জয়ছালমেৰ/নতুন দিল্লী, ২০ ডিচেম্বৰ (হি.স.)। কেন্দ্ৰীয় বিত্ত আৰু কৰ্পৰেট পৰিক্ৰমা মন্ত্ৰী নিৰ্মলা সীতাৰমণে শুকুৰবাৰে ৰাজস্থানৰ জয়ছালমেৰত আগন্তুক কেন্দ্ৰীয় বাজেট ২০২৫-২৬ৰ প্ৰস্তুতিৰ সৈতে জড়িত এক বৈঠক অনুষ্ঠিত কৰে। নিৰ্মলা সীতাৰমনৰ সভাপতিত্বত অনুষ্ঠিত হোৱা বৈঠকত ৰাজ্য আৰু কেন্দ্ৰীয় শাসিত অঞ্চলৰ (বিধানসভাকে ধৰি) মুখ্যমন্ত্ৰী, মন্ত্ৰী আৰু উচ্চপদস্থ বিষয়াসকল উপস্থিত থাকে।
বিত্ত মন্ত্ৰালয়ে এক্স.পোষ্টত জাৰি কৰা এক বিবৃতিত কয় যে কেন্দ্ৰীয় বিত্ত মন্ত্ৰী নিৰ্মলা সীতাৰমণে ৰাজ্য আৰু কেন্দ্ৰীয় শাসিত অঞ্চলৰ মন্ত্ৰীসকলৰ সৈতে বাজেটপূৰ্ব পৰামৰ্শ বৈঠকত সভাপতিত্ব কৰে।
ৰাজস্থানৰ জয়ছালমেৰত অনুষ্ঠিত এই বৈঠকত সীতাৰমণে আগন্তুক কেন্দ্ৰীয় বাজেট ২০২৫-২৬ৰ বাবে ৰাজ্য আৰু কেন্দ্ৰীয় শাসিত অঞ্চল (বিধানসভাকে ধৰি)ৰ সৈতে আলোচনাত মিলিত হয়।
মন্ত্ৰালয়ৰ তথ্য অনুসৰি, বিত্তমন্ত্ৰী সীতাৰমনৰ সৈতে বাজেটৰ পূৰ্বৰ আলোচনা বৈঠকত কেন্দ্ৰীয় বিত্ত ৰাজ্যিক মন্ত্ৰী পংকজ চৌধুৰীৰ লগতে গোৱা, হাৰিয়ানা, জম্মু-কাশ্মীৰ, মেঘালয় আৰু ওড়িশাৰ মুখ্যমন্ত্ৰী, অৰুণাচল প্ৰদেশ, বিহাৰ, মধ্যপ্ৰদেশ, ৰাজস্থান আৰু তেলেংগানাৰ উপ-মুখ্যমন্ত্ৰী, ৰাজ্য আৰু কেন্দ্ৰীয় শাসিত অঞ্চলৰ বিত্তমন্ত্ৰী, অৰ্থনৈতিক পৰিক্ৰমা আৰু ব্যয় বিভাগৰ সচিব আৰু বিত্ত মন্ত্ৰালয়ৰ জ্যেষ্ঠ বিষয়াসকলে অংশগ্ৰহণ কৰে।
ইয়াৰ পূৰ্বে কেন্দ্ৰীয় বিত্তমন্ত্ৰী নিৰ্মলা সীতাৰমণক জয়ছালমেৰ বিমানবন্দৰত উপস্থিত হোৱাৰ লগে লগে ৰাজস্থানৰ উপ-মুখ্যমন্ত্ৰী দিয়া কুমাৰী, বিজেপি কৰ্মী আৰু ৰাজ্য চৰকাৰৰ উচ্চপদস্থ বিষয়াই উষ্ম আদৰণি জনায়।
উল্লেখযোগ্য যে আগন্তুক ২০২৫-২৬ বিত্তীয় বৰ্ষৰ কেন্দ্ৰীয় বাজেট ২০২৫ চনৰ ১ ফেব্ৰুৱাৰীত সংসদত দাখিল কৰাৰ সম্ভাৱনা আছে। এয়া হ’ব সীতাৰমণৰ একেৰাহে অষ্টম বাজেট আৰু মোডী চৰকাৰৰ তৃতীয় কাৰ্যকালৰ দ্বিতীয়খন সম্পূৰ্ণ বাজেট। ২০৪৭ চনৰ ভিতৰত ভাৰতক উন্নত ৰাষ্ট্ৰ হিচাপে গঢ়ি তোলাৰ লক্ষ্যত উপনীত হ’বলৈ বাজেটখনে নীতিগত দিশ প্ৰদান কৰিব।
হিন্দুস্থান সমাচাৰ / মনোজ কুমাৰ শইকীয়া
