনি শতাংশ আৰু ৰাজ্যিক নিৰ্বাচনত ডেৰ শতাংশ তিনি শতাংশলৈ বৃদ্ধি কৰা হৈছে। অৰ্থাৎ এই আইনখন সলনি হ’লে নেপালত মাত্ৰ দুটা বা তিনিটা দলহে বাকী থাকিব যিয়ে স্বীকৃতি পাব।

মুখ্য নিৰ্বাচন আয়ুক্ত দীপক থাপলিয়াই কয় যে চৰকাৰৰ পৰা নিৰ্দেশ পোৱাৰ পিছতহে এই প্ৰস্তাৱ তেওঁ গৃহ মন্ত্ৰালয়লৈ প্ৰেৰণ কৰিছিল। যদি এই প্ৰস্তাৱ আইন মন্ত্ৰালয়ে গ্ৰহণ কৰি কেবিনেটলৈ প্ৰেৰণ কৰে, তেন্তে তাৰ পৰা গৃহীত হোৱাৰ পিছত এই আইনখন সংসদে সাধাৰণ সংখ্যাগৰিষ্ঠতাৰে গৃহীত কৰিব পাৰে।

প্ৰাক্তন মুখ্য নিৰ্বাচন আয়ুক্ত অযোধি প্ৰসাদ যাদৱে যুক্তি আগবঢ়ায় যে এই আইনখন সংশোধন কৰিলে দেশত মাত্ৰ দুটা বৃহৎ দলহে থাকিব আৰু দেশৰ পিছপৰা আৰু প্ৰান্তীয় শ্ৰেণীৰ কণ্ঠ সংসদলৈ নাযায়।

উচ্চতম ন্যায়ালয়ৰ প্ৰাক্তন মুখ্য ন্যায়াধীশ সুশিলা কাৰ্কীয়েও বিশ্বাস কৰে যে দেশৰ দুটা বৃহৎ দলে একেলগে শাসন চলাইছে আৰু বিৰোধী দলৰ অস্তিত্ব নাইকিয়া কৰি বহুদলীয় ব্যৱস্থাৰ অন্ত পেলাবলৈ কুটিল চক্ৰান্তত লিপ্ত হৈছে।

हिन्दुस्थान समाचार / মনোজ কুমাৰ শইকীয়া