নগাঁও, ০৮ জানুৱাৰী (হি.স.): নগাঁও জিলা বিজেপিৰ নৱ নিযুক্ত সভাপতি ৰঞ্জিত বৰদলৈয়ে যোৱাকালি মঙলবাৰে সন্ধিয়া আনুষ্ঠানিকভাৱে দায়িত্ব গ্ৰহণ কৰে। লগতে নগাঁও জিলা বিজেপিৰ প্ৰাক্তন সভাপতি অভিজিৎ নাথয়ে তেওঁ কাৰ্যকালত নগাঁও জিলাৰ বিজেপিৰ হৈ যিদৰে সেৱা আগবঢ়ালে সেই বাবে এই সভাতেই তেওঁকো সম্বৰ্ধনা জ্ঞাপন কৰে।

নগাঁও চহৰৰ মৰিকলংস্থিত নগাঁও জিলা বিজেপিৰ কাৰ্যালয়ত এই উপলক্ষে অনুস্থিত অনুস্থানত বৰদলৈয়ে দ্বায়িত্বভাৰ গ্ৰহণ কৰে। নৱ নিযুক্ত নগাঁও জিলা বিজেপিৰ সভাপতি ৰঞ্জিত বৰদলৈয়ে দ্বায়িত্ব গ্ৰহণ কৰি কয় যে নগাঁৱত দলৰ সংগঠন তৃণমূল পৰ্যায়ৰ পৰা শক্তিশালী কৰিবৰ বাবে তেওঁ চেষ্টা চলাব। এইক্ষেত্ৰত নগাঁও বিজেপিৰ সকলো কাৰ্যকৰ্তাৰ সহযোগিতা বৰদলৈয়ে কামনা কৰে।

এই অনুষ্ঠানত নগাঁও জিলা বিজেপিৰ সদ্য বিদায়ী সভাপতি অভিজিত নাথ, নগাঁও- বটদ্ৰৱা সমষ্টিৰ বিধায়ক ৰূপক শৰ্মা, নগাঁও জিলা বিজেপিৰ নিৰ্বাচনী প্ৰভাৰী জুৰি শৰ্মা বৰদলৈ নগাঁও জিলাৰ বিজেপি কাৰ্যকৰ্তা অংশগ্ৰহণ কৰে। অনুষ্ঠানত নৱ নিযুক্ত সভাপতি ৰঞ্জিত বৰদলৈক বিপুল আদৰণি জনোৱা হয়।

হিন্দুস্থান সমাচাৰ / কিশোৰ মিশ্ৰ