নতুন দিল্লী, ০২ জানুৱাৰী (হি.স.)। দিল্লীত অব্যাহত থকা তীব্ৰ শীত লহৰৰ মাজতে বিধানসভা নিৰ্বাচন সন্দৰ্ভত কাৰ্যকলাপ তীব্ৰতৰ হৈ পৰিছে। নিৰ্বাচনৰ উষ্ণতা বৃদ্ধিৰ বাবে শুকুৰবাৰে জাপানী পাৰ্কৰ পৰা নিৰ্বাচনী ৰণশিঙা বজাবলৈ গৈ আছে প্ৰধানমন্ত্ৰী নৰেন্দ্ৰ মোদীয়ে। শুকুৰবাৰে প্ৰধানমন্ত্ৰীয়ে দিল্লীৰ উন্নয়নৰ বাবে ৪৫০০ কোটি টকাৰ প্ৰকল্প আৰম্ভ কৰিব।
সূত্ৰ অনুসৰি অহা ৫ জানুৱাৰীত পূব দিল্লীৰ চিবিডি খেলপথাৰতো প্ৰধানমন্ত্ৰীৰ সমাৱেশ হোৱাৰ সম্ভাৱনা আছে। অৰ্থাৎ মাত্ৰ চাৰিদিনতে প্ৰধানমন্ত্ৰী মোডীৰ দুখনকৈ ডাঙৰ ৰেলী আয়োজন কৰি দিল্লীত বিজেপিৰ সপক্ষে ৰাজনৈতিক বাতাবৰণ সৃষ্টি কৰাৰ কৌশল ৰচনা কৰিছে। ইয়াৰ লগতে বস্তিবাসীক আকৰ্ষণ কৰিবলৈ বিজেপিয়ে আম আদমী পাৰ্টীয়ে বিনামূলীয়া বিদ্যুৎ, পানী আৰু স্বাস্থ্য সুবিধা প্ৰদানৰ প্ৰতিশ্ৰুতিৰ তুলনাত পকী ঘৰৰ উপহাৰ দিবলৈ ওলাইছে। দিল্লী বিধানসভা নিৰ্বাচনৰ পূৰ্বে বিজেপিৰ কৌশলগত পৰিকল্পনাৰ এক গুৰুত্বপূৰ্ণ অংশ হিচাপে বিবেচিত হৈছে।
দিল্লী বিজেপিৰ সভাপতি বীৰেন্দ্ৰ সচদেৱে বৃহস্পতিবাৰে সংবাদমেলত কয় যে শুকুৰবাৰে প্ৰধানমন্ত্ৰী নৰেন্দ্ৰ মোদীয়ে ৱাজিৰপুৰত বস্তিবাসীৰ বাবে দিল্লী উন্নয়ন কৰ্তৃপক্ষই নিৰ্মাণ কৰা ১৬৪৫টা স্বাভিমান ফ্লেটৰ চাবি অশোক বিহাৰৰ বাসিন্দাক প্ৰদান কৰিব। এই ডি ডি এ ফ্লেটসমূহ ‘ঝুগ্গী ৱাহিন হাউছ’ আঁচনিৰ অধীনত নিৰ্মাণ কৰা হৈছে। বস্তিবাসীক নিৰাপদ আৰু পকী ঘৰৰ ব্যৱস্থা কৰা যাতে তেওঁলোকে সন্মানজনক জীৱন যাপন কৰিব পাৰে। তেওঁ কয় যে প্ৰধানমন্ত্ৰী নৰেন্দ্ৰ মোদীয়ে ডি ইউ আইন অনুষদৰ ইষ্ট কেম্পাছ উদ্বোধন কৰিব। ইয়াৰ উপৰিও তেওঁ পশ্চিম দিল্লীৰ কেম্পাছ অৱ দিল্লী দ্বাৰকাৰ কেম্পাছত আধাৰশিলা স্থাপন কৰিব। ইয়াৰ উপৰিও তেওঁ ৰোশনপুৰা নাজাফগড়ত দিল্লী বিশ্ববিদ্যালয়ৰ এটা কেম্পাছৰ আধাৰশিলা স্থাপন কৰিব।
দিল্লী বিজেপিৰ সভাপতিয়ে কয় যে শুকুৰবাৰে প্ৰধানমন্ত্ৰীয়ে দিল্লী মেট্ৰ’ৰ চতুৰ্থ পৰ্যায়ত ৰিথালা, নৰেলা কুণ্ডলী কৰিডৰৰ আধাৰশিলা স্থাপন কৰিব। ইয়াৰ উপৰিও প্ৰধানমন্ত্ৰীয়ে জনকপুৰী আৰু কৃষ্ণ পাৰ্কৰ মাজৰ মেজেন্টা লাইনৰ সম্প্ৰসাৰণ দিল্লীবাসীক দিবলৈ গৈ আছে। তেওঁ ৰোহিনীত কেন্দ্ৰীয় আয়ুৰ্বেদিক গৱেষণা প্ৰতিষ্ঠান ভৱনৰ আধাৰশিলা স্থাপন কৰাৰ লগতে দিল্লীৰ যান-জঁট হ্ৰাস কৰাৰ অভিলাষী প্ৰকল্প নিউ অশোক নগৰ আৰু চাহিবাবাদৰ মাজত চলি থকা নমো ভাৰত ৰে’লখনো উদ্বোধন কৰিব।
বীৰ সাৱৰকাৰৰ নামত ৰোশনপুৰাত মহাবিদ্যালয়ৰ আধাৰশিলা
প্ৰধানমন্ত্ৰী নৰেন্দ্ৰ মোদীয়ে অশোক বিহাৰৰ ভিডিঅ’ কনফাৰেন্সিঙৰ জৰিয়তে দিল্লী বিশ্ববিদ্যালয়ৰ বাবে ৬০০ কোটিৰো অধিক মূল্যৰ তিনিটা নতুন প্ৰকল্পৰ আধাৰশিলা স্থাপন কৰিব। ইয়াত পূব দিল্লীৰ সুৰজমল বিহাৰত ইষ্ট কেম্পাছত এটা একাডেমিক ব্লক আৰু দ্বাৰকাত পশ্চিম কেম্পাছত এটা একাডেমিক ব্লক আছে। ইয়াৰ ভিতৰত নাজাফগড়ৰ ৰোশনপুৰাত বীৰ সাৱৰকাৰ মহাবিদ্যালয় নিৰ্মাণৰ কামো অন্তৰ্ভুক্ত, য’ত শিক্ষাৰ বাবে অত্যাধুনিক সা-সুবিধা থাকিব। ১৪০ কোটি টকা ব্যয় সাপেক্ষে নিৰ্মাণ হ’ব বীৰ সাৱৰকাৰ কেম্প। এইটো হ’ব দহ মহলীয়া অট্টালিকা আৰু ইয়াৰ সমান্তৰালকৈ ১০৭ কোটি টকা ব্যয়েৰে দ্বাৰকাত আইন অনুষদ (ল’ ফেকাল্টী) নিৰ্মাণ কৰা হ’ব।
শুকুৰবাৰে অশোক বিহাৰত অনুষ্ঠিত হ’বলগীয়া কাৰ্যসূচীৰ পৰ্যালোচনাৰ বাবে কেন্দ্ৰীয় গৃহ আৰু নগৰ উন্নয়ন মন্ত্ৰী মনোহৰ লাল খট্টৰে দিল্লীৰ সাতজন সাংসদৰ সৈতে এক বৈঠকত মিলিত হয়। হিতাধিকাৰীসকলে যাতে ফ্লেট পোৱাৰ ক্ষেত্ৰত কোনো সমস্যাৰ সন্মুখীন নহয় তাৰ প্ৰতি লক্ষ্য ৰাখি এই কাৰ্যসূচীৰ ব্যাপক প্ৰচাৰ কৰা হৈছে।
হিন্দুস্থান সমাচাৰ / মনোজ কুমাৰ শইকীয়া
